2 Korinito 11 - Testamenta Áre 1983 (Toaripi PNG)

Paulo aea apeva aposetolo karu ita veia

¹ Ara haikaeai e arave maeakakare taheka vei araro moraria. A, e araro foforoe au morari vei.

² Ipi ara ta Ualare sa leitita hilisi feare ero la leipea; ipi ara ero vita farakeka vei maietau miarōpe, ara ero morihōva ovava‐eka feare, Keriso la miarai vei.

³ A—, ara tore la leipea, usoso ikaroa sa Eve la mai hahauhahau sa vuteōpe lōfeare, eve seseōvaita haiiri hariaharia sa ero apeva vutea, eve okofa ita ovava ita ve haihahari la hasiōvi, e Keriso la kiripaita varo.

⁴ Karu aea ero tai kōti, ela sa itoro ari auke lea Iesu haria aea la itoro arita, ō e evera ovai auke arahoha haria aea la ovaita, ō e evera mapai auke ovoro aea la mapaita, a—, e arero utohoa ovi kakeva loita reha.

⁵ Arave seseōvaita haiiri meha, ara lea fari koa aposetolo karu ve ipi karu kasirau.

⁶ Itoro oita o voa ara usoso auke leita varo, a—, haiore voa ara usoso kofa. Ela etau foromai voa aea soa foromai voa lea la ero okofa ita muiaiape.

⁷ Ara arave elore maea la lei ipi leipe, ero lei arori voa moravai vei; ara Ualare ve Ovoro Lareva la tava auke ita itoro ape. Ara lōfeare kaiae leiape ei?

⁸ Ara ekalesia firufiru hariaharia voa moni ovi usoso torea etau feare lei peiape, ero itoro oita tivi leiti vei.

⁹ Ara e ita farehoria pea, etau auke leiape lea mea, ara ero heafo leiti kasirau; ipi Makedonia voa pepeita paumarehari sa koti, ara ovai auke leiape lea etau la araro au miaraiape. Etau farakeka aea voa ara ero heafo leiti auke lei meiape, aea ara ta lōri lei vovo meava roi.

¹⁰ Keriso ve okofa sa arave iri voa peipeta lea vei, arave mea hiva la Akaia ve soasoa voa levi poetapai roi.

¹¹ Ipi levea? Ara ero haikakare arai auke leita lea vei ei? Kakaeite! Ualare sa ore ara ero haikakare ara vovea.

¹² Ara leipeta mea mai la ara lei peava roi; lōfeare vei ereve tivi aea elave tivi ita usoso leipeta hiva o lōri arita lea karu ve o la ara toa sasaukai roi.

¹³ Ipi lōfeare karu ere apeva aposetolo karu, lohalai tivi karu, ere maeahahauhahau mai lei, Keriso ve aposetolo feare lei vovo roroaitore.

¹⁴ Lea etau vei haihava levi leitia, ipi Satani, are kofa, areve soso ta toarōrisa, apeva lei ovava ve aneru feare ta forera vovea.

¹⁵ Lōfeare mai ita areve sarufa karu ta soso toarōrisa mai haura karu feare lei roroaitore. A—, ereve aite sisa soa ta usoso ere sa leita mai feare ta leiti roi.

¹⁶ Ara ero ata mō la auai, araro maeakakare feare lea la haiiri lōri levi seseōvaia. A—, e hai lōri seseōvait’ oria, araro maeakakare karu feare moraria, eite ara ta hiva taheka ari roi.

¹⁷ Ara faitora moipeta mea o ara Papuvita ita aria kao, a—, ara maeakakare feare lei, hiva o la aipea.

¹⁸ Karu rauapo maeasarōva etau vei hiva ō vovea, ara ta lōri leiti roi.

¹⁹ E maeakakare karu la au morari vovea, ipi e haiore karu eavia.

²⁰ Karu aea ero lei fasaita sarufa feare leitita, ero maeahahauhahau lei, apeva vuteaita, are maeamarōva leitita, aea eve heva la toaita, a—, e arero au morari vovea.

²¹ Ara maeamariti ita vavavi o mei ela ivara eokere lōfeare leiti vei usoso kao. A—, karu aea sa hiva ari vei maea karōva leitit’ oria, ara ta lōfeare maea karōva leiti roi. Eite ara maeakakare karu feare o la moipea.

²² Ere Heberu karu ei? Ara ta reha. Ere Israela karu ei? Ara ta reha. Ere Abrahama ve meavumōla ei? Ara ta reha.

²³ Ere Keriso ve tivi karu ei? Ara laua maeakakare feare la sukavaipea — ara sa lea tivi voa erero sapatai. Arave tivi pasou rovaea kofa; dibura voa soasoa rauapo fasaiape; araro sarisari savae soasoa rauapo toaiape, opai vei leita soasoa haelarehaelare leiape.

²⁴ Soasoa five voa Iuda karu ere kava pitake sa mai thirty‐nine araro teavi sasape.

²⁵ Soasoa oroisoria ta Roma karu sa araro tola pitake sa teavi sasape; araro ta soa farakeka fave sa toatoa ope. Soa oroisoria voa ara sa foreaiape lea vavaea tohari kaleiape, sare farakeka aeata faita farakeka ita ara mai pisiri voa moea teraia itia lei vovo meiape.

²⁶ Ara sariva rauapo leiape; ara mai rauapo la ufaiape voa heafo leiape, irori ita leita torea karu voa ta heafo leiape, arave elore toruipi karu voa heafo leiape, toru hariaharia karu voa ta heafo leiape, karikara voa heafo leiape, furuka merava voa ta heafo leiape, makaikara voa heafo leiape, apeva paumarehari ta araro heafo leiape.

²⁷ Ara tivi pasou lei lei, maea‐uti sisapi kaleiape; faita soasoa voa haelarehaelare ovoako lei vovo meiape; eroa sa’ kōvōre‐tolo ita lei meiape; larietau auke lei, vevekoko ita puta auke lei meiape.

²⁸ Maeasarōva etau voa haria kasirau, a—, ara haiiri voa ta sare sare foromai haikavora lei vovo meiape ekalesia firufiru la kiva leiti vei.

²⁹ Rofo auke karu leisa vei, ara ta rofo auke loita reha. Karu sa lei safosafoa putei kaiae leita karu leisa vei, ara ta haiiri eae foromai loita reha.

³⁰ Ara hiva arit’ oria, ara arave maeapatoita etau vei hiva ari roi.

³¹ Ualare, ereitave Papuvita Iesu Keriso ve Oa, lareva lei vovo meita lea Ualare, are ore ara apeva o aria kao.

³² Damasko voa lea King Aretasi ve gavana karu Damasko karikara la kiva lei sasaukōpe, araro sukaforai vei.

³³ A—, araro arua rovaea voa vuapi, karikara lōva ve utape seika voa paraea fauka, ara areve mai voa lōri safauka soeōpe.