1 Petero 3 - Testamenta Áre 1983 (Toaripi PNG)

Uamori ita vita heaea ita

¹ Lōfeare haiiri ita, e uamori eve elore elore vita heaea la mapi kakeva lei roroava; lōfeare voa Ovoro Lareva la sukaerereai auke leitita lea vita heaea, erero o moi auke ita voa ereve uamori sa leitita lea mai sa erero lei sukaerereai vei,

² ere e sa Ualare la taivotaita lea ovava mai la eavaita soa.

³ Eve maeahoa ve maea ukaita mai maria moupa etau sa levi leitia, eve tui pete toaita, gold pisoso etau aea maea puta mopaita mai;

⁴ a—, eve iri karu voa moupa araia, puruta leitita ore auke etau, haimafu leita foroe hai ove voa, Ualare ve soso voa tava rovaea pisoso etau reha.

⁵ Evera safu uamori, Ualare la tai vovo roroaiape lea uamori, ereve elore elore vita heaea la kakeva lei, ereve maea la moupa lōri araiape.

⁶ Sara are lōfeare; are Abrahama la kakeva lei arero areve papuvita rare la omoiape. E sa mai haura lei, tore auke ita roroait’ oria, e faitora areve marisa lei roroa.

⁷ Vita heaea e, lōfeare haiiri ita la leitia, eve uamori ita fareho pavaita mai la haisukafori kaea, erero taivotaia. Ipi ereve maea ve rofo eve rofo ita usoso kao, aeata ipi e fareho Ualare sa miaraita haiforoe leita meru la topiari ovaita lea vei, makuri leitita meru reha. E sa mai lōfeare leitita lea vei, e Ualare la loki leita lea mai la levi sukelapai roi.

⁸ Soka sisa o meha: e karu foromai haiiri farakeka ita lei vovo roroava; e elore elore maeaforoe lei, elore elore paumarehari feare lei, haimafu ita haiiri‐ipi ita, haikakare arai peava.

⁹ Maealolo ve tava maealolo vei levi miaraia, aea o maealolo ve tava o maealolo levi moia; a—, ero o maealolo arita karu la tava o lareva la omoia. Ipi lōfeare mai leiti vei Ualare sa ero isa, ero o sa lei lareva leiti vei otoare ōpe.

¹⁰ Usoso Safu Buka voa uka siseita o fefeare, Makuri haikaeaipeta, aea sare lareva‐lareva la ofae eavai haikaeaita lea karu, are areve uri la maealolo ari vei sasauka, aeata areve ape poe ta reha, apeva levi ari vei.

¹¹ Are maealolo la kiripi, mai lareva la leitia; are tairu la elia aea arero aitetaia.

¹² Papuvita ve ofae haura leita karu tai kerori pōva vovea, aea areve ōvauta ereve fi o mapai vei fapa vovea. A—, Papuvita ve soso maealolo leita lea karu la sukavuteaitore.

¹³ E sa mai haura voa haihahari leitit’ oria, ero leisa hasiavaita ore ei?

¹⁴ A—, e sa leita mai haura vei karu ero hasiavait’ oria, a—, e lareva ia. Lea karu la tore levi leitia, aeata haikavora levi leitia.

¹⁵ A—, eve haiiri voa Keriso la eve Papuvita feare taivotaia. Soa foromai eve ape voa moi o kekese lei roroava, eve taita haiiri ve eite la ero lalasi leita lea karu la tava o omoi vei,

¹⁶ a—, haimafu ita Ualare la haikavora lei tava o lōri omoia. Eve haiiri la ovava kofa ita lei roroava, lea vei karu sa ero o maealolo a’, e Keriso voa lei roroaita lea mai lareva vei kaiae o ero omoita lea mea, ere maeamariti leiti roi.

¹⁷ Ipi Ualare sa haikaeaita, a—, e mai haura leitita lea vei karu sa ero hasiavait’ oria, lōfeare voa e lareva ia; a—, mai kaiae ve tava vei hehea leitit’ oria, lōfeare lareva kao.

¹⁸ Ipi Keriso soa farakeka haria iri kaiae foromai la fari mutatapai vei opōpe; mai haura Vita haura auke karu vei, ipi ero Ualare tai lariōvai vei. Areve sarōva voa arero paeōpe, a—, arahoha voa are makuri lei meiape.

¹⁹ Are arahoha voa fasi pepeiape lea ove la itoro ari vei faukōpe.

²⁰ Lea ove sa ere evera soa Ualare la kaeava ape, Noa vavaea la pisosiape lea mea, aea Ualare erero au morari taiape. Lea vavaea voa karu fafareso, ere eight haria, ma voa erero fareōvi lei makuri leipe.

²¹ Lea ve peise bapatiso reha, ero faitora fareōvi makuri leita bapatiso; maeasarōva ve sirisiri la mauka fareovaita lea kao, a—, eve haiiri la lei ovava lei roroai vei Ualare ve soso voa, Iesu Keriso sa opi ata itoipe lea vei.

²² Aneru aea harofave arahoha aea siahu karu ita la areve ipi voa erero lei ere arero kakeva lei, are kauri voa patei Ualare ve mai toare voa avi laisesea.