2 Petero 2 - Testamenta Áre 1983 (Toaripi PNG)

Satiriaraita apeva papukaru

¹ Apeva peroveta karu ere Israela karu ve aru voa foreraiape, aea lōfeare mai ita satiriaraita apeva papukaru e voa ta forerai roi. Ere saroapaita ovoro apeva murufakao satiriōri, aea erero itaea lei maravaita lea Papuvita la avoa a’, aea lōfeare saroroapaita soa elore maea voa utohoari lei forerai roi.

² A—, karu rauapo ereve safu la miroapaita mai voa roroava roi; aea ipi ere leita lea mai vei karu sa okofa ve otiharo la kaiae o ari roi.

³ Ere sa etau rauapo maravai vei haikakare araita voa, ere o apeva sa ero kurea eve haiiri la lari roi; a—, erero seseōvi ere vei everori ōpe kaiae tava lekaleka levi leiti roi, aea erero saroroapaita soa ivutu auke ita la eaea.

⁴ Ualare lea kaiae leipe aneru la maeaforoe auke lei, erero opai karu ve oti voa toapi erero lea murumuru toru‐uta karera voa soa seseōvi tava miaraita Sare la tai vei sasauka laepepea.

⁵ Ualare ta evera soa ve karu la maeaforoe auke leipe; a—, Noa, mai haura la itoro ape lea vita, aeata areve maeapavora seven ita la Ualare sa fari lei makuri leipe, are arero taivotai auke ita roroaiape karu ve mearovaeka la ma taiva sa lei patei aierōpe lea mea.

⁶ Are Sodoma aea Gomora la a sa vifei sa’ haroavi afutae leipe, are seseōvi saroroapai tava ereukaro miarōpe lea mea, aeata are lea karikara oraka la leipe mai sa aite soa voa Ualare la taivotai auke lei roroaita lea karu la lei ore leiti vei.

⁷ A—, are mai haura leipe lea vita, Lota la haria fareōvi makuri leipe. Lea Lota are karu sa leiape herei mai vei haieae rovaea leiape.

⁸ Are mai haura lei, lea karu ve aru voa peiape lea mea, ere sa leiape mai kaiae la ofae eovi eovi aea mapi mapi, areve ove sare faita ita haiiri eae lei vovo meiape.

⁹ Soka Ualare la taivotaita karu erero seseōvai vei vuteaita etau la sukaeaita lea mea, Papuvita erero fareōvi makuri leitita ore, aeata mai kaiae leita karu la fasi sasaukaita ore tetetete seseōvi tava miaraita lea Sare voa.

¹⁰ Aeata mea kaiae meta‐meta la leitita karu ta reha: maeasarōva sa haikaeaita mu eokere mai la haihahari leita karu, aeata Ualare ve siahu o la sukavutea haiarara leitita lea karu. Mea apeva satiriaraita papukaru ere ivara eokere ita maeamarōva lei, arori ve sosorusosoru karu la o maealolo ari vei tore leiti sore.

¹¹ Eite aneru, mea apeva satiriaraita papukaru ve rofo aea siahu ita la sapataita lea aneru, ere Papuvita ve soso voa o kikifare ita erero havara paraeai sore.

¹² A—, mea apeva satiriaraita papukaru haiiri auke lei, ere usoso fara animala fefeare, fitōva sa feravi, savai vei epi roroaita lea animala; ere haihaveva leita lea etau la area sa vutea aritore. Erero fara animala fefeare saroroapai roi,

¹³ aea ereve leita mai kaiae vei erero kaiae tava la miarai roi. Ere sare soa havohu maeakakare la leiti vei ereve hailareva reha. Ere usoso maea kaka kaka aeata siaviri fefeare, ere e ita fareho kokoruka larietau larita soasoa voa, aea ere ero apeva sa vuteaita voa hailareva lōri leititore.

¹⁴ Ere herei leiti vei uamori la ofae koko fofoisa vovea, aeata leitita kaiae poetapai sore. Ere rofo auke karu la lei kaiae leiti vei kurea vovea. Ere etau maravai vei liri arita mai malasa kofa. Ere Ualare ve o maealolo ve iri voa la roroa.

¹⁵ Ere otiharo haura la kiripi, otiharo sa veverapi, ere Balaama Beoro, kaiae ve tava la ovai vei haikakare leipe lea vita ve otiharo la tei la roroa.

¹⁶ Areve lea kaiae vei o erere arero a’, o auke asini sa karu ve o ape ita laua sukōvi, lea peroveta karu ve kitou maeakakare la sasaukōpe reha.

¹⁷ Lea karu ere usoso tori kaleitita ma otioti fefeare; ere usoso karivaripu sa toa itoteaita ma havu fefeare; murumuru kafearu kofa voa oti ere vei kekese lei la eaea.

¹⁸ Ere maeakakare o merava ita hiva a’, mai kaiae leita karu ve aru voa safauka makuri áre leipeta lea karu la ere maeasarōva sa haikakare leita mai maealolo ita voa kaiae leiti vei kurea vovea.

¹⁹ Ere erero paparaea pisiri lei roroaita soa erero miarai otoare aritore, a—, eite ere elore maea la lei, saroroapaita soa voa fasaita sarufa lei la roroa; ipi karu maeapatoita sa lei arero sapataita, are lea etau ve sarufa loita reha.

²⁰ Ipi karu ere ereitave Papuvita aeata ereitaro lei makuri leita Vita Iesu Keriso la ore lei, mearovaeka ve sirisiri etau voa lōri safauka makuri leitita, a—, lea ve aite voa lea sirisiri etau sa erero ata feravi aieraita, a—, lea aite kofa mai ere vei maealolo kofa loita reha, omopa soa ve maealolo lōfeare kao.

²¹ Ere haura ve otiharo la ore auke leitita lea taheka lareva ia; a—, arero ore leitita lea ve aite voa erero miaraita safu o la kiripi ata kerorita lea lareva kasirau kofa.

²² Ere mea parabole o la lei okofa loita reha, Ave are suka sisōvaita lea mu la ata kerori larō vovea, aea ma visea roroka leitita ita lou lasusa ata turai haikaea vovea.