1 Korinito 14 - Testamenta Áre 1983 (Toaripi PNG)

Uri sa moita o hariaharia

¹ Haikakare haihahari ita lei vovo roroava, a—, Arahoha sa miaraita meru maeamaea ta metakao elia, etau rovaea e peroveta o la itoro ari vei.

² Ipi uri sa o hariaharia moita lea karu areve o karu la moi sore, a—, Ualare la moi vovea; ipi areve o ve eite karu ore kao, a—, are Arahoha voa hohore etau la moi vovea.

³ A—, peroveta o la itoro arita lea karu are karu la kurea asi rofo lei vovoro leiti vei moi vovea.

⁴ Uri sa o hariaharia moita lea karu are elore maea la lei asa vovea; a—, peroveta o la itoro arita lea karu are ekalesia la lei asa vovea.

⁵ Ara haikaeai e foromai uri sa o hariaharia moi vei, a—, arave haiiri rovaea kofa e peroveta o itoro ari vei. Peroveta la itoro arita lea karu ve eite rovaea, a—, uri sa o hariaharia la moita karu ve eite seika, karu aea sa ekalesia la lōri toarai vei areve o mavitoai auke leit’ oria.

⁶ Paumarehari e, ara uri sa o hariaharia moi vei ero tai foreraita, a—, ara ero lei lareva leafeare leiti roi? Ara Ualare ve hohore etau la muiaita o, ō haiovoro o, ō peroveta o, ō satiriaraita o ita ero tai foreri omoi auke leitit’ oria, ara ero lei lareva levi leiti roi.

⁷ Usoso mōfeare, makuri auke fi foroe etau, mioho varo, kitara varo, horahora ita fōfōaita ō toaita soa, fi ve eite kofa leisa ore leiti roi?

⁸ Marehaukaita u ta reha, are fi sukasuka ari auke leitita, a—, karu maea la marehaukai vei kekese leiti vei leisa leiti roi?

⁹ E ta lōfeare; e uri sa eite ovava auke o hariaharia la moita, a—, lea o leisa mapi ore leiti roi? Eve o mea sa toa fu a’ kaleiti roi.

¹⁰ Mearovaeka voa sukavaita uri hariaharia rauapo kofa ia, a—, eite auke uri aea kasirau.

¹¹ A—, ara areve uri ve eite ore auke leitita, a—, ara lea laua sukavaita vita voa karu haria lei are ta ara voa karu haria loita reha.

¹² E ta lōfeare; e Arahoha ve meru etau hariaharia la ovai vei haihahari leitita lea vei, ekalesia la turi moravaita otiharo la metakao elia.

¹³ Lea vei uri sa o hariaharia moita lea karu, are Ualare la loki leitia lea uri la mavitoa eite muiaita meru ve siahu ta ovai vei.

¹⁴ Ipi ara uri sa o hariaharia Ualare la loki leitita, a—, arave ove sa loki sukaraita reha, a—, arave haiiri lea loki voa kasirau.

¹⁵ Soka ara leafeare leiti roi? Ara arave ove ita Ualare la loki leiti roi, aeata ara arave haiiri ita ta loki leiti roi; ara arave ove ita haiiri ita Ualare la maeatita fara ferai roi.

¹⁶ Lōfeare leiti auke leitita, a—, a Ualare la marase arita lea mea, ave uri sa moita o la haveva karu are ave o ve eite ore auke leitit’ oria, are Amene o lea’ lei topiari ari roi?

¹⁷ A Ualare la marase metori arita varo, a—, eite lea karu haria la ave o sa levi toarai roi.

¹⁸ Ara Ualare la maea la atipea, ara uri sa o hariaharia moita siahu voa ero foromai la sapatai.

¹⁹ A—, ekalesia kokorukaita soasoa voa, ara o mai‐itai‐fere arave haiiri ita moita, karu haria la satiriaraia vei, lōfeare lareva ia; a—, o sivirikapo uri sa o hariaharia voa moita, lōfeare mai lareva kasirau.

²⁰ Paumarehari e, e atutemori feare haiiri levi seseōvaia; mai kaiae voa popora feare leitia, a—, eve seseōvaita haiiri voa karu sora leitia.

