1 Korinito 2 - Testamenta Áre 1983 (Toaripi PNG)

Satauro voa paeōpe Keriso

¹ Paumarehari e, ara ero tai foreri Ualare ve hohore etau la ero itoro ōpe lea mea, ara laua foroe haiore ita forerai kao.

² Ara haiiri voa mōfeare seseōvi roroka leipe, etau e voa ore levi leiti vei, a—, Iesu are Keriso lea o, aeata arero satauro voa paea opōpe lea o haria.

³ Ara rofo auke ita, tore ita, maea oriri rovaea ita eve aru voa peiape.

⁴ Arave laua aeata arave itoro o kureaita haiore o ita leiti kao, a—, Ualare ve Arahoha aea siahu sa muiaita o ita leiape;

⁵ ipi eve sukaerereaita haiiri karu ve haiore voa levi sesearai vei, a—, Ualare ve siahu voa.

⁶ Soka ela haiore laua haiiri sora karu ita sukavaitore, etau farakeka are mea mearovaeka ve haiore kasirau, aeata mea mearovaeka ve harofave karu, ereve soa ta kaleiti vei leipeta lea karu ve haiore ta kasirau.

⁷ A—, ela Ualare ve hohore leita haiore la itoro ō vovea; Ualare sa evera kekese lei arorisa miavōpe lea hohore leita haiore, ereitaro lei sosorusosoru leiti vei mearovaeka la pisosi auke leipe lea soa voa.

⁸ Mea mearovaeka ve harofave karu ere lea haiore la ore leiti kasirau, ipi ere ore leitit’ oria, a—, ere sosorusosoru ve Papuvita la satauro voa levi paeai lare.

⁹ Usoso Safu Buka voa uka siseita mea o fefeare, Ofae sa eavai auke lei, aea ōvauta sa mapai auke leipe lea etau, karu ereve haiiri voa kaeai auke leipe lea etau, Ualare sa arero haikakare leita lea karu vei lei kekese lei laisisea.

¹⁰ Soka Ualare areve Arahoha sa lei, lea etau ereitaro muiōpe. Ipi areve Arahoha etau foromai la eli vovea; okofa, Ualare ve toru iri voa siseita lea etau.

¹¹ Ipi karu ve aru voa karu ve haiiri voa siseita etau leisa ore? Areve iri voa peita arahoha sa haria reha. Ualare ve etau voa ta lōfeare, erero ore leita karu kasirau, Ualare ve Arahoha sa haria reha.

¹² Ereita mearovaeka ve arahoha la ovai kasirau, a—, Ualare voa foreraita lea Arahoha, ereita Ualare sa au miaraita lea meru la ore leiti vei.

¹³ Ela Arahoha ve lea etau vei Arahoha ita karu la moi vovea, karu ve haiore sa satiriaraita lea o feare kasirau, a—, Arahoha sa satiriaraita lea o feare.

¹⁴ Maeasarōva haiiri ita karu ere Ualare ve Arahoha ve etau la sukavutea vovea, ipi lea etau ere voa maeakakare, aea ere ereve eite ta ore leiti sore, ipi erero Arahoha ita haiiri sa seseōvi ore leititore.

¹⁵ Arahoha ita karu etau foromai ve eite la seseōvi ore leititore, a—, erero seseōvai vei ore leita karu aea kasirau.

¹⁶ Ipi Papuvita ve haiiri la seseōvi ore leita karu leisa, are sa arero satiriarai vei ei? A—, ereita Keriso ve haiiri la ovi la roroa meha.