1 Tesalonika 3 - Testamenta Áre 1983 (Toaripi PNG)

¹ Ela ero eavai auke lei, haisora rovaea lei roroaia lea mea, ela haiiri kekese leitita elaka karu oraka Atena voa auka sesearavi popōvi,

² aea elakave marehari, Timoteo, Keriso ve Ovoro Lareva voa elaka ita fareho Ualare ve tivi leita karu la ero tai itapi kavai vei, ero lei rofo lei eve sukaerereaita haiiri la toarai vei,

³ e karu aea mea hasiavaita etau sa lei lulalula levi ari vei. Ipi e elore maea ore kofa lōfeare hasiavaita soasoa ereitave makuri lei vovo roroaita mai ve itai aeata reha.

⁴ Ela e ita fareho pepeavota soa, ela ereitaro hasiavaita soa forerai vei leivota o la ero everori omoivota, aea usoso eve lea ore feare mai ta lōfeare foreri leivota reha.

⁵ Ipi lea etau vei, ara haikavora foromai leitia lea soa, ara Timoteo la itapaia reha, eve sukaererea vo roroaita haiiri la ore leiti vei, diabolo sa ero vuteaita varo aea elave tivi ve eite lōfeare sa lei veverapai ave.

⁶ A—, faitora Timoteo ero kiripi ata kerori koti, hailareva leita fari eve sukaerereaita haiiri aea eve haikakare vei elakaro omoita meha; areve o aeata meha, e soa foromai hailareva haiiri ita elaro haikaeai vovea, aea ela sa ero ofae eavai vei iruri aipeta feare, e ta elaro ofae eavai vei iruri ō vovea.

⁷ Lōfeare vei, paumarehari e, ela elave heafo aea haiiri eae foromai ita voa haiiri ata rofo la leipea ipi e sa sukaererea vovo roroaipeta lea vei.

⁸ E Papuvita voa kere pepeipeta lea vei ela ta makuri kofa lei pepea.

⁹ Ela Ualare la leafeare o sa maeati vei? Ipi ela Ualare ve soso voa e vei ovaita hailareva foromai lei,

¹⁰ faita ita sare ita arero loki lei vovea, ela e ita soso tataea ero lei eve sukaerereaita haiiri voa e sa ovai auke etau la ero miarai vei.

¹¹ Soka ereitave Oa Ualare, are kofa, aea ereitave Papuvita Iesu sa elave otiharo la lariōvi ela ero tai kei forerai vei.

¹² Papuvita sa ero lei, e elore elore vei aea karu foromai ita vei eve haikakare la lei asi rovaea leitia, usoso ela sa ero haikakare leitita feare.

¹³ Lōfeare vei are eve haiiri foromai la lei rofo leiti roi, aea e ereitave Oa Ualare ve omopa voa safu mai lareva voa kaiae auke ita lei vovo roroava roi, ereitave Papuvita Iesu, areve safu karu foromai ita kotita lea mea.