²¹ Safu Buka voa o mō uka sisea, Papuvita o mō auai, Ara uri hariaharia sukavaita karu aea oti haria karu ve ape poe ita sa mea toruipi karu la omoi roi; a—, lōri leitita, a—, arave karu araro levi mapai roi.

²² Lea vei uri sa o hariaharia moita siahu are sukaerereaita karu vei peise kao, a—, sukaerereai auke leita lea karu vei; a—, peroveta o itoro arita siahu are sukaerereai auke leita lea karu vei peise kasirau, a—, sukaerereaita karu vei.

²³ Soka ekalesia foromai oti farakeka voa kokoruka, aea ere farehoria uri sa o hariaharia ita meimei arita, a—, koravasa karu ō sukaerereai auke karu oropait’ oria, ere mō ari roi, E maeakakare arai.

²⁴ A—, karu foromai peroveta o arita, a—, sukaerereai auke karu aea, ō koravasa karu aea oropaita, a—, e karu foromai ve o la mapi arero kurea, arero seseōvi kaiae o ari roi,

²⁵ aea areve murufa haiiri pisiri voa muia, are soso oti sosorokapi iavi, Ualare la maso toa, mō o ta a’ vavavai roi, Okofa Ualare eve aru voa laipea.

Ekalesia sa kokorukaita mai

²⁶ Soka paumarehari e, arave o ve eite meha: e kokorukaita soasoa voa, e elore elore fara ita, ō satiriaraita o ita, ō hohore etau la muiaita o ita, ō uri sa moita o hariaharia ita, ō lea o la mavitoaita o ita, lōri forera popōvi, lea etau foromai la karu toarai vei leitia.

²⁷ Karu uri sa o hariaharia moit’ oria, a—, karu orakoria ō oroisoria haria sa omoia, elore elore soasoa voa, aea karu farakeka aea ta lea o ve eite la mavitoa mavitoa a’ omoia.

²⁸ A—, lea uri sa moita o hariaharia la mavitoa eite muiaita karu auke leitit’ oria, lea uri sa o hariaharia karu la lei ere ekalesia ve kokorukai voa ape kavuari, ereve elore elore haiiri voa Ualare la o murufa omoia.

²⁹ Peroveta karu orakoria ō oroisoria ta Ualare ve ovoro la itoro aria, aea karu haria sa lea ovoro la mapi haiiri voa seseōvaia.

³⁰ A—, eve kokorukai voa aiseseita karu aea areve haiiri voa Ualare voa ovoro sukaeaita, a—, omopa karu la lei are o auke ita taia.

³¹ Ipi e karu foromai eve elore soasoa voa peroveta o arita ore, karu foromai la satiriōri vovoro lei kureai vei.

³² Peroveta o la itoro arita karu ere Ualare ve ovoro la omoita siahu la ovi itoro lōri arita ore.

³³ Ipi Ualare are avukakaeaita mai ve Ualare kao, a—, tairu lei totoeaita Ualare. Usoso Ualare ve karu ve ekalesia foromai voa leitita lea mai feare,

³⁴ uamori eve kokorukai voa o auke ita roroava. Ovoro omoita soa la erero levi miaraia, a—, ere siahu ve ipi voa kakeva lei pepeava, usoso Iuda karu ve Safu voa uka siseita o fefeare.

³⁵ Ere etau la ore leiti haikaeaita, a—, ere elore elore vita heaea la uvi voa lalasi leitia; ipi ua ekalesia ve kokorukai voa omoita maeamariti mai reha.

³⁶ Aita! Ualare ve o e voa pea forerōpe ei, ō lea o ero tai haria foreri pea ei?

³⁷ Karu aea areve haiiri voa mō seseōvaita, are peroveta vita ō are Arahoha ita vita lei meita, a—, are ore leiti roi, ara ero ukaipeta mea o Papuvita sa moita o meha.

³⁸ Karu farakeka aea mea o la haiarara leitit’ oria, arero ta lōri lei kōutoavaia.

³⁹ Soka paumarehari e, peroveta o arita siahu la ovai vei haikakare leitia, aea uri sa moita o hariaharia ta o erere levi aria.

⁴⁰ A—, etau foromai la mai haura ita, soasoa kofa voa leitia.