1 Korinito 15 - Testamenta Áre 1983 (Toaripi PNG)

Keriso opi ata itoipe mai

¹ Paumarehari e, arave haiiri ara ero itoro ape lea Ovoro Lareva, ero miōri ovi aea e soi pepeipeta lea ovoro la ara ero ata lei haikaeai vei.

² Lea ovoro sa ero fareōvi makuri lei la roroa, ara ero itoro ape lea ovoro la e mai kere paeait’ oria. Lōfeare auke leitita, a—, e auraka auea sukaerereaita varo.

³ Ipi araro miōri ara evera ovōpe, omopa kofa o la ara ero ta miaraiape; o meha, Keriso ereitave iri kaiae vei opōpe, usoso Safu Buka voa uka siseita o fefeare;

⁴ aeata arero viopōpe, aeata are oroisoria sare voa ata itoipe, usoso Safu Buka voa uka siseita o fefeare;

⁵ aeata are Petero tai forerōpe, aite twelve karu ta reha.

⁶ Lea ve aite voa are mariosu five hundred tai forerōpe, ere ta arero farehoria soa farakeka eavōpe; lea ve karu rauapo kofa makuri laepepea, a—, hea ivutu iroropi laisisea.

⁷ Lea ve aite voa are Iakobo tai forerōpe, aite aposetolo karu foromai ta reha.

⁸ Lea foromai ve aite kofa voa, usoso mi soa kofa voa lei ari auke mere popora feare voa, ara ta arero eavōpe.

⁹ Ipi ara aposetolo karu foromai voa seika kofa vita, rare aposetolo la aravai vei ara usoso kofa kao, ipi ara Ualare ve ekalesia la hasiavaiape eavia.

¹⁰ A—, ipi Ualare ve maeaforoe ve meru eavia, ara faitora meipeta mea mai la lei la mea; aea are araro leipe lea maeaforoe eite auke ita leiti kasirau, ipi tivi voa ara sa erero foromai la sapatai; a—, eite ara kao, a—, Ualare ve maeaforoe ara ita fareho lei vovo meipeta lea vei.

¹¹ Soka lea itoro o ara voa forerōpe varo, ere voa varo, ela foromai sa itoro arita o reha, aea e ta lōri sukaerereai vovea.

Ereitaro opai voa lei itoteaita mai

¹² Soka Keriso opi ata itoipe o la itoro arita, a—, eve karu hea mea o leafeare moitore, Opai karu ata levi itoi roi ei?

¹³ Karu opi ata itoi auke oria, a—, Keriso ta opi ata levi itoi lare.

¹⁴ Aea Keriso opi ata itoi auke oria, ela sa itoro arita o merava lei, e ta eite auke ita sukaerereai lare.

¹⁵ O aeata meha, ela Ualare vei harapi ore lei apeva ita moita karu, ipi Ualare sa Keriso la lei itoipe lea fari la ela itoro oita eavia; a—, eite lōfeare kao, opaita karu la moravai auke leitit’ oria.

¹⁶ Okofa, opaita karu la moravai auke leitita, a—, Keriso ta moravai auke leiti lare.

¹⁷ Soka Keriso la moravai auke oria, e auraka auea sukaererea, aea e eve kaiae voa roroai lare.

¹⁸ O aeata meha, Keriso la sukaererea ivutu iroropaita lea karu ere ta veverapi erero ata levi eavai lare.

¹⁹ Ereita mea makuri soa voa haria Keriso la au tai vovo roroaita, a—, mearovaeka ve karu foromai voa ereita rapi maealolo kofa, maeaforoe‐o!

²⁰ A—, etakofa Keriso opi ata itoipe, ivutu iroropaita lea karu ve fare ve toare vita are reha.

²¹ Ipi usoso karu farekeka aea sa opai la lei forerōpe, lōfeare opi ata itoita ta karu farakeka aea sa lei forerōpe.

²² Ipi usoso karu foromai Adamu voa opaita, lōfeare karu foromai ta Keriso voa lei makuri leiti roi.

²³ A—, karu farafarapo ereve elore elore soasoa voa makuri voa moravai roi; Keriso, fare toare vita omopa, Keriso ve karu ere aite, are sa kotita lea soa voa.

²⁴ Lea ve aite voa soa sarapaita soa forerai roi, lea mea are basileia la ovi Ualare Oa la miarai roi, are harofave arahoha foromai aea Ualare ve ote ve siahu ve ipi ita la ovi aieri roroka leitita lea soa voa.

²⁵ Ipi are basileia harofave vita leiti roi tetetete are areve ote karu la areve mora posa sa patei pōvi roroka leiti roi.

²⁶ Areve aite kofa ote opai, are arero ta saroroapi kaleiti roi.

²⁷ Ipi Safu Buka ve o meha, Ualare etau foromai la areve mora ve ipi voa vipi pepeitore. A—, ereita ore, etau foromai la areve mora ve ipi voa vipi pepeitore, lea o ve eite mōfeare kao, etau foromai la ipi voa vipaita lea Ualare ta ipi voa pavai roi.

²⁸ A—, etau foromai Keriso ve siahu ve ipi voa vipi roroka leitita lea mea, Atute ta areve ipi voa vipaita lea Ualare ve ipi voa areve elore maea la vipi, aea Ualare etau foromai voa karu foromai ve arori voa Papuvita leiti roi.

