1 Petero 1 - Testamenta Áre 1983 (Toaripi PNG)

¹ Petero, Iesu Keriso ve aposetolo ve karoro meha; toa fafarapi Ponito aea Galatia aea Kapadokia aea Asia aea Bitunia voa oti haria karu fefeare lei pepeita lea karu veia.

² Ereitave Oa Ualare sa ero evera ore lei haikaea maravi, aea areve Arahoha sa ero lei safu leipe, e Iesu Keriso la mapi kakeva lei, areve ovo sa totoa lei ovava leiti vei. Haiforoe leita meru aea tairu ita e voa lei rovaea leitia.

Marase o

³ Ereita ereitave Papuvita Iesu Keriso ve Oa Ualare la maeatia. Areve maeaforoe rovaea eavia, are ereitaro lei ata mi áre ari vei, are sa Iesu Keriso la opai voa ata moravōpe lea vei. Lōfeare voa ereita makuri áre ita au tai vovo la roroa,

⁴ Ualare sa areve karu vei kiva leipeta lea etau lareva‐lareva la aite soa voa maravai vei. Are lea etau firufiru la e vei aiperovi kekese lei kauri voa kiva lei, lōvoa ere puruta auke, sirisiri auke aeata fefeopai auke ita laisisea.

⁵ E Ualare la sukaerereaita lea vei, areve siahu sa ero kiva la leipea, tetete soa sarapaita soa voa pisiri muiai vei kekese lei vovo meita lea makuri leita soa la ovai vei.

⁶ Lea vei e hailareva rovaea leitia, eite e haisora leita etau hariaharia ve hehea mea soa harua voa lei vovo la roroa.

⁷ Lea hehea ve ipi eve sukaerereaita haiiri ve okofa la seseōvi ore leiti vei. Gold are veverapaita etau, a—, karu gold la a voa ea hohorea seseōvaitore, areve lareva la ore leiti vei. Eve sukaerereaita haiiri gold ve lareva la sapatai, aea eve lea sukaerereaita haiiri la a feare voa ea seseōvi roroka leita lea mea, Iesu Keriso sa areve elore maea la pisiri muiaita soa voa ero maeati roi, aeata e sosorusosoru aea fari lareva la lōri ovai roi.

⁸ E arero ofae eavai auke voa arero haikakare araitore, aea e arero au sukaerereai vovea. Eite e faitora arero eavai sore, aea e omoita ore auke hailareva foromai rovaea la leipea;

⁹ ipi e eve sukaerereaita haiiri voa foreraita etau la la ovaipea, eve ove la lei makuri leitita siahu reha.

¹⁰ Peroveta karu, Ualare ve haiforoe leita meru e voa forerai o la everori moiape lea karu, ere mea lei makuri leita siahu vei lalasi lei metakao eliape.

¹¹ Ere mōfeare ore leiti vei eliape, lea etau ve soa leasauka aeata areve forerai mai ta leafeare. Ereve iri voa peiape Keriso ve Arahoha sa soa leasauka erero muia, aeata Keriso hehea leiti mai aea aite voa forerai sosorusosoru vei o ta moiape.

¹² Ualare lea peroveta karu la lei ore leiape, ere omoiape lea o ve eite ereve elore lareva vei kasirau, a—, e vei. Kauri voa itapōpe Safu Arahoha sa lei Ovoro Lareva ero itoro ape lea karu ve ape voa e faitora lea o ve eite la mapi ore lei la roroa meha. Eite aneru ere lea etau la ofae eovi ore leiti vei haikaeai rovaea kofa.

Ualare la taivotaia

¹³ Lea vei eve haiiri ovoako lei, haisukafori roroava, aea Iesu Keriso areve elore maea la pisiri muiaita soa voa e sa ovai vei leipeta lea haiforoe leita meru la eve haiiri foromai ita au tai vovo roroava.

¹⁴ Ualare la mapi kakeva leitita atutemori feare leitia. E evera haihaveva ita haikakare maealolo la leiape lea mai feare levi leitia;

¹⁵ a—, ero isōpe lea Ualare sa safu voa meita lōfeare, e ta eve leita mai foromai voa safu lei, lei vovo roroava.

¹⁶ Safu Buka voa uka siseita o meha, E maea ovava lei safu ita roroava, ipi ara safu Ualare eavia.

¹⁷ E veveu soasoa voa arero Oa rare ita isaita, a—, are karu foromai la usoso ereve elore elore leita mai feare voa seseōvi tava miaraitore. Lea vei e mearovaeka voa oti haria karu feare lei roroaita soa voa, arero tore ita taivotei roroava.

¹⁸ E ore e eve papa voa ovōpe lea eite auke mai voa ero fareōvi makuri leita tava, puruta leita etau gold ō silva feare kasirau,

¹⁹ a—, tava rovaeka kofa ovo, Keriso ve ovo reha; arero usoso siaviri auke maita maealolo auke mamoe feare omopa posaseōpe.

²⁰ Mearovaeka la pisosi auke leipe soa voa lōfeare mai leiti vei arero everori haikaea ovōpe, a—, soa sarapaita soa voa arero e vei muia vo la mea.

²¹ E Ualare la are voa sukaerereaitore, arero opai voa moravi, aea fari sosorusosoru arero miarōpe lea Ualare. E Ualare la sukaererea aea arero au tai vovo roroai ve ipi Iesu Keriso voa.

²² E faitora okofa la kakeva lei, eve ove la lei ovava lei, aea harapaharapa auke ita elore elore haikakare leitita lea vei, liri ita toto ita a’ elore elore haikakare araia.

²³ Ipi Ualare ve makuri lei peita o sa ero lei mi ata ōvovo la roroa, aea eve lea Oa are karu feare kao, a—, peita Ualare.

²⁴ Ipi usoso Safu Buka voa uka siseita o fefeare, Maeasarōva foromai usoso kavuru feare, aea ereve maeahoa usoso tola pupuri merava feare leititore. Kavuru hohore leititore, tola pupuri ta sisapaitore,

²⁵ a—, ereitave Ualare ve o pepe lōri peava roi. Lea o ero itoro oita Ovoro Lareva reha.