2 Korinito 3 - Testamenta Áre 1983 (Toaripi PNG)

Otoare áre ve tivi karu

¹ Ela elore maea la ata marase auai ei? Ō ela karu haria hea fefeare, elaro maeatita karoro ero miarai vei, aeata e voa ovi karu haria la miarai vei haikaeaitore?

² Elave karoro e reha, eve haiiri voa uka laisisea, karu foromai sa ofae eovi ore lei muti vei.

³ E mōfeare muiaitore, e Keriso ve karoro ela sa ovi miōri, inika sa ukai kasirau, a—, peita Ualare ve Arahoha sa uka laisisea; fave seaea voa ukai kasirau, a—, karu ve haiiri ve susu voa.

⁴ Elave o lōfeare ipi ela Keriso voa Ualare la sukaereaita eavia.

⁵ Elave haiore usoso kasirau ela elore maea sa etau farakeka aea la seseōvai vei, a—, elave haiore rovaea Ualare voa forera vovea.

⁶ Are sa elaro lei haiore lei, otoare áre ve tivi karu leiti vei elaro leipe; buka voa uka siseita safu o voa kasirau, a—, Arahoha voa. Ipi buka ve safu mai karu la paeaitore, a—, Arahoha makuri la miaraitore.

⁷ Soka opai la lei foreraita lea evera Safu O fave seaea voa uka, Ualare ve sosorusosoru ita miarōpe; aea Israela karu Mose ve soso la ofae fofoisaita ore auke leipe ipi areve soso sosorusosoru eavia, eite kaleitita sosorusosoru reha.

⁸ A—, Arahoha voa miōri foreraita o leafeare, are foromai sosorusosoru rovaeka la leipea.

⁹ Ipi karu la kaiae o ōpe lea Safu O sosorusosoru leipe, a—, haura o oita o sosorusosoru rovaea kofa arori voa leititore.

¹⁰ Eite evera sosorusosoru leiape lea Safu faitora sosorusosoru kofa kasirau, ipi mea sosorusosoru áre sa arero ovi aieraipeta eavia.

¹¹ Ipi kaleitita lea etau sosorusosoru leitita, a—, peita lea etau sosorusosoru rovaea kofa la leipea.

¹² Soka ela lōfeare haikaeapeta haiiri ita eavia, ela o ape karōva ita moitore;

¹³ Mose feare kao, areve soso la puta sa aierōpe, Israela karu kaleita sosorusosoru ve tapepa soa la ofae fofoisa sasaukai vei.

¹⁴ A—, ereve haiiri kere leiape, ipi itiiti faitora ere evera otoare la mutita lea mea, lea aieraita puta sasauka eaea vovea, ipi Keriso haria sa ereve iri voa, lea etau la tofapi fareovai roi.

¹⁵ Okofa, itiiti iso sare voa Mose ve Safu Buka la mutita lea meamea aieraita puta ereve haiiri la sasauka vovea.

¹⁶ A—, ere Papuvita voa kerorita lea mea, lea aieraita puta la tofapi fareovaita reha.

¹⁷ Papuvita eite Arahoha reha, aea Arahoha sa lei vovo meita lea oti voa paraea pisiri lei meita soa reha.

¹⁸ Ereita foromai aierai auke leita soso feare ita, Papuvita ve sosorusosoru la ma‐ove voa feare kevaro fei, ereitaro toarōrisa lea ove kofa feare lei forera la roroa, sosorusosoru aea voa pōvi pepepe sosorusosoru aea voa, Papuvita ve Arahoha sa leita mai lōfeare.