2 Korinito 9 - Testamenta Áre 1983 (Toaripi PNG)

Ekalesia sa meru miaraita mai

¹ Iudea voa pepeita Ualare ve karu la toaraita meru vei, ara o aeata ata ukaita eite kofa kao.

² Ipi ara eve haiiri ve kakeva la ore fae, aea ara ta marase e vei Makedonia karu la mo ō vovea, Akaia omopa sisoro voa meru miarai vei haiiri kekese leipe. Eve haihahari sa erero rauapo la kurea lei rofo la leipea.

³ A—, ara mea maraiosu la itapaita meha, ela e vei arita marase o lea meru vei merava leiti ave; lea vei e eve toaraita etau la lei kekese leitia, usoso ara sa e vei evera omoiape lea o feare.

⁴ Makedonia karu hea ara ita farehori isei foreri, aea ero kekese auke la eavaita, a—, elave marase o merava leita lea vei ela ta maeamariti, e ta maeamariti leiti roi.

⁵ Lea vei arave haiiri sa elave maraiosu la loki serea ita lei, ere ero tai isai vei, e sa evera otoare ōpe lea maeaforoe ve meru la everori miōri kekese leiti vei; lōfeare lea moni meru etau kofa leiti roi, irori ita fareovaita etau feare kao.

⁶ E haikaeaia: etau mere farafarapo la vipaita lea karu fare farafarapo la sarapi maravai roi.

⁷ Karu elore elore seseōvaita haiiri feare miaraia; haiarara haiiri ita aeata irori ita haisa levi miaraia, ipi Ualare meru hailareva ita miaraita lea karu la haikakare araitore.

⁸ Ualare siahu ia maeaforoe ve meru foromai la e voa lei rauapo leiti vei; lea vei e etau foromai la usoso ita meavea maravi, aea eve leita mai lareva foromai vei etau rauapo ita roroava roi.

⁹ Usoso Safu Buka voa uka siseita o fefeare, Are meru etau lō miara lō miara lei merava karu la miara vovea; areve haura leita mai pea pepe lōri peava roi.

¹⁰ Etau mere la vipaita karu la miaraita aeata larietau miaraita lea Ualare, etau mere ta ero miōri, erero lei asi rovaea lei, aea eve mai haura ve fare la lei rauapo leiti roi.

¹¹ Are meru etau rauapo ero miōri, e ta karu haria la maeaforoe lei au miaraita lea sa usoso leiti roi. Lōfeare voa karu rauapo ere ela voa ovaita eve lea meru vei Ualare la maeati roi.

¹² Ipi e leipeta mea tivi Ualare ve karu sa haikaeaita etau la erero miarai, aea lea sa haria kao, a—, Ualare la maeatita mai la lei rovaea leiti roi.

¹³ Mea toaraita tivi voa eve mai la lei okofa la muiaipea, aeata karu rauapo sa Ualare la maeati roi, ere e arero kakeva lei Keriso ve Ovoro Lareva la seseara vovo roroaita lea vei; ere arero ta maeati roi eve lōfoa lōfoa lei miaraita meru ere vei aeata karu foromai vei.

¹⁴ Ere ero haikakare ari, e vei Ualare la loki leiti roi, ipi Ualare ve maeaforoe rovaea kofa e voa leipeta lea vei.

¹⁵ Ereita Ualare la maeatia areve meru rovaeka vei, karu sa omoi ore auke leitita lea meru.