1 Korinito 7 - Testamenta Áre 1983 (Toaripi PNG)

Lalasi o ua laeaita mai vei

¹ Soka eve karoro voa lalasi leitita etau hariaharia vei. Heavita are ua laeai auke leitita, a—, are lareva ia.

² Etau farakeka ipi herei mai sa rauapo eavia, karu foromai elore elore ua la ovaita, aea ua ta elore vita la ovaita, a—, mai lareva reha.

³ Vita are laeaita mai ve eite areve ua voa leitia; ua ta laeaita mai ve eite areve vita voa leitia.

⁴ Ua are areve elore maea ve papuōvu kasirau, a—, areve papuvita areve vita reha; vita ta lōfeare, are areve elore maea ve papuvita kao, a—, areve ua areve papuōvu reha.

⁵ E vita ita ua ita maea havihavi leiti vei hahaea levi aria, a—, ereuka fareho haiiri kekese ita avoha lei, Ualare la loki ita meita soa la ovai vei varo, a—, ereuka aite ata topiaraita lareva reha, ereuka sa hahaea leita lea vei, Satani sa kaiae leiti vei vuteai ave.

⁶ Ara mea o ovoro feare moi, safu o feare kao.

⁷ Eite e karu foromai ara feare leitita lareva reha. A—, karu elore elore Ualare sa miaraita meru ia, karu aea mōfeare, karu aea ta lōfeare.

⁸ Ua laeai auke karu aeata ua lelesi lelesi ita vei arave o meha, ere ara feare pepeita lareva reha.

⁹ A—, ere hahaea ari vei haiiri usoso auke leitita, a—, ere ua ita vita ita laeai vei lareva reha. Vita ita ua ita laeaita lea lareva, haihahari leita mai sa lei haiiri heafo foromai leitita lea lareva kao.

¹⁰ Ara vita ita ua ita laea roroaita lea karu la o erere aipea (eite ara kao, a—, Papuvita sa moi), ua areve vita la levi kiripai vei.

¹¹ A—, ua areve vita la kiripait’ oria, are ua lelesi lei pavaia, ō are areve vita ita ata totoeai vei. O aeata meha, vita ta areve ua la levi kiripaia.

¹² Soka karu haria vei arave seseōvaita o meha (mea Papuvita ve o kao), ekalesia karu aea are koravasa ua ita peita, aea lea ua sa are ita fareho pei vei haikaeaita, a—, are arero levi kiripaia.

¹³ Aeata meha, koravasa vita aea ita peita lea ekalesia ua aea, lea vita ta are ita fareho pei vei haikaeaita, are areve vita la levi kiripaia.

¹⁴ I pi lea ekalesia ua areve lea koravasa vita la lei safu lei meitore, aeata ekalesia heavita areve lea koravasa ua ta lei safu lei meitore. Lōfeare auke leitita, a—, ereve atutemori safu auke lei roroava roi; a—, leitita, a—, ere safu atutemori lareva lei roroava roi.

¹⁵ A—, Papuvita la sukaerereai auke leita lea karu areve ekalesia ua varo vita varo kiripai haikaeait’ oria, o erere levi aria. Lea vita varo ua varo lei fasaita mai ita levi roroava. Ualare sa ero isōpe tairu ita pepei vei.

¹⁶ Ekalesia ua e, a ore kao, a ave vita la fareōvi makuri leita varo; aea ekalesia vita e, a ta ave ua la fareōvi makuri leita varo.

Ualare sa ero soasoa voa isa foreraiape lea mai ita lōri roroava

¹⁷ Papuvita sa karu elore elore muiape lea leita mai voa, Ualare sa elore elore isōpe feare, karu foromai lōfeare roroava. Ara ekalesia karu foromai la o lōfeare satiriara vovea.

¹⁸ Karu aea la peritome leita voa isōpe, are peritome peise la levi fareovaia. Karu aea peritome auke leita voa isōpe, a—, arero lei peritome levi leitia.

¹⁹ Peritome leita varo, leiti auke leita varo, lea eite kasirau, a—, Ualare ve safu mai la kakeva leitita, eite kofa reha.

