1 Korinito 10 - Testamenta Áre 1983 (Toaripi PNG)

Maso ove etau la sukavuteaita o

¹ Paumarehari e, ara haikaeai e ore leiti vei, ereitave papa‐ita mea‐e ve ora voa roroaiape, aea makaikara ve aru voa ufa puavōpe,

² aea lea mea‐e voa aeata lea makaikara voa erero Mose voa bapatiso fefeare leiape.

³ Ere arahoha larietau farakeka la lalō puavaiape;

⁴ aea ere erero aitetaiape fave voa ma lalape, lea fave eite Keriso reha.

⁵ A—, Ualare ereve karu rauapo kofa vei haiiri lareva leiti kao, ipi erero furuka merava voa paea opi opi kaleiape.

⁶ Soka lea etau foromai kureaita peise ereita vei; ereita mai maealolo la hai levi kaeai vei, ere sa haikaeaiape lōfefeare.

⁷ Apeva ualare ve ove la maso levi toaia, ere karu hea sa leipe lōfefeare. Usoso Safu Buka ve o feare, Lea karu larietau ma ita la lari vei avi, aea havōu leiti vei itoteōpe.

⁸ Ereita herei levi leitia, ere karu hea sa leiape lōfeare, aea sare farakeka voa karu 23,000 hohōroōpe.

⁹ Ereita Papuvita la lei kitou leiti vei levi seseōvaia, ere karu hea sa lōfefeare lei, ikaroa sa erero saroroapōpe.

¹⁰ Aeata o vituvitu levi aria, ere karu hea sa o vituvitu ape lōfefeare, aea erero Opai ve Aneru sa saroroapōpe reha.

¹¹ Soka lea etau erero leiape ipi peise vei; lea fari ta ukaiape ereitaro kureai vei. Ipi ereita soa sarapai vei leita soa voa foreri la roroa.

¹² Lōfeare vei areve haiiri sa seseōvi are soi kere peipeta lea karu kiva leitia, are putoi ave.

¹³ Ero vutea e mai kaiae leiti vei lōfeare soasoa la karu foromai sa ore leititore. Ualare are okofa; are ero toari, eve rofo la lei usoso leiti vei, ero vuteaita soa voa kaiae sa ero ovi aierai ave; are ero vuteaita soa voa safaukaita otiharo la ero miōri, ero lei rofo leitita ore.

¹⁴ Soka arave haikakare leita karu e, apeva ualare la maso toaita mai la kiripi soeaia.

¹⁵ E haisesera karu, ara lea vei mea ovoro ero la moipea, ara ero moipeta o la seseōvi ore leitia.

¹⁶ Ereita Areto soa voa ovi Ualare la o lareva arita lea kōkuveisa, ereita are voa larita soa Keriso ve ovo voa are ita fareho vei. Aeata ereita fofaita lea faloa koru, ereita la’ Keriso ve maea voa are ita fareho lei roroai vei.

¹⁷ Ipi faloa koru farakeka eavia, ereita ta karu rauapo, a—, ereita maea farakeka lei pepea, ipi ereita foromai faloa koru farakeka la farehoria loloita eavia.

¹⁸ Israela karu sa leita mai la haiiri voa seseōvaia; omopa posaseaita larietau la larita lea karu, ere alitara ve maso tivi ita fareho leiti kao ei?

¹⁹ Ara moipeta o ve eite lekōru? Apeva ualare ve ove la omopa posaseaita lea larietau eite ita varo ei? Ō apeva ualare ve ove eite ita varo ei?

²⁰ Kakaeite! Arave o ve eite meha, toru hariaharia karu sa savaita lea etau la ere harisu vei omopa posasea vovea, a—, Ualare vei kao. E harisu ita fareho leitita, ara lea la haikaeaia kao.

²¹ E Papuvita ve kōkuveisa aea harisu ve kōkuveisa ita farehoria larita ore kao. E Papuvita ve larietau posa voa aeata harisu ve larietau posa voa larietau farehoria larita ore kao.

²² Ereita Papuvita la lei hilisi leiti vei ei? Ereitave rofo areve rofo la sapataita ore ei?

²³ Karu sa moita o meha: Etau foromai safu kao ereita vei. Okofa, a—, etau foromai ereitaro lei lareva leitita etau kao. Etau foromai safu kao, a—, etau foromai ereitaro toaraita etau kasirau.

²⁴ Karu areve haria maea ve lareva la levi elia, a—, areve haekao peita karu ve lareva ta reha.

²⁵ Itaea leita oti voa itaea leitita sarōva foromai la lalasi o auke ita laria, eve seseōvaita haiiri la lei horahora leiti ave.

²⁶ Ipi mearovaeka areve ovi roroaita etau foromai ita Papuvita ve reha.

²⁷ Ekalesia auke karu ero sosoka lari vei isa, aea e terai vei kakeva leitit’ oria, aro omopa posaseaita larietau lalasi o auke ita laria, eve seseōvaita haiiri la lei horahora leiti ave.

²⁸ A—, karu farakeka ero mō ari oria, Maso toa miaraia etau meha; a—, aro o lōri moita lea karu vei, aeata ipi seseōvaita haiiri la lei horahora leiti ave, lea sarōva la levi laria;

²⁹ Lea o ve eite ave elore seseōvaita haiiri kao, a—, ipi areve haiiri veia. Eve lalasi o mōfeare varo, Karu haria ve seseōvaita haiiri sa arave pisiri lei meita mai la sukelapaita ipi levea?

³⁰ Ara Ualare la maeati o ita larietau ovi larita, a—, lōri leita larietau vei karu araro kaiae o arita ipi levea?

³¹ Lea ve ipi e larietau la larita, aea e ma la larita, aea e etau hariaharia la leitita, a—, e Ualare la lei sosorusosoru leitia.

³² E etau aea la levi leitia, Iuda karu aea Helene karu, aea Ualare ve ekalesia karu ita la lei safosafoa putoi ave.

³³ Ara ta lōfeare, ara leita etau foromai voa ara karu foromai la lei hailareva leiti vei haikaeai eli vovea, arave elore maea ve lareva la eli sore, a—, karu rauapo ve lareva la eli vovea, erero fareōvi makuri leiti vei.