1 Korinito 11 - Testamenta Áre 1983 (Toaripi PNG)

¹ E arave leita mai la ruruiaia, usoso ara ta Keriso ve mai la ruruiaita feare.

Ualare la maso toaita mai vei

² Ara ero maea la atipea ipi etau foromai voa e araro haikaea vovea, aea e lea satiriaraiape o la sesearai vovea, usoso ara ero lei ore leiape lōfeare.

³ A—, ara haikaeai ero lei ore leiti vei, karu foromai ve harofave vita Keriso reha, aeata ua ve harofave vita areve vita reha, aea Keriso ve harofave vita Ualare reha.

⁴ Areve harofave la puta sa haropi Ualare la loki leitita aea peroveta o arita lea heavita, Keriso ve fari la hasiavaitore.

⁵ Areve harofave la haropai auke aea Ualare la loki leitita, aea peroveta o arita lea ua, areve vita ve fari la hasiavaitore; ipi are ta haro miriare ua ita mai farekeka feare loita eavia.

⁶ Ipi ua aea areve harofave la haropai auke leitita, are areve tui ovotōlo saerea hoholiri leitita lea lareva ia; a—, ua tui ovotōlo saerea, ō haro miriare leitita, lea maeamariti ita leitit’ oria, a—, are haro puta sa haropaia.

⁷ Heavita areve harofave la haropaita, lea lareva kao, ipi are Ualare ve opape feare aea Ualare ve sosorusosoru muiaita etau eavia. A—, ua are vita la lei sosorusosoru leita etau.

⁸ Vita ua voa forerai kasirau, a—, ua vita voa forerōpe.

⁹ Vita ua vei pisosi kao, a—, ua vita vei pisosipe.

¹⁰ Lea vei ua vita ve siahu ve peise sa areve harofave haropaita lea mai haura reha, ipi aneru sa ofae fofoisai ave.

¹¹ Etau farakeka ereita Papuvita voa roroaita mai voa, ua are elore maea haria kasirau, avita ita farehoria, aea vita ita elore maea haria kasirau, a—, ua ita farehoria.

¹² Ipi usoso ua oarehōva soa vita voa fareōvi pisosipe, lōfeare faitora soa vita ua voa lea vei foreraitore. A—, eite etau foromai Ualare voa foreraitore.

¹³ Soka eve elore elore haiiri aura seseōvai; ua areve harofave la puta sa haropai auke ita Ualare la veveu leiti vei, lea mai lareva ei?

¹⁴ Mea mearovaeka sa leita mai ero satiriōri lei ovava leiti kao ei? Heavita tui savori ita meita, maeamariti etau reha,

¹⁵ a—, ua tui savori ita meita, etau maeahoa reha. Ipi areve tui ve savori la areve harofave la aierai vei miaraitore.

¹⁶ A—, karu aea mea laua vei o serea ari haikaeaita, a—, arave tava o meha: ela leita mai haria la ore lei leiti sore, aea Ualare ve ekalesia firufiru ta mai haria la ore lei leiti sore Ualare la maso toaita soasoa voa.

Areto

¹⁷ Ara mea o la ero maeati auke ita moi; ipi e kokorukaita soasoa voa, lareva sa forerai sore, a—, maealolo sa foreraitore.

¹⁸ Omopa o meha, ara fari mapai e ekalesia voa kokoruka roroaia lea soasoa voa faeafaea rauapo e voa ia. Arave haiiri lea fari ve itua okofa ia.

¹⁹ Ipi haiiri faeafaea a’ o serea elore elore eve aru voa ia, mai kofa leita karu sa eve aru voa lōri lei ore leiti vei.

²⁰ E kokoruka roroaita lea soasoa voa e Papuvita ve Areto mai kofa ita lari sore.

²¹ Ipi larietau larita lea soasoa voa e elore elore larietau la lalō vovea; karu hea eroa sa’, karu hea uaina rauapo la’ la’ maeakakare araitore.

²² Se! e uvi kasirau ei, larietau ita ma ita lōvoa lari vei ei? E Ualare ve ekalesia la sukavutea, aea merava karu la lei maeamariti leiti haikaeaitore ei? Ara o lekōru la ero moi roi? Ara mea etau voa ero maeati ei? Kakaeite kofa!

²³ Ipi ara Papuvita voa ovi ero satiriōri miarōpe lea o meha, Papuvita Iesu la kivaia lei paeai vei miarōpe lea faita voa, faloa koru la mai sa ovi, aea are Ualare la maeati o mei roroka lei, arero fofi, mō ōpe,

²⁴ Arave maea meha, e vei topukovi miaraita meha; mea la araro haikaeai vei leitia.

²⁵ Lōfeare mai ita, larietau la roroka leipe soa, are kōkuveisa ta fareōvi, mō ōpe, Mea kōkuveisa arave ovo sa arita otoare áre meha, e larita lea meamea araro haikaeai vei leitia.

²⁶ Ipi e mea faloa koru aeata mea kōkuveisa ita la larita lea meamea, e Papuvita ve opai lōri itoro a’ a’ tetetete are kotita soa voa.

²⁷ Soka mea faloa koru aeata Papuvita ve kōkuveisa la haiiri merava ita larita lea karu, Papuvita ve maea aea ovo ita la lei hasiavaita reha.

²⁸ Karu areve elore haiiri la omopa seseōvi roroka lei, aea aite voa faloa koru la aeata kōkuveisa voa lōri lari vei.

²⁹ Ipi faloa koru la aeata kōkuveisa voa la’, Papuvita ve maea ve eite la ore auke leita lea karu, are elore maea la seseōvi kaiae o la ovaita reha.

³⁰ Ipi lea mai vei e voa pepeita karu rauapo maea iri ororo lei aeata eka la leipea, aea karu hea ta opi opi laisisea.

³¹ A—, ereita elore elore haiiri la okofa ita seseōvait’ oria, ereita Ualare sa seseōvi tava miaraita soa voa levi forerai roi.

³² Etau farakeka, Papuvita sa ereitaro seseōvi aea tava miaraita lea vei, ereitaro mearovaeka ita fareho seseōvi kaiae o levi ari vei.

³³ Paumarehari e, e areto lari vei kokorukaita lea meamea, e elore elore taia tetete karu foreri kekese leita soa.

³⁴ Karu farakeka aea eroa sarita, a—, uvi voa larietau evera laria, ero kaiae o Ualare sa ari ave, e kokorukaita lea mea. I aua hohoi hariaharia vei, ara ero tai kotita lea mea ara ero satiriōri lei kekese leiti roi.