1 Timoteo 5 - Testamenta Áre 1983 (Toaripi PNG)

Ekalesia karu hariaharia la leita mai

¹ Omopa sora karu la o kere levi moia, a—, arero oa feare kureaia. Aite karu la usoso maraiosu fefeare leitia,

² omopa sora uamori ta louita fefeare, ua áre uamori ta uarosu fefeare, haiiri ovava kofa ita leitia.

³ Ua lelesi lelesi la maeaforoe ita taivotaia, ere sa ua lelesi ve mai kofa la leitit’ oria.

⁴ A—, ua lelesi aea are atutemori aeata meavusu ita oria, a—, erero lei ore leitia, Ualare la taivotaita omopa kofa etau meha, ere ereve elore toruipi la kiva lei, ereve oa ita lou ita sa erero savuaiape lea tava erero ata kerori miarai vei, ipi Ualare ve soso voa haikaeaita mai kofa reha.

⁵ A—, hariakao peita ua lelesi kofa, are Ualare la taita haiiri ita arero toaraita mai vei sare ita faita ita loki o ita veveu lei vovo mea vovea.

⁶ A—, areve maea sa mavauapa vovo meita lea ua lelesi, are makuri lei peita, a—, eite are opai voa mea vovea.

⁷ Lea o erero haisa kurea moia, ere kaiae auke lei vovo roroai vei.

⁸ Areve elore toruipi karu la kiva auke lei, aea areve uvi karu la savuai auke leita lea karu, are Keriso la sesearaita mai la lōfeare sa avoa a’, aea areve kaiae ekalesia auke karu ve kaiae la sapatai.

⁹ Ua lelesi ve rare la levi ukaia tetete areve makuri ve sisoro sixty orapai ao. Are ta vita farakeka sa laea meiape ua,

¹⁰ fari lareva ua ipi areve leita mai lareva eavia, areve atutemori la kiva lei savuaita ua, sariva karu ve opa la sasauka maeafukapaita ua, ekalesia karu ve mora la maukaita ua, haisora ita roroaita karu la toaraita ua, aea leita mai lareva voa haihahari leita ua; lōfefeare vei areve rare la ukaia.

¹¹ A—, ua áre ua lelesi lelesi rare la lea rare voa ukai vei haiarara leitia; ipi ereve haikaeaita haiiri sa erero lei, ere Keriso la kiripi, vita aea sa ata laeai ave.

¹² Lōfeare leitita, a—, erero seseōvi kaiae o ari roi, ipi ere ereve evera otoare la hasiavaita eavia.

¹³ Aeata meha, ere tivi auke mai la malasa lei, uvi hariaharia voa mora kakeva lei, ere tivi kiripi ape sukōva sukōva mai la malasa lei, auraka auea kerori vo roroa, ere levi moi o oita o la ape veivei a’ sukōvō vovea.

¹⁴ Lea vei ara haikaeai ua áre ua lelesi lelesi ere vita laea, atutemori epi ereve lea uvi karu la kiva leiti vei; lōfeare vei ereitave ote karu havara paraeai vei uta levi sukaeai roi.

¹⁵ Ipi karu hea otiharo kofa la kiripi, Satani la aitetei roroa vovea.

¹⁶ Keriso la seseari meita ua aea, areve elore maeapavora karu hea ua lelesi lelesi lei roroait’ oria, are sa erero kiva leitia, ekalesia la ereve pasou sa lei levi saforaia. Lōfeare vei ekalesia ua lelesi lelesi kofa la kiva leitita ore.

¹⁷ Lariōvaita tivi lareva leita omopa sora karu la taivotei aeata tivi tava usoso miaraia, aea ere itoro a’ satiriara vovo roroait’ oria, tava maea aea ata topiaraia.

¹⁸ Ipi Safu Buka ve o mōfeare: Uiti fare ruru la lei sisapai vei mora sa pataita boromakao ve ape la levi fasi kavuaraia; o aeata meha, Tivi karu ereve tivi tava ovaita haura reha.

¹⁹ Okofa la ore lei moita karu orakoria ō oroisoria auke leitita, a—, omopa sora karu la paraeaita lea havara la levi mapaia.

²⁰ Kaiae lei malasa leitita karu la karu foromai ve soso voa o erere aria, ereve firu karu la lōri lei tore leiti vei.

²¹ Ualare aea Papuvita Keriso Iesu aea haikaea ovaita aneru ita ve soso voa, ara aro haisa la moipea, mea kureaita o la mapi, evera kekese leita haiiri auke ita aea karu ve soso o ari auke ita kakeva lei lōri leitia.

²² Ekalesia ve tivi leiti vei, karu la mai sa utohoa levi mopaia. A karu haria ve kaiae voa levi topiaraia; ave elore maea la haura lei vovo meava.

²³ Ma la haria levi laria, a—, ave ére vei aea ave haelarehaelare leitita eka vei, uaina hiake ta laria.

²⁴ Karu hea ve mai kaiae pisiri lei muiaitore, tetete seseōvi tava miaraita oti voa; a—, karu hea ve kaiae la aite voa eovi ore leiti roi.

²⁵ Mai lareva ta lōfeare; hea pisiri lei muiaitore, a—, erero lōfeare muiai auke leit’ oria, erero milafukai vei ore levi lei peava roi.