1 Korinito 5 - Testamenta Áre 1983 (Toaripi PNG)

Kaiae rovaea ekalesia voa

¹ Fari mōfeare la fafarapaipea, herei eokere mai eve aru voa ia, lōfeare herei eokere mai toru hariaharia karu sa leiti sore. Lea kaiae meha: karu farakeka sa areve oa ve ua la laea mea.

² A—, e lea vei haiarori la leipea. Eite e haiiri eae leitita, aea lea mai la leita karu la e voa fareōvi sukavuteaita, a—, mai kofa reha.

³ Arave maea sa e ita fareho peia kao, a—, arave arahoha sa e ita fareho pea, aea ara e ita peipeta feare lei, lea mai la leipeta karu la ara seseōvi kaiae o a’ roroka,

⁴ Papuvita Iesu Keriso ve rare voa. Ara ero haisa moi, e aeata arave arahoha, ereitave Papuvita Iesu ve siahu ita kokorukaita soa,

⁵ e lea vita Satani la miaraia, areve maea la saroroapai vei, areve arahoha la Papuvita Iesu ve sare voa lōfeare vei fareōvi makuri leiti vei.

⁶ Eve lea haiarori mai lareva kasirau. E mea la ore kao ei, fefesita etau sisikaheka sa faloa koru maeamakora la lei fefesitore?

⁷ E kaiae ve evera fefesita etau la fareōvi mutapaia. Lea soa e faloa koru are feare leiti roi, ipi e fefesita etau auke ita roroaita eavia. Ipi Keriso la ereitave Foapaita Sosoka ve mamoe mere lei, savi roroka leipe.

⁸ Lea vei ereita Foapaita Sosoka leitia, evera fefesita etau ve maealolo ita levi leitia, a—, ovava aea okofa ita ve fefesi auke faloa ita leitia.

⁹ Ara arave karoro aea voa o mō ukōpe e herei karu ita maeapavora levi leitia.

¹⁰ A—, arave lea o ve eite mōfeare kao, mea mearovaeka voa roroaita herei karu, aea etau maravai vei liri arita karu, aea torea karu, aea apeva ualare ve ove la maso toaita karu ita la sukavuteai vei. E lōfeare mai leitita, a—, otiharo farakeka meha e mearovaeka foromai la kiripai vei.

¹¹ A—, ara o faitora ero mō la ukai, Ekalesia voa opamōla rare aravaita lea karu, are herei leitita, ō are etau maravai vei liri arita, ō apeva ualare ve ove la maso toaita, ō kisari seravaita, ō ma maealolo la’ la’ maeakakare leitita, ō karu ve etau irori ita torea leitita, a—, lōfeare karu ita fareho levi leitia, larietau are ita fareho avi levi laria.

¹² Arave tivi kao maria voa roroaita lea karu la seseōvai vei; a—, eve tivi meha, eve aru voa pepeita lea ekalesia karu la seseōvaia.

¹³ Maria voa roroaita karu la Ualare sa seseōvai roi. A—, usoso Safu Buka ve o feare, Kaiae leita lea karu la fareōvi maria voa sukavuteaia.