2 Korinito 4 - Testamenta Áre 1983 (Toaripi PNG)

Pisoso etau saesa‐uko voa

¹ Soka ela mea tivi Ualare ve maeaforoe sa lei ovi roroa, lea vei ela haisora leiti sore.

² Ela maeamariti lei arorisaita mai la mutapi, maeahahauhahau mai auke lei, ela Ualare ve o la apeva o ita kapekapeai sore. A—, okofa la o pisiri mei, ela Ualare ve soso voa elave mai lareva karu foromai ve seseōvaita haiiri voa lōri muia, ere sa elaro maeati vei.

³ Ela sa itoro arita Ovoro Lareva la lei arorisait’ oria, a—, arero opai voa miaraipeta lea karu vei lei arorisai vovea.

⁴ Mea mearovaeka ve ualare sa lei sukaerereai auke leita karu ve ofae la lei kuku lei roroa, ere Ualare kofa ve soso lei meita lea Keriso ve Ovoro Lareva ve sosorusosoru ve ovava la ofae levi eavai vei.

⁵ Ipi elave itoro ve eite elore maea ve kao, a—, Iesu Keriso are Papuvita, aea ela Iesu voa eve tivi karu lei roroa.

⁶ Ipi mea o, Ovava murumuru voa forera haeai vei omoipe Vita Ualare reha, are elave haiiri voa haeōpe, ela Keriso ve soso voa eavaita lea sosorusosoru ve haiore, karu la satiriōri lei ovava leiti veia.

⁷ A—, ela mea pisoso etau lareva la saesa‐uko voa ovi vuapaita feare, ipi siahu rovaeka kofa Ualare voa foreraitore, ela voa kasirau.

⁸ Itai itai foromai voa heafo la leipea; a—, mikokoeaia kao; haiiri horahora la leipea, a—, haisora leitia kao;

⁹ ote karu rauapo ia, a—, elaro hariakao kiripaia kao; mea voa toa putei, a—, opaia kao.

¹⁰ Soa foromai voa ela elave maea voa Iesu ve opai la ovi la roroa, lea vei Iesu ve makuri ta elave maea voa muiai vei.

¹¹ Ipi ela makuri lei roroaita soa, elaro Iesu vei opai voa miara vovea, Iesu ve makuri la elave opaita maea voa muiai vei.

¹² Lōfeare ela voa opai sa tivi lei vovea, a—, e voa makuri sa tivi lei vovea.

¹³ Elave sukaerereaita haiiri are usoso Safu Buka voa uka siseita mea o feare, Ara au sukaererea vovo meiape, aea o lōri moipe, ela ta sukaererea aeata lea vei moi vovea.

¹⁴ Ela ore Papuvita Iesu la moravōpe lea Ualare elaro ta Iesu ita moravai roi, aea elaro ta e ita farehoria areve soso voa lei forerai roi.

¹⁵ Lea etau foromai e vei; karu sitavu haiforoe ve meru la maravi, Ualare la marase arita o la lei rauapo lei arero lei sosorusosoru leiti vei.

¹⁶ Lōfeare vei ela haisora leiti sore. Elave maria ve rofo sisapa vovea, a—, elave iri ve rofo saresare ata áre lei vovea.

¹⁷ Ipi elave utohoa kaleipeta haisora seika sa elaro lei kekese la leipea, seseōvi ore auke lei peita sosorusosoru ve rovaeka kofa la aite soa voa ovai vei.

¹⁸ Ela ofae sa eavai auke leita lea etau la ofae fofoisai vovea, ofae sa eavaita lea etau kao; ipi ofae sa eavaita lea etau ere soasoa ia, a—, ofae sa eavai auke leita lea etau, peita etau reha.