2 Ioane 1 - Testamenta Áre 1983 (Toaripi PNG)

¹ Ara ekalesia opasora vita sa itapaita karoro meha, Ualare sa haikaea ovaita uasora‐apo aeata areve atutemori ita veia. Ara aro okofa ita haikakare lei meitore, aea ara haria kasirau, a—, ovoro okofa la ore leitita lea karu foromai ta reha,

² ipi ereitave iri voa ovoro okofa sa laisisea, aea ereita ita fareho lōri siseava roi.

³ Oa Ualare aea Oa ve Atute, Iesu Keriso ita sa, okofa voa haikakare ita voa, haiforoe leita meru aea maeaforoe aea tairu ita la ereitaro miaraia.

Okofa aea haikakare ita

⁴ Ara hailareva rovaea leipe ipi usoso Oa sa ereitaro omoipe lōfeare, ave atutemori hea okofa voa roroaiape la ara sa ofae eavōpe lea vei.

⁵ Uasora‐apo e, ara lea vei aro loki la leipea, ereita foromai elore elore haikakare leiti veia. Ara aro uka itapaipeta mea o are safu o áre kasirau, a—, ereitaro omopa kofa soa voa omoipe lōfeare.

⁶ Haikakare mai meha, ereita areve safu o voa roroai vei. Lea safu o e omopa soa voa itiiti faitora mapa vovea, e karu foromai haikakare lei vovo roroai vei.

⁷ Lohalai vuteaita karu rauapo mearovaeka voa foreri la roroa; ere Iesu Keriso sa maeasarōva voa foreri meiape lea la ore lei moi sore. Lōfeare karu are lohalai vuteaita vita, aeata Keriso ve Ote Vita.

⁸ E kiva leitia, e sa heafo leiape lea etau etau veverapai ave; a—, e Ualare sa e vei kekese leita lea etau foromai la aite voa maravai vei.

⁹ Keriso sa satiriaraiape lea ovoro voa seseari pavai auke lei, a—, lea ovoro voa o hea au topiaraita karu are Ualare auke ita mea. Lea satiriaraita ovoro voa seseari peita lea karu are Oa aeata Atute ita voa meitore.

¹⁰ Soka karu aea ero tai foreri, aea lea lohalai satiriaraita ovoro ita meita, a—, arero eve uvi voa levi maeafukapaia, aeata eapo o ta arero levi aria.

¹¹ Ipi arero eapo o arita lea karu, areve lea mai kaiae la toaraita reha.

Sisa o

¹² Ara o rauapo aro uka itapai vei ia, a—, ara lea o pepa voa inika sa ukai vei haikaeaia kao. A—, arave haiiri aro tai foreri, soso tataea laua sukōvi, elaka kekese kofa ita hailareva lōri leiti vei.

¹³ Ualare sa haikaea vo meita ave mea moriapo ve atutemori ere maeaforoe o aro la moipea.