2 Korinito 13 - Testamenta Áre 1983 (Toaripi PNG)

Sisa kureaita o aeata maeaforoe o

¹ Oroisori soa meha ara ero tai forerai vei la roi. Etau la ore lei roroaita karu orakoria ō oroisoria ita sa seseōvaita, havara lōfeare okofa lōri leititore.

² Eve evera kaiae leiape karu aea faitora kaiae lei roroaita karu ita la ara everori kureaiape, aea ara sa ero tai forerōpe orakoria soa voa omoiape lea o feare, ara faitora e voa pei auke vei o ta lōfeare la moi, ara ero tai ata foreraita, a—, ara maeaforoe levi leiti roi.

³ Keriso ara ita moita varo, e lea la okofa ore leiti vei haikaea vovea. Are e voa maeapatoita ita leiti sore, a—, siahu ita e voa lei vovo meitore.

⁴ Ipi are maeapatoita lei, arero satauro voa paeōpe; a—, eite are Ualare ve siahu ita makuri lei vovo mea vovea. Ela ta are ita maeapatoita lei la roroa, a—, ero leita lea etau voa ela Ualare ve siahu voa are ita makuri leiti roi.

⁵ E eve mai la seseōvi ore leitia, e sukaerereaita haiiri ita pepeipeta varo, ō pepeia kao varo. E ore kao ei, Iesu Keriso eve iri voa laipea? Lōfeare auke oria, e lea seseōvaita voa usoso kao.

⁶ A—, ara haikaeai e ore leiti vei ela sa usoso ia.

⁷ Ela Ualare la loki la leipea, e kaiae levi leiti vei; lea ve ipi elave elore haura la muiai vei kasirau, a—, ipi ero lei e mai haura leiti vei, ela usoso auke feare leitia varo.

⁸ Ipi ela okofa la sukavuteai vei usoso kasirau, a—, okofa la haria leiti vei.

⁹ Ipi elave maeapatoita voa, e rofo ita roroaita, ela hai itatapa vovea; elave loki farakeka meha, e lareva voa kekese kofa leiti vei.

¹⁰ Lōfeare vei ara e ita pei auke soa voa, mea o ero ukaita meha, ipi ara foreraita soa, Papuvita sa araro miaraita siahu irori mai kere ita ero levi leiti vei, lea siahu ve eite karu la lei asai vei ero toa sukavuteai vei kasirau.

¹¹ Soka, paumarehari e, arave sisa o meha; hailareva leitia; mai lareva voa kekese ita leitia; arave kureaita o la mapaia; haiiri farakeka lei peava; tairu ita roroava; aea haikakare ita tairu ita ve Ualare e ita farehoria pōvi pepe peava roi.

¹² Ualare ve karu evera sisita mai ita elore elore maeaforoe lei omoia.

¹³ Ualare ve karu foromai maeaforoe o ero la moipea.

¹⁴ Papuvita Iesu Keriso ve haiforoe leita meru, aea Ualare ve haikakare ita, aea Safu Arahoha Lareva karu farehoria ita la toari peita mai, e ita forehori lei pepe peava.