2 Korinito 1 - Testamenta Áre 1983 (Toaripi PNG)

¹ Paulo, Keriso Iesu ve aposetolo, Ualare sa haikaeōpe lea vei, aeata ereitave marehari Timoteo ita sa ukaita karoro meha, Ualare ve ekalesia Korinito karikara voa, aeata Akaia voa pepeita Ualare ve lea karu foromai veia:

² Ereitave Oa Ualare aea Papuvita Iesu Keriso sa miaraita haiforoe leita meru aea tairu ita e voa lei peava.

Omopa O

³ Ereita Ualare la maeatia; are ereitave Papuvita Iesu ve Oa, maeaforoe leita Oa, aea vovoroka kofa leita Ualare.

⁴ Are elave haisora foromai voa elaro rofo leiti vei kurea vovea, ela ta Ualare sa elaro rofo leiti vei kureaita lea o la ovi karu haria la rofo leiti vei kureai vei.

⁵ Ipi ela Keriso ve hehea are ita fareho topiari rovaea leita lōfeare, ela ta rofo leiti vei kureaita siahu Keriso voa rovaea topiari lōri ovai.

⁶ Ela haisora ita roroait’ oria, lea ve eite ero toari lei makuri leiti vei; ō Ualare sa elaro toarait’ oria, lea ve eite ero ta toari lei rofo leiti vei, e ta usoso ela sa roroaita mai feare hehea lei au morarita lea meamea.

⁷ Elave haikaeaipeta haiiri e vei kere la leipea, ipi ela ore e elave lōfeare hehea leitita lea vei, e elaro lei rofo leiti vei kureaita lea siahu ta ovai roi.

⁸ Paumarehari, e, ela haikaeai ela Asia voa leivota lea haisora ve fari la e ore leiti vei; ela haiiri eae pasou rovaeka lei elaro safori, rofo foromai ta veverapi kalei, ela elave makuri vei haisafi kaleivota.

⁹ Elave seseōvavota haiiri ela opai vei, a—, lea ve eite elaro lei, ela elave elore rofo voa levi sesearai vei, a—, elave sukaerereai opai karu la moravaita lea Ualare voa.

¹⁰ Are tore rovaea leita opai voa elaro fareōvi roroka lei, aeata elaro fareōvi lei makuri ta la leipea; elave sukaerereai meha, are aite soa ta elaro ata fareōvi lei makuri leiti roi,

¹¹ e sa Ualare la loki lei elaro lōri toaraita lea meamea. Loki o rauapo voa ela maeaforoe sukaeaita lea vei, karu rauapo ela vei Ualare la maeati roi.

Elave hiva ve ipi

¹² Elave hiva ve ipi meha, aea leita mai la elave lea seseōvaita haiiri sa elaro lei okofa o ō vovea, ela mearovaeka voa aeata eve soso voa safu mai lareva ita aea Ualare sa miaraita haiiri ovava ita roroa vovea, maeasarōva ve haiore ita kao, a—, Ualare sa miaraita haiforoe ita voa.

¹³ Ipi ela o haria la uka ero tai itapai kao, a—, e muti aea eite ore leitita lea o haria. Arave haiiri e faitora itua la ore leita lea etau ve eite la e maeamakora ore leiti vei.

¹⁴ Lea vei e sa ela vei hiva arita ore leiti roi, usoso ela sa e vei hiva ari roi Papuvita ve sare voa.

Sariva laua

¹⁵ Ara lea o la sukaereraia lea vei, arave haiiri ara omopa ufi ero tai forerai vei, ara ero sukaea lei hailareva soa orakoria ero leiti vei.

¹⁶ Ipi arave haiiri ara Makedonia soa voa kavaita sariva voa ero sukaeai vei, aea Makedonia kiripi kerori ero tai ata lōri forerai vei, e sa araro maea favi toari Iudea voa toilalai vei.

¹⁷ Lōfeare haiiri vei ara haiiri titititi arita ei? Arave haiiri usoso mearovaeka karu ve haiiri feare ei, aea ara lea o A, a, aea lea o Kao, kao, soa farakeka auraka auea moi vei ei?

¹⁸ Usoso Ualare sa okofa ita meita lōfeare, ela ta ero moita o, aea A, a, aeata Kao, kao, ari sore.

¹⁹ Ipi arao aea Silasi aea Timoteo ita sa e voa itoro ape Ualare ve lea Atute Iesu Keriso, are A aeata Kao la ari sore; a—, are voa A o la haria omoi vovea.

²⁰ Ipi Ualare ve otoare foromai are voa A o la moitore. Lea vei ereita Amene o are voa moi vovea, Ualare la lei sosorusosoru leiti vei.

²¹ Elaro ero ita la Keriso voa lei kere pōvi, elaro ta tivi leiti vei lei safu leipe lea Vita, are Ualare reha.

²² Are elaro areve rare peise ita sasari, aea miaraita toare etau vei areve Arahoha la elave haiiri voa lei vifarapi la eaea.

²³ A—, ara Ualare la isa okofa la ara vei omoi vei, ara Korinito voa forerai auke ve ipi ara ero maeaforoe leitia lea vei.

²⁴ Ela eve sukaerereaita haiiri ve papukoru kasirau; a—, ela e ita fareho tivi leititore, ero lei hailareva leiti vei; ipi e sukaererea kere lōri soi popōvai vei.