1 Timoteo 1 - Testamenta Áre 1983 (Toaripi PNG)

¹ Paulo, Keriso ve aposetolo, ereitaro fareōvi makuri leita Ualare aea Keriso Iesu, ereita haikaea au tai vo roroaita lea Papuvita sa moipe lea vei, ara sa itapaita karoro meha;

² Papuvita la sukaerereaita haiiri voa arave atute kofa, Timoteo veia. Oa Ualare aea Papuvita Keriso Iesu ita sa haiforoe leita meru aea maeaforoe aea tairu ita la aro miarai peava.

Kureaita o ovoro apeva vei

³ Ara Makedonia voa kavōpe lea mea, ara aro loki leipe a Efeso voa serei pavai vei. Arave haiiri lōfeare ipi a karu hea la haisa mei, ere ovoro haria la levi satiriarai vei,

⁴ aea ualare laua merava aea papa‐ita ve rare rare ve laua sasairi ita la haiiri levi seseōvaia. Ipi lea etau voa o serea elore elore foreri, aea Ualare ve tivi la toarai sore. Sukaerereaita haiiri sa haria lea tivi la toaraita ore.

⁵ A—, arave haisa moita lea o ve eite haikakare reha, sirisiri auke haiiri aea seseōvaita haiiri haura aea sukaerereai kofa leita haiiri ita sa lei foreraita lea haikakare.

⁶ Karu hea otiharo foapai feare lei, ape laua merava la sukōvō vovea.

⁷ Ere Mose ve Safu O la satiriaraita papukaru leiti vei haikaeaitore, a—, ere moita o ve eite aea ere o serea ita moita lea etau etau ve ipi la ere haiiri ovava leiti sore.

⁸ Soka ereita ore Safu O are lareva ia, karu arero ovi mai kofa ita leitit’ oria.

⁹ Lea ve eite, safu mai ve ipi haura karu vei kasirau, a—, safu miroapaita karu, aea kaeava karu vei, Ualare la tore auke lei kaiae lei roroaita karu vei, mai maealolo karu vei, safu haveva karu vei, oa‐ita aea lou‐ita la paeaita karu vei, karu la paeaita karu vei,

¹⁰ herei karu vei, heavita oraka elore maea heorukaita karu vei, karu la torea leita karu vei, apeva vuteaita karu vei, otoare apeva arita karu vei, aea satiriaraita o haura la sukavuteaita karu hariaharia vei.

¹¹ Lea satiriaraita o haura are lareva‐eiteapo Ualare ve sosorusosoru ve Ovoro Lareva ve o reha, aea are mea Ovoro Lareva la araro miarōpe ara arero itoro ari vei.

Ualare ve maeaforoe

¹² Ara siahu mea tivi vei araro miarōpe Vita, ereitave Papuvita Keriso Iesu la maea la atipea, ipi are araro sukaererea, mea tivi leiti vei araro haikaea ovōpe.

¹³ Eite ara evera soa arero o maealolo ape vita, aeata arero hasiōvi, ivara eokere mai leiape vita. A—, are araro maeaforoe leipe, ipi ara lea mai la sukaerereai auke haihaveva ita leiape eavia.

¹⁴ Aeata ereitave Papuvita ve haiforoe leita meru rovaeka kofa arave iri voa lei, ara sukaerereaita haiiri aea haikakare ta ovōpe Keriso Iesu voa.

¹⁵ Mea o are okofa aea karu foromai sa sukaerereaita lareva reha: Keriso Iesu mearovaeka voa forerōpe iri kaiae karu la fareōvi makuri leiti vei; lea iri kaiae karu ve maealolo rovaeka vita kofa ara meha.

¹⁶ A—, Keriso Iesu araro maeaforoe mea vei leipe: are areve morarita mai foromai ara voa evera muiai vei; aite soa voa karu hariaharia sa arave maea la ruruia arero sukaererea aea peita makuri lōri ovai roi.

¹⁷ Soasoa foromai voa peita King, opai auke ita, karu sa eavai auke lei, peita lea Ualare farakeka la maeati sosorusosoru ita lei peava. Amene.

¹⁸ Arave atute Timoteo e, usoso oarehōva soa voa a vei moipe lea peroveta o feare la ara aro tai ata haisa mei itapaita meha, a lea o la ovi mare lareva haukai vei,

¹⁹ sukaerereaita haiiri aea seseōvaita haiiri haura ita voa seseari kere ita meava. Karu hea lea haiiri la sukavutea, aea sukaerereaita lea ovoro voa ere usoso vavaea toharaita karu feare lei la roroa.

²⁰ Humenaio auka Alesana ita ta lea karu voa; ara ereukaro Satani voa miarōpe, ereukaro satiriōri, ereuka kaiae o Ualare ve rare la levi ata ari veia.