1 Korinito 9 - Testamenta Áre 1983 (Toaripi PNG)

Aposetolo karu ve tivi

¹ Ara pisirikao lei meita karu kao ei? Ara aposetolo karu kao ei? Ara ereitave Papuvita Iesu ofae eavai kao ei? E sa Papuvita voa pepeita lea ve eite arave tivi kao ei?

² Karu haria sa seseōvaita, a—, ara aposetolo karu kao varo, a—, e voa ara aposetolo karu kofa, ipi ara sa Papuvita voa aposetolo leita peise ve eite e reha.

³ Araro seseōvai haikaeaita lea karu vei arave tava o meha:

⁴ Ela siahu kao ei, ekalesia voa larietau ma ita la ovi lari vei?

⁵ Ela siahu kao ei, ekalesia uamori voa elore elore laeōpe ua la lariōvi lei vovo mei vei, aposetolo karu firu aea Papuvita ve mariosu aea Petero ita sa lei vovo roroaita lea mai feare ei?

⁶ Ō maea ve etau la maravaita tivi la kiripai vei, elaka Banabasi ita sa haria lea mai levi leiti vei ei?

⁷ Maola vei teraita, areve elore maea tava la miaraita karu leisa? Vine oti la poraita aea areve fare la lari auke leitita karu leisa? Mamoe sitavu la kiva lei, kō‐opu la lari auke leitita karu leisa?

⁸ Ara karu ve laua feare sukavai ei? Eite Safu Buka ve o ta lōfeare.

⁹ Ipi Mose ve Safu O voa o mōri uka laisisea, Uiti fare ruru la lei sisapai vei mora sa pataita boromakao ve ape la levi fasi kavuaraia. Ualare are boromakao vei haikavora ei?

¹⁰ Ō lea o ve eite kofa ereita vei ei? Lea o ereita vei ukōpe, ipi siva sukaita lea vita are fare taita haiiri ita siva sukai vei, aeata uiti fare ruru la toa sisapaita lea vita, fare la lari vei au taita haiiri ita leiti vei.

¹¹ Ela Arahoha etau mere feare e voa vipaiape, ela mearovaeka etau e voa fare feare maravaita, a—, lea usoso kao ei?

¹² Karu haria sa mea siahu e voa ovaita, a—, ela ta lōfeare siahu ve arori voa levi topiari ovai roi ei? Eite ela mea siahu leiti sore, a—, ela etau foromai la au moraritore, ela Keriso ve Ovoro Lareva la sukelapai ave.

¹³ E mea ore kao ei? Maso tivi leita karu ere maso uvi larietau la lalō vovea, aea alitara voa tivi leita karu ere alitara ve larietau itua la lalō vovea.

¹⁴ Papuvita ta lōri mai leiti vei o mōri moipe, Ovoro Lareva la itoro arita lea karu ere maea sa haikaeaita etau la Ovoro Lareva voa maravai vei.

¹⁵ A—, ara lōfeare siahu ita leiti sore, ara mea karoro e lōfeare mai ara vei leiti vei ukai kasirau. Ara everori au opaita, arave haikaeaita haiiri reha. A—, karu aea sa arave hiva o ve eite la lei fareovait’ oria, lea usoso kasirau.

¹⁶ Ara Ovoro Lareva la itoro arita lea vei, aea hiva o ve eite lōvoa ovai kao, ipi araro lei haisa arita tivi reha. Ara Ovoro Lareva la itoro ari auke leit’ oria, ara vei ahai‐e!

¹⁷ Ara arave elore haiiri sa lea tivi la leitita, a—, ara tava ovai lare. Eite ara arave elore haiiri sa lea tivi la leiti sore, a—, ipi Ualare sa araro haisa moipe eavia.

¹⁸ Soka ara tava lekōru la ovai vei? Meha, ara Ovoro Lareva la tava auke ita itoro aritore; ara Ovoro Lareva voa arave maea la toaraita etau ovai auke ita meitore.

¹⁹ Ara pisirikao meita vita, a—, ara arave maea la lei karu foromai ve fasaita sarufa lei mea vovea, ara karu rauapo la kurea lei sukaerereai vei.

²⁰ Iuda karu vei, arave leita mai Iuda karu feare lei, ara Iuda karu la kurea lei sukaerereai vei. Ara ukōpe Safu Mai ve ora voa meita karu kao; a—, ara ukōpe Safu ve Mai ve ora voa meita vita feare leititore, ara ukōpe Safu ve Mai ve ora voa roroaita karu la kurea lei sukaerereai vei.

²¹ Toru hariaharia karu vei ara ere feare lei Iuda ve Safu ve maria voa meitore, ara lea toru hariaharia karu la kurea lei sukaerereai vei. Lea o ve eite mōfeare kao, ara Ualare ve safu la miroapai. Kasirau, a—, ara Keriso ve safu mai ve ora voa meitore.

²² Haiiri maeapatoita karu vei, ara ta haiiri maeapatoita leititore, ara lea haiiri maeapatoita karu la kurea lei sukaerereai vei. Ara eite karu foromai vei ereve leita mai hariaharia foromai voa mea vovea; lōfeare sa lei, ara karu hea la lō leiti lō leiti lei fareōvi makuri lōri leiti vei.

²³ Ara lea etau foromai la Ovoro Lareva vei leititore, lea Ovoro voa foreraita etau lareva lareva voa arave firu ovai vei.

²⁴ E mea la ore kao ei? Loreape ve iri voa oroaita karu rauapo ia, a—, farakeka sa haria sapataita tava ovai vei. E ta lōfeare oroaia, e sapataita tava ovai vei.

²⁵ Havohu ve maea avoha lei roroaita lea karu ere maea sa haikaeaita lea etau foromai kiva leititore, ere fefeopaita tolotolo kekeva tava la ovai vei; a—, ereita peita kekeva ovai vei leititore.

²⁶ Soka arao, ara horahora auke ita loroape aritore; ara mai kupa sa toaitore, miruru la toaita feare kao;

²⁷ a—, ara arave maea la toa safora safora a’ arero foromai lei orali leiti vei, ara karu haria la itoro a’ roroka lei, araro kofa la sukavuteai ave.