1 Tesalonika 5 - Testamenta Áre 1983 (Toaripi PNG)

Papuvita ve kotita soa vei kekese leitia

¹ A—, paumarehari e, lea etau ve forerai soa aeata pisahu ita leasauka ara o ero ukai vei eite kasirau.

² Ipi e elore maea ore kofa Papuvita ve Sare forerai roi usoso torea karu sa faita soa voa foreraita feare.

³ Karu o mō ari roi, Tairu aea lareva ita ve soa meha, a—, eite saroroapaita soa sa erero tai utohoa forerai roi, usoso ére ovaita ua sa avasa patei leitita hehea feare, aeata ere sa safaukaita ore levi leiti roi.

⁴ A—, paumarehari e, e murumuru voa pepei sore; lea vei lea Sare usoso torea karu sa sukaforaita feare ero lei haihava levi leiti roi.

⁵ E foromai ovava ve atutemori aea sare soa ve atutemori; ereita faita ve karu kao aeata murumuru soa ve karu kao.

⁶ Soka ereita ivutu levi iroropaia, maria voa roroaita karu fefeare; a—, ereita ovoako lei, haiiri ovava ita lei vovo roroava.

⁷ Ivutu siseita karu faita soa voa ivutu iroropaitore, aeata ma maealolo loloita karu ere faita soa voa ma maealolo la’ la’ maeakakare araitore.

⁸ A—, ereita sare soa ve karu, lea vei ereita haiiri ovava lei vovo roroava; ereita sukaerereaita haiiri aea haikakare ita ve haiposa aieraita maola auri la haisoropi, aea fareōvi makuri leita soa la au taita haiiri la usoso maola kepakepa feare topaia.

⁹ Ipi Ualare ve haiiri ereita vei mōfeare, ereitaro lei areve kitou seseōvi tava miaraita soa voa levi forerai vei, a—, ereitaro fareōvi makuri leiti vei ereitave Papuvita Iesu Keriso voa.

¹⁰ Are ereita vei opōpe; lea vei ereita makuri varo opaita varo, are sa foreraita lea soa, ereita are ita farehoria popōvai roi.

¹¹ Lea vei e elore elore lei rofo lei elore elore toaraia, usoso e faitora leipeta lea mai feare.

Sisa ovoro aeata o foroe

¹² Soka paumarehari e, ela ero loki eve aru voa tivi leipeta aea Papuvita ve rare ita eve harofave karu lei ero satiriaraita lea karu la taivotaia.

¹³ Ipi ere sa leitita lea tivi vei erero taivotei kofa lei erero haikakare araia. E elore elore tairu ita roroava.

¹⁴ Paumarehari e, ela mea etau vei ero o serea ita haisa la moipea; tivi paraea au roroaita lea karu la kureaia, haiiri tivutivu karu la lei rofo leitia, rofo auke karu la toaraia, aea karu foromai la moraria.

¹⁵ E kiva leitia, mai maealolo vei tava maealolo la karu farakeka aea sa levi miaraia, a—, mai lareva la leiti vei haikaeaia, eve elore elore karu vei aeata karu foromai vei.

¹⁶ Hailareva lei peava;

¹⁷ Ualare la loki poetapai auke ita lei peava;

¹⁸ etau foromai vei Ualare la maeati peava; ipi Ualare e sa leiti vei haikaeaita mai reha Keriso Iesu voa.

¹⁹ Safu Arahoha sa leita mai la levi sukelapaia;

²⁰ peroveta o la levi sukavuteaia;

²¹ a—, etau foromai la seseōvi okofa la ore leitia. Etau lareva la mai kere paeaia;

²² kaiae leita mai hariaharia foromai la haiarara lei kiripaia.

²³ Tairu ve Ualare, are kofa sa ero lei areve karu leiti vei, aea eve arahoha ove ita maea ita maeamakora la kiva lei, e kaiae auke leiti roi, ereitave Papuvita Iesu Keriso sa kotita soa voa.

²⁴ Ero isaita lea Ualare mai lōfeare leiti roi; e ta arero sukaerereaita ore.

²⁵ Paumarehari e, ela vei Ualare la loki lei peava.

²⁶ Ualare ve karu evera sisita mai ita paumarehari foromai la maeaforoe lei omoia.

²⁷ Ara Papuvita ve rare ita ero haisa moi, e mea karoro la paumarehari foromai ve omopa voa muti veia.

²⁸ Ereitave Papuvita Iesu Keriso ve haiforoe leita meru e ita farehoria lei peava.