2 Korinito 6 - Testamenta Áre 1983 (Toaripi PNG)

¹ Ela Ualare ita fareho tivi lei, ero loki la leipea, e areve haiforoe leita meru la auraka levi ovaia.

² Ipi Ualare ve o meha: Maeaforoe ve soa voa ara aro mapi, lei makuri leita soa ve sare voa ara aro toarōpe. Mapaia! Ualare ve maeaforoe la ovaita soa meha; fareōvi lei makuri leita sare faitora.

³ Ela karu la lei safosafoa putoita etau karu ve omopa voa vipai sore, elave ovoro fafarapaita tivi la lei kaiae leiti ave.

⁴ A—, elave leita mai foromai voa ela karu la lei ore lei vovea ela Ualare ve tivi karu, haisora soasoa voa, aea heafo aea haieae ita ve soa rauapo voa, ela haiiri kere ita lei vovo roroaita eavia.

⁵ Elaro soa rauapo teavi sasape, dibura voa fasaiape, ela heohea ve soasoa voa roroaiape; ela tivi pasou leiape, soa rauapo ivutu iavai auke ita eroa sosō vovo roroaiape.

⁶ A—, ela haiiri ovava ita, haiore ita, au morarita mai ita, aea maeaforoe ita lei, ela Ualare ve tivi karu Safu Arahoha Lareva voa aea maeaforoe kofa voa roroaita la muia vovea.

⁷ Ela okofa ve ovoro ita voa aeata Ualare ve siahu ita voa la roroa. Ela mai haura ve marehaukaita etau ia, soi elave mai toare voa, aea laua mai ava voa.

⁸ Ela marase o ita kisari o ita voa, aea havara apeva ita aea fari lareva ita voa la roroa; lohalai vuteaita karu o elaro arita, a—, eite ela okofa ō vovea.

⁹ Ela rare auke karu feare, a—, eite karu foromai elaro ore; ela opai vei leitita, a—, ofae eavaia, ela makuri la leipea. Elaro seseōvi savae toaita, a—, paea opai kao.

¹⁰ Ela hai‐tofafaita, a—, hailareva lei vovea; ela merava leitita, a—, ela karu rauapo la lei pisoso karu lei vovea; elaro etau kasirau o oita karu, a—, eite ela etau foromai la maravi la roroa.

¹¹ Korinito karu e, ela o pisiri ita ero la moipea; elave haiiri ve eite ta ero la muiaipea.

¹² Ela elave haiiri e vei kokoea roroaia kao, a—, e eve haiiri ela vei kokoea la roroa.

¹³ Ara ero o la moipea, e usoso arave atutemori fefeare; eve tava e elaro ta haikakare rovaea leitia.

Kureaita o ipi haiiri orakoria vei

¹⁴ E sukaerereai auke leita lea karu ita fareho maeapavora levi leitia; ipi mai haura mai kaiae ita fareho leafeare leiti roi ei, aea ovava murumuru ita mai farakeka leafeare leiti roi ei?

¹⁵ Keriso ita Diabolo ita haiiri farakeka leafeare leiti roi ei? Sukaerereaita karu aeata sukaerereai auke karu etau fareho leafeare ovai vei ei?

¹⁶ Ualare ve maso oti aeata apeva ualare ve ove etau ita oti farakeka leafeare leiti roi ei? Ipi ereita makuri leita Ualare ve maso oti, usoso Ualare sa moipe mea o feare, Ara ere voa peava roi, aea ara ere voa kerori vo meava roi; ara ereve Ualare lei, lei vovo meava roi, aea ere arave karu lei, lei vovo roroava roi.

¹⁷ Lea vei Papuvita o mō la auai, E ereve aru voa kiripi pisiri foreri, mai haria firu karu leitia. Sisiri etau farakeka la mai opa sa levi mopaia, aea ara ero maeafukapi,

¹⁸ eve Oa lei vovo meava roi, aea e arave atute ita mori ita lei vovo roroava roi. Rofo Rovaekapo Papuvita ve o reha.