1 Timoteo 3 - Testamenta Áre 1983 (Toaripi PNG)

Ekalesia la lariōvaita karu metameta

¹ Mea o okofa: karu aea ekalesia la lariōvaita tivi leiti vei haikakare leitita, a—, are tivi lareva la haikaeaita reha.

² Soka ekalesia la lariōvaita vita, are kaiae auke ita meita lareva reha; are ta ua farakeka ve vita, aeata haisukafori meita karu, haiore karu mai kofa la lei meita karu, karu la sasauka maeafukapaita karu, karu la satiriarai ore kofa leita karu.

³ Are ma maealolo la’ la’ maeakakare leita karu kao, are sosori muru karu kao, a—, haimafu ita aea totoeaita la haikaea vo meita karu. Are moni la haikakare araita karu kao.

⁴ Are areve uvi karu la kiva lareva leita karu, are areve atutemori ta lei ere arero mapi taivotai vei.

⁵ Ipi karu aea areve elore uvi karu la kiva leiti vei ore auke leitita, a—, are Ualare ve ekalesia la kiva leafeare leiti roi ei?

⁶ Ekalesia áre karu la mea lariōvaita tivi leiti vei levi ovaia, are maeamarōva lei, aea Diabolo la seseōvi kaiae o ōpe lea tava ta ovai ave.

⁷ Areve fari ta lareva karikara voa, karu hea havara arero paraea, aea are Diabolo ve fitōva voa lōri ferovai ave.

Diakono karu

⁸ Diakono ta lōfeare: ere ta haiiri sora karu, uri lakalaka karu kao; ma maealolo rauapo la loloita karu kao; moni la haikakare ita meita karu kao.

⁹ Ere ovoro la sukaererea, areve eite ve hohore la seseōvi ore leita haiiri ovava ita voa sesearai vei.

¹⁰ Soka lōfeare karu la seseōva vovo roroai ao; ere kaiae auke ita roroaita, a—, ere diakono tivi lōri leiti roi.

¹¹ Uamori diakono ta lōfeare, ere haiiri sora uamori, ape meimei arita uamori kao, a—, haisukafori roroaita uamori, etau foromai voa mai kofa leita uamori.

¹² Diakono karu are ua farakeka ve vita leiti vei, areve atutemori, areve uvi karu ita la kiva lareva lei vovo moita karu.

¹³ Ipi diakono tivi haura ita leita lea karu are ereve karu firu voa rare lareva la ovi, aea are Keriso Iesu voa areve lea sukaerereaita haiiri vei o ape karōva ita omoita ore.

¹⁴ Arave haiiri sare rauapo kao ara aro tai forerai roi, a—, ara mea o a vei la ukaipea ipi

¹⁵ ara sa si leitit’ oria, a ore leiti roi ereita Ualare ve uvi karu firu voa mai leafeare leiti vei; makuri lei peita Ualare ve ekalesia, okofa ve savoro aeata ipi oti ta reha.

¹⁶ Okofa‐kofa‐eite, ereitave Ualare la taivotaita ovoro are hohore o rovaea kofa: Are maeasarōva lei pisiri voa muia, Arahoha sa are vei haura o a’, aneru sa arero ofae eavōpe. Torutoru karu ve aru voa o are vei itoro a’, mearovaeka voa mapi sukaererea, sosorusosoru voa arero fareōvi pataipe.