1 Timoteo 2 - Testamenta Áre 1983 (Toaripi PNG)

Veveu leita mai

¹ Soka arave omopa kofa haikaea moi ve o meha: Ualare la loki o, aea lalasi o, veveu o ita lei arero maeatia ipi karu foromai vei;

² aeata king vei aeata harofave karu foromai vei. Lōfeare voa ereita Ualare la taivotei haisukafori ita lei, lareva ita tairu ita lei vovo roroai vei.

³ Ereitaro fareōvi makuri leita Ualare ve soso voa lareva aeata haikaeaita mai reha.

⁴ Areve haikaeaita haiiri meha, karu foromai la fareōvi makuri leiti vei aeata okofa la ore leiti vei.

⁵ Ipi Ualare are farakeka, aea Ualare karu ita ve aru voa lei totoeaita Vita are ta farakeka, lea karu eite Keriso Iesu reha.

⁶ Are areve elore maea la karu foromai ve tava vei miōri, Ualare ve haikaeaita haiiri la soa kofa voa okofa ita lōri lei muiōpe.

⁷ Lea vei are ara itoro karu aeata aposetolo karu leiti vei araro itapōpe, toru hariaharia karu la satiriōri ere okofa la ore lei sukaerereai vei. Ara moipeta mea o apeva kao, are okofa.

⁸ Soka e veveu leiti vei kokorukaita lea meamea, ara sa haikaeaita mai meha, karu taivotaita haiiri ita, kitou auke, o serea auke ita ereve mai oraka moravi Ualare la loki lōri leiti vei.

⁹ Haikaeaita mai aeata meha, uamori areve maea la puta maeamarōva auke ita haisukafori mopaia, a—, tui pete toa, aea gold ita isave fare moupa ita, aea tava rovaea puta ita la mopi levi kokorukaia.

¹⁰ A—, leita mai lareva la moupa feare araia; usoso Ualare la taivotaita uamori sa leita lea mai fefeare.

¹¹ Uamori ape o auke ita lei haiiri kakeva ita ovoro la mapi ore leitia.

¹² Ara haikaeai kao satiriaraita tivi uamori la miarai vei, ō ere vita heaea voa harofave siahu ta ovai vei; a—, ere o karakara auke ita pepei vei.

¹³ Ipi Ualare sa Adamu la omopa pisosipe, aea aite voa Eve.

¹⁴ Adamu la apeva vuteai kao, a—, ua la apeva vutea mai kaiae karu lōri leipe.

¹⁵ Eite, uamori sukaerereaita haiiri aea haikakare ita safu mai voa haisukafori lei vovo roroaita, a—, ere atutemori la epi epi erero ta fareōvi makuri lōri leiti roi.