1 Tesalonika 2 - Testamenta Áre 1983 (Toaripi PNG)

Paulo ve tivi Tesalonika voa

¹ Paumarehari e, e elore maea sa ore, ela ero tai foreraia lea mea ela auraka auea leiti kao.

² Eite e ore kofa ela Filipi voa omopa hehea lei, elaro ivara eokere ita hasiavavota; a—, ereitave Ualare sa elaro lei maea karōva lei Ualare ve Ovoro Lareva la, sukavuteaita mai rauapo ve aru voa, ero itoro ari vei.

³ Ipi elave kureaita o ve eite haiiri kaiae voa aea haiiri sirisiri voa aea maeahahauhahau voa kasirau;

⁴ a—, usoso Ualare sa ela Ovoro Lareva la itoro ari vei elaro haikaea ovōpe, lōfeare haiiri ita ela lea Ovoro la omoi vovea, karu la lei hailareva leiti vei kasirau, a—, elave haiiri la seseōvi ore leita lea Ualare la lei hailareva leiti vei.

⁵ E ore ela saseseaita o la moi sore, aea Ualare sa elave okofa la muiaita ore, ela lohalai lei etau maravai vei murufa leiti sore.

⁶ Ela Keriso ve aposetolo lea vei, ela siahu ia ero lei elaro taivotai vei, a—, ela karu sa elaro maeati vei, e voa varo, karu haria voa varo, lea la eli sore.

⁷ A—, ela eve aru voa haimafu ita roroavota usoso lou sa mere kō miaraita feare.

⁸ Elave haikakare e vei lōfeare eavia, elave haiiri Ualare ve Ovoro Lareva ero miarai vei, aea lea haria kao, a—, elave elore makuri ta reha; ipi ela ero haikakare rovaea leititore.

⁹ Paumarehari e, ela tivi pasou lei maea‐uti ita sisapavota mai la haikaeaia. Ela sare ita faita ita tivi lei vovo roroavota, ela eve karu aea la lei heafo levi leiti vei, ela Ualare ve Ovoro Lareva ero itoro popōvi ōvota lea mea.

¹⁰ Ela eo, sukaerereaita karu la leivota mai leafeare, ore leitita karu e reha, aea Ualare ta ore, ela haiiri ovava ita haura ita aea kaiae auke ita leivota lea mai.

¹¹ Usoso oa areve atutemori kofa la leitita lea mai feare, ela ta ero farafarapo la lei, ero rofo leiti vei kurea, ovoro ero taupi omoi vovo roroavota,

¹² e Ualare sa haikaeaita mai feare lei vovo roroai vei, areve sosorusosoru leita basileia voa forerai vei ero isaita lea Ualare.

¹³ Ela Ualare la mea etau vei maeati poetapaia kao, ipi e ela voa sukaeavota lea o la e mapi kakeva lei la roroa, karu ve o feare kao, a—, Ualare ve o, ipi lea o ve eite lōfeare; lea o e sukaerereaita karu ve haiiri voa tivi la leipea.

¹⁴ Paumarehari e, Ualare ve ekalesia firufiru Iudea voa, Iesu Keriso ve lea karu la leiape mai, ero ta usoso leivota; ipi eve elore toruipi karu sa ero hasiavavota lōfeare Iuda karu sa lea ekalesia karu la hasiavaiape.

¹⁵ Ere peroveta karu rauapo la evera paeaiape, ere Papuvita Iesu ta paeōpe, aea ere elaro ta ivara eokere ita larivataiape. Ere Ualare la lei kitou lei, karu la sukavuteai vovea.

¹⁶ Ere elaro sukelapi o erere ape ela torutoru karu la erero fareōvi lei makuri leita ovoro la itoro levi ari vei. Lōfeare vei ere leiape ereve lea kaiae voa topiari topiari soa’, aea faitora Ualare ve kitou erero tai fauka roroka erero saroroapai vei.

Paulo ve haiiri erero ofae ata eavai vei

¹⁷ Paumarehari e, ela mora ita fareōvi mea soa taheka voa eve soso la ofae eavaia kao, maea sa ára‐ita, a—, haiiri ára‐ita kasirau; lea vei ela haikaeai rovaea eve soso la ofae ata eavai vei.

¹⁸ Ela ero tai ata kavai haikaeavota. Arao, Paulo, soasoa voa otiharo eli eli ero tai ata kerori vei; a—, Satani sa elaro sukelapi roroa.

¹⁹ Ipi Papuvita Iesu ve omopa voa are kotita lea mea elave taita peise, elave hailareva aea elave hiva arita kekeva larelekōru? Eite e reha!

²⁰ Ipi elave hiva aea elave hailareva ve ipi eo.