2 Korinito 2 - Testamenta Áre 1983 (Toaripi PNG)

¹ Soka ara haiiri seseōvi roroka leitita ero tai haiiri eae ita ata levi forerai vei.

² Ipi ara ero lei haieae leitita, a—, araro hailareva leita karu leisa? Ara lei haieae leitita lea karu haria reha.

³ Ara ukaia lea karoro ve ipi meha, ara sa foreraita lea mea, araro lei hailareva leiti vei haikaeaita lea karu sa araro lei haieae leiti ave; ipi arave sukaerereai meha, arave hailareva voa e foromai ta hailareva leiti roi.

⁴ Ipi ara haisora haieae rovaea ita ovororo sisapa sisapa a’ karoro e vei lōri ukaita, ero lei haiiri hehea leiti vei kao, a—, arave haikakare rovaea e voa, ero lei ore leiti vei.

Maeaforoe kaiae leita karu vei

⁵ Soka karu aea are karu la lei haieae leitita, a—, are araro haria lei haieae leiti kao, a—, ero foromai ta lei haieae itua leitia reha. Arave lōfeare o ve ipi ara haikaeai kao arero o kere ita seravai vei.

⁶ Lōfeare karu vei karu rauapo sa arita lea kaiae o ve tava usoso.

⁷ Faitora mai haria leitia; arero maeaforoe lei, arero rofo leiti vei kureaia, arero haieae rovaeka sa arero ovi aierai ave.

⁸ Lea vei ara ero loki eve haikakare arero ata muiai ore leitia.

⁹ Ara ukaia lea karoro ve ipi meha, ara ero seseōvi, e etau foromai voa kakeva varo lea la ore leiti vei.

¹⁰ E karu aea sa leita kaiae la sasuka mutapaita, a—, ara ta areve kaiae la sasuka mutapai roi. Ipi ara karu aea ve kaiae la sasuka mutapait’ oria, lea ve ipi e vei, Keriso ve soso voa,

¹¹ Satani sa ereitaro ovi aierai ave; ipi ereita areve maeahahauhahau ore fae.

Paulo ve sariva fari

¹² Ara Troasa voa Keriso ve Ovoro Lareva itoro ari vei foreraia soa. Papuvita sa fapaia utape lōvoa eavaia reha.

¹³ A—, arave haiiri lareva kofa leiti kao, ipi ara arave marehari Tito la lōvoa ofae eavai auke eavia. Soka ara erero foforoe o ita kiripi maea lei Makedonia voa ufi foreraia reha.

¹⁴ A—, Ualare la maeatia, elaro Keriso voa ovi aieraita karu feare lariōvi aea areve fari muforoe etau feare ela voa ovi, oti foromai voa fafarapi muiaita lea Ualare.

¹⁵ Ipi ela Keriso ve muforoe fefeare Ualare vei, makuri leipeta lea karu voa, aeata saroapai vei leipeta lea karu voa.

¹⁶ Itai karu vei opai voa itoita mu, erero saroapai vei, itai aea karu vei makuri voa itoita mu, erero lei makuri leiti vei. Mea tivi leiti vei leisa usoso?

¹⁷ Ipi ela karu rauapo fefeare kao, Ualare ve o la ovi o haria ita kapekapeaita lea karu; a—, ipi Ualare sa elaro itapaita lea vei ela okofa ita areve omopa voa laua Keriso voa sukōvō vovea.