²⁹ Lōfeare auke leit’ oria, opaita karu vei bapatiso leita lea karu leati roi? Opaita karu itoteai auke leitit’ oria, karu ere vei bapatiso leitita ipi levea?

³⁰ Aeata meha, ara ora foromai voa hasiavaita soa ve aru voa meipeta ipi levea?

³¹ Paumarehari e, ara e voa Keriso Iesu ereitave Papuvita voa hiva o mō ō vovea, Ara saresare voa opai feare leititore.

³² Ara karu ve maea ovi fara animala ita Efeso voa sosori toaiape, a—, ara lea etau vei lareva lekōru la sukaeai roi? Opaita karu itoi auke leit’ oria, ereita larietau ma ita laria, ipi vevere ereita opai roi.

³³ Apeva sa ero levi vuteaia: mai maealolo leita karu ita maeapavora leita lea karu ve lareva ta toarōrisa maealolo leiti roi.

³⁴ Haura leita mai voa ata keroria, aea kaiae ata levi leitia; ipi karu hea Ualare la ore leiti sore. Ara mea o la ero lei maeamariti leiti vei moi.

Opi ata itoita maea

³⁵ A—, karu hea mō ari roi, Opaita karu lea’ lei itoteai roi? Ere maea leafeare la maravi forerai roi?

³⁶ Maeakakare karu e, a mea voa sisōvaita lea etau mere are opai auke leitita, a—, are makuri levi leiti roi.

³⁷ Aea a sisōvaita lea etau mere are aite voa itei asaita etau ve maea feare kao, are kōni mere varo, etau haria ve mere varo.

³⁸ A—, Ualare sa haikaeaita lea maea arero miaraitore, etau mere farafarapo ereve elore elore maea fefeare.

³⁹ Sarōva foromai ta mai farakeka kao; a—, karu ve maeasarōva farakeka, aeata animala aea ori aea ekaka ere ta ereve elore elore maeasarōva hariaharia ia.

⁴⁰ Kauri etau ve maea rauapo, aeata mearovaeka ve etau maea ta rauapo; a—, kauri ve etau ve maeahoahoa ta haria, aea mearovaeka ve etau ve maeahoahoa ta haria.

⁴¹ Sare ve sosorusosoru ta haria aea papare ve sosorusosoru ta haria, aea koru ve sosorusosoru ta haria, aea koru farafarapo ve sosorusosoru ta hariaharia.

⁴² Opi ata itoita karu ta lōfeare. Arero sisōvi, puruta leitita, arero puruta auke voa moravai roi.

⁴³ Arero maea hilara ita sisōvaita, arero maea misuru voa moravai roi. Arero maea pui ita sisōvaita, arero rofo voa moravai roi.

⁴⁴ Arero mearovaeka maea ita sisōvaita, arero arahoha maea voa moravai roi. Sarōva maea eaeita, a—, arahoha maea ta la eaea.

⁴⁵ Ipi Safu Buka voa o mō uka sisea, Omopa kofa Adamu makuri karu leipe, a—, aite kofa Adamu makuri miaraita arahoha reha.

⁴⁶ Arahoha maea omopa kofa etau kao, a—, sarōva maea omopa etau reha, arahoha maea are aite etau.

⁴⁷ Omopa kofa vita tetere voa forerōpe, a—, lea aite vita kauri voa fauka pea.

⁴⁸ Tetere ve karu ere usoso tetere voa forerōpe lea vita fefeare; kauri ve karu ere usoso kauri voa fauka peita lea vita fefeare.

⁴⁹ Ereita tetere voa forerōpe vita ve opape la maravaita lōfefeare, ereita kauri voa fauka peita vita ve opape fefeare ta maravai roi.

⁵⁰ Paumarehari e, ara moipeta o ve eite meha, maeasarōva ovo ita Ualare ve basileia voa soa levi ovai roi; aea puruta leita etau, puruta leiti auke etau voa ta soa levi ovai roi.

⁵¹ Mapaia, ara hohore etau ero la moipea meha. Ereita foromai ivutu levi iroropai roi, a—, ereitaro farehoria toarōrisai roi,

⁵² utohoa soa voa, ovo pute kaputaita soa voa, aite kofa fōfōaita lea u ve soa voa. Ipi u fōfōai roi, aea opaita karu puruta auke lei itoteai roi, aea ereitaro ta toarōrisai roi.

⁵³ Ipi mea puruta leita maea are puruta leiti ore auke leita lea etau la au mopai roi, aeata mea opaita etau are opai ore auke leita etau la au mopai roi.

⁵⁴ Soka mea puruta leita etau puruta leiti ore auke leita etau la mopi roroka lei, aea mea opaita etau opai ore auke leita etau ta mopi roroka leitita lea mea, Safu Buka voa mō uka siseita o la okofa lei forerai roi: Makuri opai la ovi aieri lei veverapi kaleita meha.

⁵⁵ Opai e, ave ovi aieraita siahu leavoa? Opai e, ave teavi sauai leavoa?

⁵⁶ Opai ve teavi sauai iri kaiae reha, aea iri kaiae ve siahu ukōpe Safu O reha.

⁵⁷ A—, Ualare la maeatia, ereitaro ovi aieraita siahu la ereitave Papuvita Iesu Keriso voa miaraita lea Ualare.

⁵⁸ Lea vei, arave haikakare paumarehari e, haitarōva lei, haiiri lula auke ita roroava; Papuvita ve tivi voa rofo rovaea lei pepeava, ipi e ore eve heafo Papuvita ve tivi voa merava leiti sore.