1 Korinito 8 - Testamenta Áre 1983 (Toaripi PNG)

Maso ove etau voa omopa posaseaita larietau

¹ Soka apeva ualare ve ove etau la omopa posaseaita larietau vei arave o meha. Okofa, eve o feare, ereita foromai haiore ia. Etau farakeka haiore sa karu la lei hiva aritore, a—, haikakare sa haiiri la moravi rofo leititore.

² Karu aea ve haiiri are haiore ia, a—, eite are haiore kofa la ore leitia kasirau.

³ A—, Ualare la haikakare leita lea karu, Ualare sa ore leita karu are reha.

⁴ Soka apeva ualare ve ove etau la omopa posaseaita larietau la larita lea mai vei, ereita ore apeva ualare ve ove etau foromai eite kasirau; aeata meha, Ualare ta farakeka haria.

⁵ Kauri voa varo, mearovaeka voa varo, ualare rare aravaita etau etau siseit’ oria, lōfeare ualare ualare aeata papukoru etau rauapo siseita varo,

⁶ a—, ereita vei Ualare farakeka sa haria laipea, are Oa reha, etau foromai are voa forera pepeita lea Ualare, aea ereita are vei pepea vovea; aeata Papuvita ta farakeka, Iesu Keriso, etau foromai are voa foreri, aea ereita are voa pepea vovea.

⁷ Etau farakeka karu foromai mea haiore ovaia kao. A—, karu hea ere evera apeva ualare ve ove etau malasa leiape lea vei, ere faitora lea maso ove etau voa omopa posaseaita larietau la larit’ oria, ere ereve haiiri la lei safosafoa putoita reha, ipi ere haiiri tivutivu leitita eavia.

⁸ A—, Ualare ve omopa voa larietau sa ereitaro levi lei forerai roi; ereita lari auke leitita, a—, ereita maealolo levi sukaeai roi, aea ereita larita, a—, ereita lareva lea vei ta levi sukaeai roi.

⁹ A—, e kiva leitia, eve haiiri ve rofo sa mea etau voa maea tivutivu karu la lei safosafoa putoita etau leiti ave.

¹⁰ Mea etau voa maea tivutivu karu aea sa aro apeva ualare ve ove etau ve maso uvi voa larietau la haiore ita makea iavi larita la ofae eavaita, a—, arero ta lea maso ove voa omopa posaseaita larietau la lari vei levi kureai roi ei?

¹¹ Soka maea tivutivu karu, ave marehari, ave haiore sa lōri lei saroroapai roi, Keriso are vei opōpe ave lea marehari.

¹² A maraiosu la lōri lei kaiae lei, ereve haiiri la lei maealolo leitita, a—, a Keriso la lei kaiae lōri leiti roi.

¹³ Soka lea larietau sa arave marehari la lei safosafoa putoita, a—, ara lea sarōva la ata levi lari roi, ara arave marehari la lei kaiae leiti ave.