1 Korinito 6 - Testamenta Áre 1983 (Toaripi PNG)

Eve ekalesia karu la kōto levi leitia

¹ Eve karu hea havara eve ekalesia karu aea la paraeai vei ovaita, aea ere Ualare ita haura auke leita karu ve omopa voa kōto seseōvai vei teraitore, a—, Ualare ve karu ve omopa voa seseōvai vei forerai sore ei?

² E ore kao ei, Ualare ve karu mearovaeka la seseōvai roi? Soka e sa mearovaeka la seseōvaita, a—, e etau seika ta seseōvaita usoso kao ei?

³ E mea ore kao ei, ereita sa aneru ta seseōvai roi? Soka mea mearovaeka ve etau la ereita sa seseōvaita usoso.

⁴ Soka mea makuri ve etau la seseōvaita soasoa voa, e ekalesia voa rare auke karu la mea kōtō tivi leiti vei miaraita ipi levea?

⁵ Ara mea o ero lei maeamariti leiti vei la moipea, Mōfeare, eve opamōla oraka ve sosori la seseōvai vei haiore karu e voa kasirau ei?

⁶ A—, e paua ita, marehari ita ve sosori la kōto voa seseōvai vei lea sukaerereai auke karu ve omopa voa lei forera vovea.

⁷ E elore elore maea kōtō leitita lea vei, eve leita mai lōfeare lareva kakaeite. E kaiae ve tava la miarai auke ita roroaita leafeare ei? Eve etau la torea leitita voa tava ovai auke ita roroaita leafeare ei?

⁸ Eite e sa eve maeapavora la kaiae lei, aeata ereve etauroro la lōri torea leititore.

⁹ E mea la ore kao ei? Haura leiti auke leita lea karu Ualare ve basileia la levi ovai roi. E apeva vutea vovo levi roroava; herei karu, aea apeva ualare ve ove la maso toaita karu, aea ua ita vita ita torea karu, aea heavita oraka elore maea heorukaita karu,

¹⁰ aea etau torea leita karu, aea etau maravai vei liri arita, aea ma maealolo la’ la’ maeakakare leita karu, aea kisari seravaita karu, aea irori ita torea leita lea karu ita, ere Ualare ve basileia la levi ovai roi.

¹¹ Eve karu hea evera lōfeare mai la lei vovo roroaiape, a—, ero ma uka ovava lei, ero safu sa lei lareva lei, aea Papuvita Iesu Keriso voa aea ereitave Ualare ve Arahoha voa ero lei haura lei la roroa meha.

Eve maea sa Ualare la lei sosorusosoru leitia

¹² Karu hea mōfeare moita varo, Ara etau foromai la leita ore, safu kao. Okofa, a—, etau foromai aro lei lareva leita etau kasirau. Moita o mōfeare varo, Leitita etau foromai ara vei safu kasirau. Okofa, a—, lea leita mai sa araro levi ovi aierai vei.

¹³ Moita o aea mōfeare, Larietau ve ipi ére vei, aea ére ve ipi larietau vei; a—, eite Ualare sa ereuka oraka la lei kaleiti roi. Maea ve eite herei mai leiti vei kasirau, a—, areve eite Papuvita vei, aea Papuvita sa maea la kiva leiti vei.

¹⁴ Ualare Papuvita la opai voa moravōpe, aeata are areve siahu sa ereitaro ta moravai roi.

¹⁵ E mea la ore kao ei? Eve maea ere Keriso ve maea voa toepi siseita etau. Soka ara Keriso ve maea voa toepi foeaita etau la ovi saruka ua ve maea voa topiarai vei ei? Kasirau!

¹⁶ E mea la ore kao ei? Areve maea la saruka ua voa topiaraita lea vita, are lea ua ita maea farakeka loita reha. Ipi Safu Buka ve o meha, Ereuka oraka maeasarōva farakeka leiti roi.

¹⁷ A—, Papuvita voa topiaraita lea karu, are ita arahoha farakeka loita reha.

¹⁸ Herei mai kiripi soeaia. Karu sa leita lea kaiae foromai, ere maea ve maria voa leita kaiae reha; a—, herei karu areve elore maea la toa kaiae lei vovea.

¹⁹ E mea la ore kao ei? Eve maea eve iri voa peita Safu Arahoha ve peita safu oti reha, aea Safu Arahoha la Ualare sa ero aioraiape. Eve maea eve elore etau kasirau, a—, Ualare ve;

²⁰ are ero tava vei itaea lei maravaiape. Soka e eve maea sa Ualare la lei sosorusosoru leitia.