1 Korinito 12 - Testamenta Áre 1983 (Toaripi PNG)

Safu Arahoha ve meru hariaharia

¹ Soka, o aeata meha ipi Safu Arahoha voa foreraita meru vei. Paumarehari e, ara haikaeai kao e haveva lea meru vei leiti vei.

² E ore e evera murumuru soa voa roroaiape lea mea, ero okuku apeva ualare ve ove sa mai hariaharia voa lariōvi tera vovo roroaiape.

³ Lea vei ara haikaeai e ore leiti vei Ualare ve Arahoha ita sukavaita lea karu Iesu la sukahoroaita o omoita ore kao, aea Safu Arahoha voa pei auke leita karu Iesu are Papuvita lea o ta omoita ore kao.

⁴ Maeaforoe sa miaraita meru rauapo mai hariaharia ia, a—, eite Arahoha are farakeka haria.

⁵ Toaraita tivi mai hariaharia ia, a—, Papuvita are farakeka.

⁶ Leita mai hariaharia ia, a—, Ualare are farakeka haria, etau foromai la karu foromai voa leitita lea Ualare.

⁷ Soka Arahoha sa muiaita etau karu la elore elore miaraitore ipi karu foromai la lei lareva leiti vei.

⁸ Haiovoro ve o karu farakeka aea la Arahoha sa miaraitore, karu aea la haiore ve o lea Arahoha farakeka sa miaraitore.

⁹ Lea Arahoha farakeka sa karu aea la sukaerereaita haiiri la miaraitore, aea karu aea la eka la lei lareva leita siahu miaraitore.

¹⁰ Karu aea lea Arahoha voa haihava leita etau la leita siahu la ovai; karu aea peroveta o la arita siahu, karu aea ove foromai la seseōvi ore leita siahu, karu aea uri hariaharia la sukavai vei, karu aea lea uri hariaharia ve eite mavitoa omoi vei.

¹¹ Lea siahu foromai Ualare ve Arahoha farakeka haria voa foreraitore, aea are meru hariaharia la karu elore elore lōri aiorai vovea, are sa haikaeaita lōfefeare.

Maea farakeka voa toepi siseita etau rauapo

¹² Ipi Keriso are usoso maea farakeka feare, aea lea maea toepi siseita etau rauapo ia; are maea farakeka haria, eite areve toepi siseita firufiru rauapo.

¹³ Lōfeare mai ita Arahoha farakeka sa ereitaro foromai la maea farakeka voa bapatiso leiape, Iuda karu varo, toru hariaharia karu varo, fasaita sarufa karu varo, au roroaita karu varo, a—, Arahoha farakeka ma feare ereitaro miōri lalape.

¹⁴ Soka maea farakeka voa toepi siseita etau farakeka haria sa kasirau, a—, rauapo.

¹⁵ Mora o mō aritōva, Ara mai kasirau, lea vei ara maea ve etau kao, a—, lea o eite kao, are lōfeare levi leiti roi.

¹⁶ Ōvauta ta o mō aritōva, Ara ofae kasirau, lea vei ara maea ve etau kao, a—, lea o eite kao, are lōfeare levi leiti roi.

¹⁷ Maea foromai ofae sa haria leitita, a—, ōvauta sa mapaita lea leafeare leiti roi? Maea foromai ōvauta sa haria leitita, a—, etau leafeare muriai roi ei?

¹⁸ Eite Ualare sa maea voa toepi siseita etau la maea ve iri voa miavi laisisea, farafarapo are sa haikaeaita lea mai feare.

¹⁹ Ere foromai maea voa toepi siseita etau farakeka haria leitita, a—, maea leafeare leiti roi ei?

²⁰ Eite maea voa toepi siseita etau rauapo ia, a—, maea are farakeka haria.

²¹ Lōfeare vei, ofae mai la haikaeai auke o la arita ore kao; harofave ta mora la haikaeai auke o la arita ore kao.

²² Kasirau, a—, maeapatoita feare lea siseita maea ve iri etau ere maea voa tivi rovaea leititore;

²³ aea ereita maeati seika o ere vei omoita lea maea ve etau la ereita kiva kofa leititore; aeata ereita ere vei maeamariti leita lea maea ve etau la ereita haihahari ita kiva kofa leititore;

²⁴ a—, maea voa toepi siseita etau maeahoahoa la ereita lōfeare kiva leiti sore. Ipi Ualare sa maea la toepaita mai mōfeare, eite seika leita lea etau la lei maeati rovaea ita leititore.

²⁵ Lōfeare vei maea voa faeafaea oita mai levi leiti vei, a—, maea voa toepi siseita etau foromai farehoria haihahari ita kiva leiti vei.

²⁶ Toepi siseita etau farakeka aea hehea leitita, a—, toepi siseita etau foromai hehea are ita farehoria loita reha; aea toepi siseita etau aea ve fari moravaita, a—, toepi siseita etau foromai hailareva are ita farehoria loita reha.

²⁷ Soka e farehoria Keriso ve maea, aea e farafarapo areve maea voa toepi siseita etau etau.

²⁸ Ekalesia voa Ualare sa elore elore tivi otioti voa karu la vipi laepepea; omopa kofa oti voa aposetolo karu, aite peroveta o oita karu, aea oroisoria oti voa satiriaraita papukaru, aite haihava leita siahu karu, aite eka la lei lareva leita karu, aea toaraita tivi karu, aea tivi lariōvaita karu, aea uri hariaharia sukavaita karu.

²⁹ Karu foromai aposetolo karu ei? ō peroveta karu ei? ō satiriaraita papukaru ei? Karu foromai haihava leita siahu karu ei?

³⁰ Ō eka la lei lareva leita karu ei? ō uri hariaharia sukavaitore ei? ō lea uri hariaharia ve eite mavitoa muiaitore ei?

³¹ E haihahari ita eite rovaea meru la ovai vei elia. A—, leita mai lareva kofa ara faitora ero muiai vei la roi.