1 Korinito 1 - Testamenta Áre 1983 (Toaripi PNG)

¹ Paulo, Ualare sa haikaeōpe lea vei, Keriso Iesu ve aposetolo leiti vei isōpe, aeata ereitave marehari Sosetene ita sa ukaita karoro meha,

² Ualare ve ekalesia Korinito karikara voa, Keriso Iesu voa safu lei, Ualare ve karu leiti vei isaiape lea karu, aeata karu foromai otioti foromai voa ereitave Papuvita ve rare la isaita lea karu veia, ereve Papuvita aea ereitave ta reha.

³ Haiforoe leita meru aea ereitave Oa Ualare aea Papuvita Iesu Keriso ita sa miaraita tairu e voa lei peava.

Lei lareva leita o

⁴ Ara Ualare la e vei maeati vovea, Ualare ve haiforoe leita meru, Keriso Iesu voa e ovi roroaita lea meru vei.

⁵ Ipi etau foromai voa e are voa pisoso rauapo la maravi roroa, ovoro hariaharia aea haiore foromai ita.

⁶ Keriso vei ore leita lea o e voa kere lei peita,

⁷ lea vei e sa ovai auke leita meru aea eaeia kasirau, e Papuvita Iesu Keriso la pisiri muiaita soa la tai vovo roroaita lea mea.

⁸ Are ero lei kere popōvi pepe soa sarapaita soa voa, ereitave Papuvita Iesu Keriso ve sare voa kaiae o ero levi ari vei.

⁹ Ualare are okofa, aea are ero isōpe areve Atute, ereitave Papuvita Iesu Keriso ita maeapavora leiti vei.

¹⁰ Paumarehari e, ara Papuvita Iesu Keriso ve rare ita ero loki la leipea, e haiiri farakeka ita laua sukōvi, aea e voa faeafaea arita haiiri hai levi kaeaia; a—, e farehoria haiiri farakeka lei haiiri seseōvaita mai farakeka voa roroai vei.

¹¹ Ipi paumarehari e, ara Keloe ve uvi karu sa mei eve fari mōfeare la mapai, e voa o serea elore elore rauapo ia.

¹² Arave o ve eite meha, e elore elore o mō ō vovea, Ara Paulo ve, aeata, Ara Apolosi ve; karu hea ve o, Ara Petero ve, hea ta, Ara Keriso ve.

¹³ Keriso faeafaea a’ meitore ei? Paulo la satauro voa paea opōpe ei? Ero Paulo ve rare voa bapatiso leiape ei?

¹⁴ Ara Ualare la maeati, ara ero farakeka aea la bapatiso leiti kasirau, a—, Kerispo auke Gaio ita la haria.

¹⁵ Soka ero Paulo ve rare voa bapatiso leiape e lea o la omoita ore kao.

¹⁶ Eite ara Setefana ve uvi karu ta bapatiso leipe; ara karu haria la bapatiso leipe varo, ara lea la haisafai.

¹⁷ Ipi Keriso araro karu la bapatiso leiti vei itapai kao, a—, ipi Ovoro Lareva la itoro ari vei; a—, lea itoro o karu ve haiore o ita kasirau, Keriso ve satauro la lei areve siahu auke ita feare leiti ave.

Ovoro ipi Satauro vei

¹⁸ Ipi opai ve otiharo voa roroaita lea karu vei Keriso satauro voa opōpe o maeakakare feare; a—, makuri ve otiharo voa ereita roroaipeta karu vei are Ualare ve siahu reha.

¹⁹ Safu Buka voa uka siseita o fefeare, Ara haiore karu ve haiore la saroroapi, aea ereve ore leita karu ve haiovoro la sukavuteai roi.

²⁰ Haiovoro karu leavoa? Safu Karoro ore karu leavoa? Mea soa ve laua seseōvi serea elore elore oita karu leavoa? Ualare mearovaeka ve haiovoro la toarōrisa maeakakare leiti kao ei?

²¹ Ipi Ualare ve haiovoro mōfeare: mearovaeka haiore sa lei Ualare la ore auke leiape soa voa, Ualare hai mō kaeōpe itoro oita lea ovoro maeakakare sa lei sukaerereaita lea karu la fareōvi makuri leiti vei.

²² Iuda karu siahu ve peise vei lalasi lei vovea; Helene karu haiore la haikaea vovea;

²³ a—, ela satauro voa paea opōpe Keriso la itoro ō vovea, Iuda karu vei erero lei safosafoa putoita etau, aea toru hariaharia karu vei are maeakakare etau;

²⁴ a—, Ualare sa haikaea isōpe lea karu vei, Iuda karu aeata toru hariaharia karu vei, are Keriso, Ualare ve siahu aeata haiore are reha.

²⁵ Ipi Ualare ve maeakakare sa karu ve haiore la sapatai, aea Ualare ve maeapatoita sa karu ve rofo ta sapatai.

²⁶ Paumarehari e, Ualare sa ero isaita mai la haikaeaia, e voa karu sa seseōvaita haiore karu rauapo kao, karikara harofave karu ta rauapo kao, fari koa papukoru ta rauapo kao.

²⁷ A—, Ualare mearovaeka ve maeakakare etau la ovōpe, haiore karu la lei maeamariti leiti vei; aea mearovaeka ve maeapatoita etau ta Ualare sa ovōpe rofo etau la lei maeamariti leiti vei;

²⁸ aea mearovaeka ve etau merava, aea maeati auke etau ita aea eite auke etau ita la Ualare sa haikaea ovōpe, ipi pepeita etau etau la lei kaleiti vei.

²⁹ Lea vei karu farakeka aea Ualare ve omopa voa hiva levi ari vei.

³⁰ Ualare sa ero Iesu Keriso voa lei makuri ero lei roroa, aea Keriso Iesu voa haiore aea haura aea taivotaita mai aea makuri leita siahu ita la ereitaro miōri la roroa.

³¹ Lea vei usoso Safu Buka ve o fefeare, Hiva arita lea karu, are Papuvita vei hiva aria.