1 Korinito 13 - Testamenta Áre 1983 (Toaripi PNG)

Haikakare

¹ Ara karu ve uri, aeata aneru ve uri voa laua sukavaita, a—, haikakare leiti auke leitita, a—, ara toa tutururu oita auri feare, aea kakafare arita kopa loita reha.

² Aea ara peroveta o ovaita, aea ara hohore etau foromai la, aea haiore foromai ita la ore leitita, aea ara haiiri foromai ita sukaereraita, raepa la fareōvi kikiai vei, a—, haikakare leiti auke leitita, a—, ara eite auke loita reha.

³ Ara arave etau foromai merava karu la miōri kaleitita, aea arave maea la a sa sari vei miaraita, a—, haikakare leiti auke leitita, a—, lea etau araro lei lareva leiti sore.

⁴ Haikakare kitou auke haiiri ita mea savori lei vovea, maeaforoe lei vovea; haikakare hilisi leiti sore; areve elore maea vei hiva ari sore, maeamarōva ta leiti sore;

⁵ maeamariti mai leiti sore, elore etau la eli sore, kitou utohoa leiti sore; kaiae leitita lea la haikaea vovo mei sore;

⁶ karu ve kaiae vei hailareva leiti sore, a—, areve hailareva haura voa.

⁷ Haikakare kaiae foromai la morari vovea, o foromai la sukaererea vovea, etau lareva la haikaea tai vovo mea vovea, etau foromai voa rofo lei vovea.

⁸ Haikakare soa levi kaleiti roi; a—, peroveta o arita, lea kaleiti roi; uri hariaharia sukavaita, lea ve soa sarapai roi; haiore etau ta ovi aierai roi.

⁹ Ipi itua taheka haria ereita ovi ore leititore, aeata itua taheka haria ereita ovi peroveta o aritore.

¹⁰ A—, kekese leitita soa foreraita lea mea, itua la ovi aierai roi.

¹¹ Ara siare soa voa meiape lea soa, siare feare laua sukavaiape, ara siare feare haikaeaiape, ara siare feare haiiri voa seseōvaiape; a—, faitora ara heavita loi, ara siare ve etau la kiripi la mea.

¹² Ipi faitora soa ereita ma‐ove ōpo‐ōpo voa ofae eavaitore; a—, lea soa voa ereita soso tataea eite kofa ofae eavai roi; faitora ara itua la haria ore; a—, lea soa voa Ualare sa araro ore leita lōfeare, ara ta ore leiti roi.

¹³ Soka faitora sukaerereaita haiiri, aea au taita haiiri, aea haikakare ita laepepea, lea oroisoria; a—, lea oroisoria ve rovaea kofa farakeka, haikakare are reha.