2 Korinito 7 - Testamenta Áre 1983 (Toaripi PNG)

¹ Arave haikakare e, ereita lea otoare la ovi roroaita lea vei, ereita maeasarōva aea arahoha ita sirisiri leita etau foromai la elore elore voa fareōvi mutapi, Ualare la taivotei, safu mai lareva la kekese ita lei vovo roroava.

Paulo ve hailareva o

² Oti eve haiiri voa ela vei leitia; ela karu aea la kaiae leiti sore, ela karu aea la hasiavai sore, ela karu ve etauroro apeva vutea maravai sore.

³ Ara lea o ero kaiae o ari vei omoia kao; ipi ara omopa ero o mō arita, E elave haiiri voa pea vovea, farehoria opai vei aea farehoria makuri lei pepei vei.

⁴ Ara ero sukaerereai kofa; ara e vei hiva ō vovea. Elave haisora foromai voa, ara vovoro foromai lei, hailareva rovaea ita la mea.

⁵ Ipi ela Makedonia voa foreraia lea mea, elave hai itatapai kao, a—, ela itai itai voa heafo lei, maria voa sosori rauapo, iri voa tore rauapo leivota.

⁶ A—, haiiri totopaita karu la lei rofo leiti vei kureaita lea Ualare, are Tito sa foreraia soa voa elaro lei vovoro leitia reha.

⁷ Are sa foreraia lea vei haria kao, a—, e sa arero maeafukapaia lea fari vei ta reha. Ipi are eve haikakare aea eve haiiri eae aea eve haihahari ara vei leitia lea fari elaro omoita, lea vei ara haiiri meta rovaea ata leitia reha.

⁸ Ara arave karoro sa ero lei haisora leitia lea vei, ara faitora haiiri keroria kasirau. Eite ara omopa horahora ia, ipi ara ore lea karoro sa ero lei haisora leitita, a—, soa harua haria.

⁹ Faitora ara hailareva, e sa haisora leitia lea vei kao, a—, ipi e sa haisora lei, e haiiri ata keroria lea vei. Ipi eve lea haisora Ualare voa foreraita, lea vei e maealolo ela voa sukaeai kasirau.

¹⁰ Ipi Ualare voa foreraita lea haisora sa lei, karu la lei haiiri ata kerori makuri voa lariōvaitore, a—, mearovaeka voa foreraita lea haisora sa lei opai voa lariōvaitore.

¹¹ E foforoe hai aura kaeai, Ualare voa foreraia lea haisora vei are ero lei haisukafori kaeai vei ei? eve haiiri ta lei haura leiti vei ei? kitou leafeare? haikavora leafeare? haikakare leafeare? haihahari leafeare? seseōvi kaiae tava miaraita leafeare ei? Lea etau foromai voa e sa leitia lea mai haura haria.

¹² Ara lea karoro lea vei ukaita, kaiae la leitia lea vita vei kao, ō are sa hasiavaia lea karu vei ta kao, a—, ipi Ualare ve soso voa eve haikakare la lei ela vei pisiri lei muiai vei.

¹³ Lea vei ela vovoro ita la roroa, aea lea haria kao, a—, Tito ve lea hailareva sa elaro ta lei hailareva foromai loloi, ipi e areve haikavora la lei safefeapaia lea vei.

¹⁴ Ara areve omopa voa e vei hiva o arita, aea e araro lei maeamariti leiti kao; a—, usoso ara ero omoia lea o foromai okofa leitita lōfeare, ela Tito ve omopa voa aria lea hiva ta okofa leitia reha.

¹⁵ E arero kakeva leitita aea e arero tore ita hai‐uti oriri ita maeafukapaia lea la are haikaeaita soa, areve foroe leita haiiri rovaea kofa la leipea.

¹⁶ Ara ta hailareva rovaea ipi ara ero sukaerereai kofa leita ore.