2 Petero 1 - Testamenta Áre 1983 (Toaripi PNG)

¹ Simona Petero, Iesu Keriso ve sarufa vita aeata aposetolo ve karoro meha; ereitave Ualare aeata lei makuri leita Vita Iesu Keriso ita sa leita mai haura voa, elave sukaerereaita haiiri lareva ita usoso feare lei maravi roroaita lea karu veia.

² E Ualare aea ereitave Papuvita Iesu la ore lei, aea lōfeare voa haiforoe leita meru aea tairu ita e voa rovaea kofa leitia.

Eve haiiri lei rofo leitia

³ Ualare ve siahu sa ereitaro etau foromai la miōri la roroa, ereita Ualare sa haikaeaita haiiri feare makuri lei roroai vei, areve elore sosorusosoru aea lareva‐eiteapo voa ereitaro isōpe lea Vita vei.

⁴ Lōfeare voa are areve otoare etau meta‐meta aeata lareva‐lareva la ereitaro miōri la roroa, lea otoare meru voa e mearovaeka voa leitita haikakare maealolo ve saroroapaita etau voa safauka, Ualare sa leita mai feare lei vovo roroai veia.

⁵ Ipi lea etau kofa vei e haiiri rofo foromai leitia. Eve sukaerereaita haiiri voa leitita mai lareva la topiaraia; aea leitita mai lareva voa haiore ta topiaraia;

⁶ aea haiore voa haisukafori roroaita mai ta topiaraia; aea haisukafori roroaita mai voa lula auke haiiri rofo ta topiaraia; aea lula auke haiiri rofo voa Ualare la taivotaita mai ta topiaraia;

⁷ aea Ualare la taivotaita mai voa paumarehari la liri arita mai ta topiaraia; aea paumarehari la liri arita mai voa karu foromai ta toto aria.

⁸ Ipi e lōfefeare etau etau sa eve haiiri voa siseita aea ere rovaea foromai leitita, a—, e eite auke maeapatoita karu levi leiti roi, e sa Papuvita Iesu Keriso la ore lei roroaita lea vei.

⁹ A—, lōfeare etau la ovai auke leitita lea karu, are ofae horohoro lei, etakofa eavaita ore kao, arero areve evera iri kaiae voa uka ovava leipe, are lea la haisafi la mea.

¹⁰ Lea vei, paumarehari e, haiiri rofo foromai ita Ualare sa ero isa ero haikaea maravaita lea la lei okofa leiti vei, ipi e lōfeare leitita, a—, e safosafoa levi putoi roi.

¹¹ Lōfeare voa e ereitave Papuvita aea lei makuri leita lea vita Iesu Keriso ve peita basileia voa utape fapi oropai kofa leiti roi.

¹² Lea vei, arave haiiri soa foromai lea etau la ero lei ata haikeai vei; eite e erero ore, aea usoso ero satiriōri lei ore leitita okofa voa e haiiri kere ita roroa vovea.

¹³ A—, arave haiiri mai haura meha, ara makuri lei meita soa savori voa lea etau la ero lei ata haikaeakaea a’ ero sukitapai vei.

¹⁴ Ipi ara ore ara mea mearovaeka ve maea la fōovi miavaita soa haekao loi, usoso ereitave Papuvita Iesu Keriso sa araro muiōpe lōfeare.

¹⁵ Ara ta mea la haiiri rofo ita leiti roi, e arave opai soa ve aite voa lea etau la haikaea vovo roroai veia.

Ara Keriso ve sosorusosoru la ofae eavōpe

¹⁶ Ipi ela ereitave Papuvita Iesu Keriso siahu ita foreraita soa ve o la ero omoipe lea vei, ela maeahahauhahau sa leipe apeva fari la seseari omoi kasirau; a—, ela arero areve basileia ve siahu ita la elave elore ofae sa etakofa eavōpe.

¹⁷ Ipi Oa Ualare sa marase o a’ aea sosorusosoru ita la arero miarōpe soa, o‐ape Sosorusosoru‐eiteapo voa fauka foreri mō ōpe, Arave haikakare araita Atute meha; ara are vei hailareva leititore.

¹⁸ Ela are ita farehoria safu raepa voa pepeiape lea mea, ela kofa lea ape‐o kauri voa fauka forerōpe la mapōpe.

¹⁹ Soka lōfeare voa ela vei peroveta o la lei okofa leipe reha. E ta lea o la ofae eovi ore leitita lareva, ipi lea o ere lamepa feare, murumuru voa haea tetetete mea ilaila lei ōpai koru eve haiiri voa patei ovava leiti roi.

²⁰ A—, mea etau omopa ore leitia, karu farakeka aea areve elore haiiri haria sa seseōvi, Safu Buka voa uka siseita peroveta o ve eite la mavitoa omoita ore kasirau.

²¹ Ipi peroveta o karu sa haikaeaita haiiri voa forerai sore; a—, karu Safu Arahoha sa kurea, ere Ualare ve o la lōri omoiape.