1 Tesalonika 4 - Testamenta Áre 1983 (Toaripi PNG)

Ualare la lei hailareva leita mai

¹ Soka paumarehari e, hohoi o meha: Papuvita Iesu ve rare voa ela ero kurea, ero loki serea ita leitita o aeata ia. Ualare la lei hailareva lei vovo roroaita lea mai la ela ero satiriōri, e ore lei lōfeare la roroa. Etau farakeka lea mai voa rofo foromai leitia.

² Ipi ela Papuvita Iesu ve siahu ita ero kurea moivota lea o e ore.

³ Ualare sa haikaeaita mai meha, e safu mai la lei, herei mai la kaifa leiti vei.

⁴ E heavita farafarapo elore elore ua la safu mai ita, fari lareva ita laeai vei,

⁵ herei ita haihahari mai ita kao, usoso torutoru karu, Ualare la ore auke leitita lea karu fefeare.

⁶ Lea uamori ita leita mai voa karu aea areve maeapavora la lei kaiae lei arero apeva sa levi vuteaia; ipi lea mai foromai la leitita karu la Papuvita sa tava miarai roi, usoso ela sa omopa o mei ero o kere ita kureavota lōfeare.

⁷ Ipi Ualare ereitaro uamori ita herei mai leiti vei isai kasirau, a—, safu mai la lareva ita leiti vei.

⁸ Soka mea satiriaraita o la haiarara lei sukavuteaita lea karu, are karu la sukavuteai kao, a—, areve Safu Arahoha la ero miaraita lea Ualare la sukavuteai.

⁹ Soka, paumarehari la haikakare araita o la ela ero levi uka miarai roi, ipi e elore elore haikakare araita mai la Ualare sa ero satiriarai roroka.

¹⁰ Eite e paumarehari foromai la Makedonia foromai voa haikakare lei vovo la roroa; a—, paumarehari e, ela ero kurea mō aipea, lōfeare mai la lei rovaea leitia.

¹¹ E haiiri foromai ita karu voa tairu lei vovo roroava, eve elore elore etau maeamaea vei haikaeaia, aeata tivi eve elore mai sa leitia, ela sa ero haisa moita lea o feare.

¹² Lōfeare vei maria voa roroaita karu sa ero maeati roi, aeata e merava levi leiti roi.

Papuvita ve foreraita soa

¹³ Soka paumarehari e, elave haiiri meha e opaita karu vei haveva levi leiti vei, aeata e haiiri eae ta levi leiti vei, usoso Keriso la taita haiiri auke ita roroaita lea karu fefeare.

¹⁴ Ereitave sukaerereaita haiiri meha: Iesu opōpe, a—, are ata itoipe. Soka Iesu voa opi siseita lea karu la Ualare sa Iesu ita lariōvi makuri voa oropai roi.

¹⁵ Ipi ela sa ero faitora satiriaraipeta mea o are Papuvita ve o: Papuvita sa kotita soa voa ereita mearovaeka voa pepeita karu opaita karu ve omopa levi sasaukai roi.

¹⁶ Ipi Papuvita isaita i ita, harofave aneru ve ape‐i ita, Ualare ve u ita kauri voa fauka forerai roi. Keriso la sukaererea lōri opaita lea karu omopa itoteai roi;

¹⁷ lea ve aite voa ereita mearovaeka voa makuri pepeita karu, ere ita topiari, farehoria Papuvita la sukaeai vei mea‐e voa fari maravi papatavai roi. Lōfeare ereita Papuvita ita fareho popōvi pepe peava roi.

¹⁸ Lea vei e mea o la haisukafori kaea elore elore rofo leiti vei kureaia.