²⁰ Karu foromai ereve elore elore roroaiape mai voa Ualare erero isōpe lea mea, ere lea mai voa roroava.

²¹ A fasaita sarufa leipe voa isōpe, a—, haisora levi leitia, a—, aro paraeaita soa la sukaeai oria, lōri leiti vei lareva kofa.

²² Ipi Papuvita sa isōpe lea fasaita sarufa, Papuvita ve pisiri voa paraeaita vita are reha; lōfeare mai ita pisiri voa mea isōpe lea karu, Keriso ve fasaita sarufa are reha.

²³ Ualare ero tava ita itaea lei maravōpe; lea vei e karu ve fasaita sarufa levi leitia.

²⁴ Paumarehari e, ero elore elore leita mai voa isaiape, lōfeare voa e Ualare ita roroava.

Vita ita ua ita laeai auke karu vei

²⁵ Harokoulese aeata marisahōva vei ara Papuvita voa o ovaia kao; a—, Papuvita sa araro maeaforoe leita lea vei, ara okofa ita moita ore, aea ara lea vei arave haria haiiri ero au la moipea.

²⁶ Soka mea soa ve maealolo vei, arave haiiri karu ere sa leita lea mai voa lōri pepei vei.

²⁷ A ua ia ei? Arero kiripai vei levi seseōvaia. A ua auke ita peita, a—, ua laeai vei levi elia.

²⁸ Soka a ua laeaita, a mai kaiae leiti kao; aea morihōva vita sa laeaita, a—, are ta mai kaiae leiti kao. Etau farakeka, lōfeare mai la leita karu ere haikavora soasoa voa forerai roi, aea arave haiiri e heafo lōfeare levi leiti vei.

²⁹ Paumarehari e, arave o ve eite meha: soa hohoi savori eaeia kao. Faitora soa harua voa, ua ita karu ere ua auke feare pepeava;

³⁰ haisora leita lea karu, ere haisora leiti auke feare lei pepeava; hailareva leita lea karu, ere hailareva auke feare lei pepeava; aea etau itaea lei maravaita lea karu, ere etau maravai auke karu feare lei pepeava;

³¹ aea mearovaeka ve etau lareva lareva la maravaita karu, ere usoso lea etau ita leiti auke karu fefeare. Ipi mea mearovaeka ve soso toarōrisa mai haria la leipea.

³² Arave haiiri e haikavora ita levi popōvaia. Ua la laeai auke leita vita Papuvita ve etau vei haikavora lei vovea, ipi are Papuvita la lei hailareva leiti haikaeai vovea.

³³ A—, ua ita vita mearovaeka etau vei haikavora ia, are areve ua la lei hailareva leafeare leiti vei;

³⁴ aea areve haiiri lōri faea itai itai leititore. Vita laeai auke ua varo, morihōva varo, are Papuvita ve etau vei haikavora leititore; a—, vita ita ua are mearovaeka etau vei haikavora ia, are areve vita la lei hailareva leafeare leiti vei.

³⁵ Ara mea o la mei ero lei lareva leiti vei; ero fitōva voa feravai vei feare kao, a—, ipi lareva leita mai vei, aea ero lei e Papuvita la haisora auke ita toari pepei vei.

³⁶ Karu aea areve seseōvaita haiiri, are areve otoare ua la mai haura auke lei, aea are arero haihahari rovaea leitita, a—, ereuka laeaia, ereuka kaiae leiti kao.

³⁷ A—, lula auke haiiri kere karu, aea etau arero haisai auke lei, aea are areve topiarai auke leitita ua la lōri leiti vei haiiri kekese leitita, a—, lea karu mai haura leiti roi.

³⁸ Soka areve otoare ua la laeaita lea vita lareva leititore, aeata arero laeai auke leitita lea vita lareva kofa leititore.

³⁹ Ua areve vita makuri peita lea soa, are voa fasaitore; a—, are opaita, soka arero felauka pisiri leitita, aea are haikaeaita lea vita sa laeai vei, a—, are Papuvita ve karu leitit’ oria.

⁴⁰ A—, arave haiiri meha, are ua lelesi lei peita, a—, areve hailareva rovaea leiti roi; arave haiiri ta meha, ara Ualare ve Arahoha ita peitore.