2 Korinito 10 - Testamenta Áre 1983 (Toaripi PNG)

Paulo ve Aposetolo siahu

¹ Arao, Paulo, Keriso ve haimafu aea areve au morarita mai voa ero la kureaipea. E karu hea ve o ara ero soso tataea sukaeaita lea mea haiiri‐ipi lei meita, a—, ára‐ita peita lea mea ela ivara mai loita reha.

² A—, ara ero loki, ara ero tai foreraita lea mea ara arave ivara mai ero levi muiai vei. Etau farakeka, ela maeasarōva mai ita kerori voa roroaita lea o la moita karu la ara ivara eokere mai ita erero sukavuteaita ore.

³ Okofa ela maeasarōva karu ve otiharo voa roroaita, a—, ela maeasarōva mai ita marehaukaia kao.

⁴ Elave marehaukaita etau maeasarōva etau kao, a—, Ualare ve siahu etau, mare lōva ita otioti la toa foforukai vei.

⁵ Ela karu ve o serea la lei safutea, aea Ualare ve haiore la elapaita mare lōva foromai la toa foforuka, aea karu ve seseōvaita haiiri la fasi Keriso voa lei kakeva leiti vei lariōva vovea.

⁶ Ela haiiri kekese e mapi kakeva kofa leita lea mea, kaeava foromai ve tava miarai vei.

⁷ Eve omopa voa pepeita lea etau la ofae fofoisaia. Karu aea are Keriso ve karu hai lōri kaeait’ oria, are haiiri ata seseōvaia, are sa Keriso ve karu leitita lōfeare, ela ta lōfeare.

⁸ Ipi ara Papuvita sa miaraita elave lea siahu vei hiva taheka rovaea arita, a—, lea hiva vei ara maeamariti leiti roi. Lea siahu ve eite ero turi moravai vei, toa foforukai vei kasirau.

⁹ Hai mō levi seseōvaia, ara arave karoro ero lei tore leiti vei ukai.

¹⁰ Karu hea sa mō aritōva. Areve karoro pasou aea siahu ia, a—, are foreri soso tataeai vei rofo kasirau, aeata areve ape ve o eite kofa kao.

¹¹ Lōfeare haiiri seseōvaita karu ore leitia, ela ára‐ita pepea karoro sa itapi moita o feare, ela ero tai foreri popōvaita soa elave leitita mai ta lōfeare leiti roi.

¹² Ela haiiri usoso kao elave elore maea la ere sa ereve elore maea vei hiva arita lea karu ita fareho topiari seseōvai vei. Ere ereve elore maeapavora ita fareho seseōvi, elore maea usoso o ō vovea. Lōfefeare karu ere haiore kasirau.

¹³ Ela hiva merava auraka levi ari roi; a—, usoso Ualare sa elaro muia miaraita lea tivi ve soa voa sa haria; lea tivi eite e voa foreri la eaea.

¹⁴ Ela elave maea saurapi elave siahu ve soa la lei topiari lei pisasa leitia kao, usoso ela e voa forerai auke feare. Eite ela Keriso ve Ovoro Lareva ita ero tai oarehōva isei forerōpe karu.

¹⁵ Ela elave tivi oti soa la miroapi maria voa, karu haria ve tivi la ovi hiva ari sore; a—, ela taipeta haiiri meha, eve sukaerereaita haiiri sa asaita lea mea, ela soa pisasa rovaea maea aeata e voa lōri ovai roi.

¹⁶ Lea vei ela Ovoro Lareva la eve mea la kiripi isei lea otioti voa ta itoro ari vei, aea karu haria sa tivi lei kekese leita lea oti vei hiva levi ari vei.

¹⁷ A—, usoso Safu Buka ve o feare, Hiva arita lea karu, are Papuvita vei hiva aria.

¹⁸ Areve haria maea la lareva o arita lea karu ve o eite kao, a—, Papuvita sa o lareva arita lea karu maeati kofa reha.