1 Ioane 5 - Testamenta Áre 1983 (Toaripi PNG)

Mearovaeka la ovi aieraita siahu

¹ Iesu are Keriso lea o la sukaerereaita karu, ere Ualare ve atutemori; aea oa la haikakare leitita lea karu sa areve atutemori ta haikakare leititore.

² Ereita Ualare la haikakare lei, are sa moita o la kakeva leitita lea mea, ereita etakofa ore ereita ta Ualare ve atutemori la haikakare leititore.

³ Ipi Ualare la haikakare leitita mai ve eite meha, ereita are sa moita lea o la kakeva leiti vei. Aea are sa moita lea o la leiti vei heafo kofa kao,

⁴ ipi Ualare ve atutemori foromai sa mearovaeka la ovi aieraita ore. Mearovaeka la ovi aieraita siahu meha, ereita sa Iesu are Keriso lea la sukaerereaita lea vei.

⁵ Mearovaeka la ovi aieraita karu leisa? Mōfeare o la sukaerereaita karu sa haria, Iesu are Ualare ve Atute.

Iesu Keriso vei ore lei moita o

⁶ Arero bapatiso leipe ma aeata areve opai soa voa sisapōpe ovo ita forerōpe Vita, Iesu Keriso reha. Are ma sa haria forerai kao, a—, ma ita aeata ovo ita forerōpe.

⁷ Arahoha sa lea la ore lei okofa la moipea, ipi Arahoha are eite okofa.

⁸ Mea oroisoria sa ore lei okofa la muiai vovea: Arahoha aea ma aeata ovo; lea oroisoria sa moita o farakeka.

⁹ Ereita karu sa ore lei moita o la sukaerereaita, a—, Ualare sa ore lei moita o ve eite foromai rovaea kofa ia; ipi Ualare sa ore lei okofa moipe o ve eite areve Atute veia.

¹⁰ Ualare ve Atute la sukaerereaita lea karu, lea ve okofa la areve haiiri voa ore leititore. A—, Ualare la sukaerereai auke leitita lea karu, are Ualare la lei apeva arita Vita feare loita reha, ipi are Ualare sa areve Atute vei moipe lea o la sukaerereai auke eavia.

¹¹ Lea o mōfeare: Ualare peita makuri ereitaro miarōpe, aea lea peita makuri ve ipi areve Atute voa.

¹² Atute la seseari meita lea karu lōfeare makuri ia, a—, Ualare ve Atute la sesearai auke ita meita lea karu lōfeare makuri auke ita mea.

Peita Makuri

¹³ E Ualare ve Atute ve rare la sukaerereaita karu e, ara mea o ero la ukai ipi ero lei ore leiti vei e peita makuri ita laepepea.

¹⁴ Ereita Ualare vei haiiri rofo mōfeare ia, ereita usoso areve haikaeaita haiiri feare arero etau aea vei loki leitit’ oria, a—, are ereitaro mapaita reha.

¹⁵ Ereita arero loki leita o la are mapaita, ereita lea la ore leitita lea vei, ereita mea ta ore, ereita arero loki leita lea etau la are ereitaro miaraitore.

¹⁶ Karu aea areve marehari mai kaiae leitita la ofae eavaita, a—, eite lea kaiae peita makuri la sasaukaita kaiae kasirau, are are vei Ualare la loki leitia, aea Ualare makuri arero miarai roi. Mea o ve ipi ereve kaiae sa erero lei opai voa forerai auke leitita lea karu veia. Opai voa lei foreraita mai kaiae ia, a—, ara mōfeare omoi kao, e Ualare la lōfeare kaiae vei loki leiti vei.

¹⁷ Mai maealolo foromai kaiae reha, a—, opai voa lei forerai auke leitita kaiae ta ia.

¹⁸ Ereita mōfeare ore, Ualare ve atutemori ere mai kaiae leiti sore, a—, Ualare ve Atute sa erero kiva lei, Kaiae Vita erero mai sa levi paeai vei.

¹⁹ Ereita mōfeare ore, ereita Ualare ve karu, a—, mearovaeka karu foromai ere Kaiae Vita ve siahu ve ora voa la roroa.

²⁰ Ereita mea ta ore, Ualare ve Atute foreri laipea, aea ereitave haiiri la lei ovava lei, okofa ve Ualare la ore leiti vei. Ereita okofa ve Ualare voa laepepea, aea areve Atute Iesu Keriso voa ta reha. Okofa ve Ualare reha, peita makuri ta reha.

²¹ Arave haikakare atutemori e, e kiva leitia, e apeva ualare ve ove la kōutoaia.