1 Timoteo 4 - Testamenta Áre 1983 (Toaripi PNG)

Satiriaraita apeva papukaru

¹ Soka Ualare ve Arahoha o pisiri ita o mō auai, aite soa voa karu hea apeva vuteaita arahoha hariaharia aea karisu hariaharia ita ve o la mapi kakeva lei, Keriso la sukaerereaita mai la lōri haiarara lei kiripai roi.

² Satiriaraita apeva papukaru, ereve seseōvi ore leita haiiri la a eaita auri hehea ita sa Diabolo ve peise la sasaraita feare lei roroava roi.

³ Ere vita ita ua ita laeaita mai la o erere a’, aea larietau hea ta avoha leita o la moi roi; lea larietau Ualare sa pisosipe ipi sukaererea aea okofa la ore leita karu sa maravi, Ualare la maeatita o mei roroka lei, lōri lari vei.

⁴ Ipi Ualare sa pisosiape etau foromai ere lareva, ere avoha etau kao, karu sa erero Ualare la maeatita o ita maravait’ oria.

⁵ Ipi Ualare ve o aea veveu o ita sa lea laloita etau etau la lei ovava leititore.

Keriso Iesu ve tivi vita lareva

⁶ A sa mea o paumarehari la lei ore leitit’ oria, a Keriso Iesu ve tivi vita lareva lōri leiti roi, Iesu la sukaererea aea satiriaraita o lareva a sa everori seseari meita lea o sa aro savuai roi.

⁷ A—, ualare laua merava aea ua‐avai‐avai sa sukavaita lea fari la haiarara lei sukavuteaia. Ualare sa haikaeaita mai la leiti vei, ave maea sa haisa vo meava.

⁸ Ipi maea rofo leiti vei haisa leitita taheka haria sa lareva, a—, Ualare sa haikaeaita mai la leiti vei etau foromai voa lareva lareva‐eiteapo, ipi are otoare lareva ia, mea faitora makuri vei, aea aite soa voa forerai vei leipeta makuri ta reha.

⁹ Lea o are okofa aea karu foromai sa sukaerereaita lareva reha.

¹⁰ Lea vei ereita tivi serea ita lei rofo miara vovea, ipi ereita makuri lei peita Ualare la au taita eavia. Are karu foromai la fareōvi lei makuri leita Ualare, aea lōfeare sa etau rovaea kofa reha mapi sukaerereaita karu vei.

¹¹ Lea o la haisa mei karu la satiriaraia.

¹² Karu farakeka aea aro heavita áre o a’, haiarara levi leitia. A—, o voa aeata leita mai voa aea haikakare voa, aea sukaerereaita haiiri voa aea ovava mai voa, meita mai kofa la a sa erero muia ere ta lōri leiti vei.

¹³ Veveu voa Safu Buka muti, itoro a’, ovoro la satiriarai vei haikaea vo meava tetete ara forerai roi.

¹⁴ Peroveta karu sa moipe o, aea opasora‐sora ereve mai sa aro mopōpe lea soa voa aro miarōpe lea haiforoe leita meru la haisafi kiripi levi meava.

¹⁵ Lea etau la lei lei malasa kofa leitia, erero leiti vei ave maea rofo miaraia, aea karu foromai ave rofo sa asaita mai la lōfeare eovi ore leiti vei.

¹⁶ Ave elore leita mai aea ave satiriaraita o ita la kiva lei vovo meava. A lōfeare leitit’ oria, a ave elore maea, aea aro mapaita karu ita la lei makuri leiti roi.