1 Timoteo 6 - Testamenta Áre 1983 (Toaripi PNG)

¹ Fasaita tivi voa roroaita sarufa karu foromai haiiri haura ita seseōvi ereve papukaru la taivotaia, Ualare ve rare aea sukaererea satiriaraita lea ovoro la lei maealolo leiti ave.

² Papukaru hea ere Keriso la sukaerereaita karu; a—, ereve o la levi sukavuteaia, ipi ere ta ekalesia karu eavia. A—, ere erero kakeva kofa leitia, ipi ere ereve tivi voa toaraita lea papukaru ere ta Keriso la sukaerereaita aeata haikakare sa leita karu eavia. A mea etau la satiriaraia aeata itoro aria.

Satiriaraita apeva o aeata pisoso etau kofa

³ Karu aea etau haria la satiriōri, aea ereitave Papuvita Iesu Keriso ve ovoro okofa, aea Ualare sa haikaeaita mai ita haiiri la usoso auke leitit’ oria,

⁴ are maeamarōva sa lei fefesita haiiri karu. Are etau aeata ore kakaeite; are ava’ o serea ita lalasi o ita mei vei auraka haikaeai moi vovea, aea lōfeare vei mea etau sa forera forera auai: hilisi, ape sosori, ape laua maeamariti, haiiri maealolo,

⁵ aea maealolo seseōvaita haiiri, aea ere okofa la kiripaita lea vei, ereve o serea elore elore eite kasirau. Ere hai mō kaeaitore Ualare sa haikaeaita lea mai etau rauapo la maravaita mai reha.

⁶ Eite Ualare ve mai la leita, aea haiiri lareva ita meita mai, are pisoso etau rovaea.

⁷ Ipi ereita etau aea ita mearovaeka voa forerai kasirau, aea ereita mearovaeka kiripi etau aea la ovi soeaita lea ta ore kasirau.

⁸ A—, ereita larietau aea puta ita la maravaita lea vei ereita hailareva ita roroai vei, mai lareva reha.

⁹ Moni rauapo la haikaeaita lea karu vuteaita mai voa, aeata fitōva voa, aea sarōva sa haikaeaita maeakakare etau voa, aea hasiavaita etau voa oaitore, aea lea mai sa karu la lei ma isoseai feare lei saroroapi veverapaitore.

¹⁰ Ipi moni la haikakare leita mai kaiae hariaharia foromai ve likilea are reha; aea karu hea lea etau la maravai vei saurapi, ere sukaerereaita o la sukavutea, ereve elore haiiri la lei haisora leita etau rauapo sa suka faropa faropa a’ laepepea.

Lei rofo leita ovoro

¹¹ A—, ao, Ualare ve karu e, lea etau la kiripi soeaia; haura leita mai, Ualare sa haikaeaita mai, sukaerereaita haiiri, haikakare, lula auke haiiri kere aeata haimafu, lea etau la haikaea lei vovo meava.

¹² Sukaerereaita haiiri ve mare lareva haukaia; peita makuri la ovaia, a lea makuri la ovai vei Ualare sa aro isōpe, a aruru karu rauapo ve soso voa ave haiiri ve tava o lareva la moipe lea mea.

¹³ Etau foromai la lei makuri leita lea Ualare ve soso voa, aeata Keriso Iesu, o lareva la Pontio Pilato ve soso voa moipe lea Vita ve soso voa ara aro la kureaipea,

¹⁴ ara aro hai sa moita mea o la maealolo auke ita aea maeamariti o auke ita kakeva kofa leitia, soa tetete ereitave Papuvita Iesu Keriso sa foreraita soa voa.

¹⁵ Soa kofa voa Ualare sa arero lei forerai roi, lea Ualare are haria sa Harofave Vita lareva lareva‐eitapo, king foromai ve King, papukaru foromai ve Papuvita;

¹⁶ are haria sa makuri lei pea vovea, karu sa haekao voa foreraita ore auke leitita lea ovava voa, karu sa ofae eavai auke leita, aea karu sa ofae ruri vei ore auke leitita lea Ualare. Maeatita o aea soa sarapai auke leitita basileia ve siahu are voa lei peava. Amene.

¹⁷ Soka mea mearovaeka ve pisoso karu la o kere ita moia ere maeamarōva levi leiti vei, ere taita haiiri la soa savori sisei auke leitita pisoso etau voa levi sesearaia, a—, Ualare voa are sa etau foromai la ereitaro lei hailareva leiti vei miara vovea.

¹⁸ Erero ta moia, ere mai lareva voa, meru lōfoa lōfoa lei miōri, pisoso kofa fefeare toea, totōpo auke lei, etau au aioraia.

¹⁹ Lōfeare voa ere ereve pisoso etau fefeare everori kokoruka kekese lei, forerai vei leita soa voa maravi, ere makuri kofa la lōri ovai roi, makuri ve eite kofa reha.

²⁰ Timoteo e, a sa ofae eavai vei aro miarōpe lea etau la a kiva kofa leitia. O maealolo aea maeakakare laua aea apeva o oita lea haiore la kōutoa meava.

²¹ Lōfefeare karu hea lea la malasa lei, Keriso la sukaerereaita lea mai la lei veverapi la roroa. Haiforoe leita meru e ita lei peava.