2 Korinito 5 - Testamenta Áre 1983 (Toaripi PNG)

Mearovaeka etau aea kauri etau

¹ Ipi ereita ore, ereitave harotōvu, mea mearovaeka ve maea la fareovaita lea mea, Ualare are kofa sa pisosita uvi aeata ia ereita vei, peita uvi reha kauri voa.

² Okofa mōvoa ela haisusuru erere savori, elave kauri uvi sa aierai vei ō vovea;

³ elaro lōri aieraita, a—, elaro maea paseare levi eavai roi.

⁴ Mea maea ve harotōvu iri voa pepeita soa ela haiiri pasou lei haisusuru ō vovea; elave haiiri mōfeare kao elave maearovaeka ve maea la mutapai vei, a—, eite, elave haiiri rovaea kofa elaro kauri ve maea sa aierai vei, makuri sa opai la ovi aierai vei.

⁵ Ereitaro lei lōfeare toarōrisai vei ereitaro lei kekese leita Vita are Ualare reha, aea are sa Arahoha ereitaro miōri laepea toare ve peise vei.

⁶ Ela lea vei haiiri rofo lei vovea, ipi ela ore ela mea maea ve iri voa pepeita lea mea, ela Papuvita voa pepei sore;

⁷ ipi ela sukaerereaita haiiri voa roroa vovea, ofae sa eovi roroaia kao.

⁸ Ela haiiri rofo lei vovea, a—, elave haiiri rovaea elave mea maea la kiripi te Papuvita ita pavai vei.

⁹ Lea vei elave haiiri farakeka meha: mōvoa peita varo, lōvoa varo, arero haria la lei hailareva leiti vei.

¹⁰ Ipi ereita foromai Keriso ve seseōvi tava miaraita oti voa foreri soi popōvai roi, karu foromai elore elore maea voa leitita etau ve tava la maravai vei, lareva varo, maealolo varo.

Ualare ita totoeaita ovoro

¹¹ Soka ela Papuvita la tore leitita mai la ore leitita lea vei, ela karu la kurea vovea. Ualare elaro foromai ore fae, aea ara haikaeai e eve haiiri voa ta araro ore.

¹² Ela elore maea la ata maeati o aria kao; a—, hiva arita eite ero omei, e sa ela vei hiva ari vei; aea karu ve haiiri la seseōvi hiva o ari auke lei, ereve soso vei hiva arita lea karu la tava o omoi vei.

¹³ Ela maeakakare leitita, a—, lea ve ipi Ualare vei; ela haiiri haura leitita, a—, lea ve ipi e vei.

¹⁴ Ipi Keriso ve haikakare vei ela haiiri haria ovaita ore kao; ela haiiri seseōvi roroka loita meha, heavita farakeka karu foromai vei opōpe lea vei, karu foromai ta opōpe reha;

¹⁵ aea are karu foromai vei opōpe, lea vei makuri lei pepeita lea karu ere elore elore maea vei makuri ata levi leiti vei, a—, ere vei opi ata itoipe lea Vita veia.

¹⁶ Lea vei mea soa ve aite voa ela karu la maeasarōva haiiri ita ata levi seseōvi ore leiti roi; ela evera Keriso la maeasarōva haiiri ita sa seseōvi ore leipe, a—, ela arero lōri ata seseōvi ore levi leiti roi.

¹⁷ Lea vei karu aea Keriso voa peita, a—, arero lei áre lei meita vita are reha; lea evera etau veverapi kalei, etau foromai áre lei foreraita reha.

¹⁸ Lea etau foromai Ualare voa forera vovea; are Keriso voa are ita elaro lei totoeaita Ualare, aea karu la lei Ualare ita totoeaita tivi elaro miarōpe.

¹⁹ Lea ve eite meha: Ualare are Keriso voa pea, mearovaeka karu foromai la lei areve elore maea ita totoea, ereve leita kaiae la mai muti auke leipe; are ta lea totoeaita ovoro la itoro ari vei elaro miarōpe.

Keriso ve ipaisa karu

²⁰ Soka ela Keriso ve ipaisa karu, Ualare sa elave ape o voa ero loki la leipea, Keriso voa e Ualare ita totoeai vei.

²¹ Are iri kaiae ore auke lei meiape, a—, ipi Ualare sa arero lei ereita vei iri kaiae karu leipe, lōfeare vei ereita are voa Ualare ita haura leiti veia.