1 Petero 5 - Testamenta Áre 1983 (Toaripi PNG)

Ualare ve mamoe sitavu

¹ Soka e voa pepeita opasora‐sora karu la kureaita o meha. Ara ta omopa sora karu aea ara ta Keriso sa leipe hehea la ofae eovi okofa moita karu aea, muiai vei leitita lea sosorusosoru voa ara ta soa ita karu aea.

² E voa roroaita Ualare ve mamoe sitavu la kiva lei vovo roroava, Ualare sa haikaeaita lōfeare; haiarara ita voa kao, a—, haiiri kakeva kofa ita voa; tava ovai vei kasirau, a—, ipi eve haiiri sa kaeaita lea vei;

³ e sa erero kiva leiti vei miaraita lea karu voa papukaru mai feare levi leitia, a—, mai lareva la erero muiaia, ere ta lōri leiti vei.

⁴ Mamoe kiva harofave Vita la lei pisiri voa muiaita lea mea, e fefeopai auke leita makuri ve kekeva la ovai roi.

⁵ Lōfeare mai ita, heavita áre áre e, opasora‐sora karu la kakeva lei vovo roroava. E karu foromai eve maea la haiiri‐ipi vei mate si ve maea ovi aravaia, e elore elore toarai vei; ipi Safu Buka ve o meha: Ualare maeamarōva karu la sukavutea vovea, a—, are haiforoe leita meru haiiri‐ipi karu la miara vovea.

⁶ Lea vei Ualare ve mai lakoka ve siahu ve ora voa haiiri‐ipi lei vovo roroava, aea are soa kofa voa ero moravai roi.

⁷ Eve haikavora foromai are voa miavai peava, ipi are ero haikaea vovo mea vovea.

⁸ Haisukafori kaea, ovoako lei vovo roroava. Eve ote karu, Diabolo reha, huhururu oita liona feare, kerori kerori a’, are ore lei la’ haroavai vei leita lea karu la eli vovo la mea.

⁹ Ualare la rofo ita sukaerereaia aea Diabolo la sukavuteaia, ipi e ore mearovaeka voa pepeita eve lea paumarehari, ere ta eve hehea ita usoso lei vovo roroa vovea.

¹⁰ A—, e hehea soa taheka haria voa lei kaleitita lea mea, haiforoe leita meru foromai ve Ualare, areve peita sosorusosoru voa ero Keriso voa isōpe lea Ualare, ero lareva ita lei kekese lei, ero vipi kere lei, ero lei rofo leiti roi.

¹¹ Siahu areve reha, pepe lōri peava. Amene.

Sisa maeaforoe o

¹² Ara mea karoro harua la mei Silasi ve mai sa ukaita meha. Are ereitave marehari kofa, arave haiiri reha. Ara haikaeai ero kurea lei rofo leiti vei, aeata ero o mō la moi, Ualare ve haiforoe leita meru kofa meha; are voa kere pavaia.

¹³ Babulono voa pepeita ekalesia firu, e ita fareho haikaea isōpe lea karu, ero maeaforoe o la moipea, aea arave atute Mareko ta reha.

¹⁴ E maeaforoe elore elore muia haikakare lei evera sisia. E Keriso voa pepeita lea karu foromai voa, tairu e voa lei peava.