1 Ioane 4 - Testamenta Áre 1983 (Toaripi PNG)

Ualare ve Arahoha aeata apeva arahoha

¹ Arave haikakare paumarehari e, arahoha ita karu foromaiapo la levi sukaerereaia, a—, erero foromaiapo la seseōvi ore leitia, ere Ualare voa foreraita varo. Ipi lohalai peroveta karu rauapo mearovaeka voa foreri la roroa.

² E Ualare ve Arahoha la mōfeare ore leiti roi, Iesu Keriso maeasarōva voa foreri meiape lea o la moita karu ere Ualare voa foreraita lea Arahoha ta ia.

³ A—, lea o la Iesu Keriso vei avoa arita karu, are Ualare ve Arahoha ita karu kasirau. Keriso ve Ote Vita ve arahoha reha. E mapi ore are koti roi, aea faitora are mearovaeka voa foreri la mea.

⁴ Arave haikakare paumarehari e, e Ualare ve karu, aea e lea lohalai peroveta karu la sapataipe; ipi e voa peita lea Arahoha siahu rovaea ia, mearovaeka ve karu voa peita lea arahoha ve siahu rovaea lōfeare kasirau.

⁵ Lea lohalai peroveta karu ere mearovaeka ve etau vei moi vovea, aea mearovaeka ve karu sa erero mapa vovea, ipi ere mearovaeka ve karu eavia.

⁶ A—, ereita Ualare ve karu, Ualare la ore leita lea karu sa ereitaro mapaitore. Ualare la ore auke leitita lea karu ereitaro mapai sore. Lōfeare mai voa ereita okofa ve Arahoha aea kaiae ve arahoha ita ve eite la seseōvi ore leititore.

Ualare are haikakare

⁷ Haikakare paumarehari e, ereita elore elore haikakare araia, ipi haikakare Ualare voa foreraitore. Haikakare araita lea karu foromai ere Ualare ve atutemori, aea ere Ualare ore.

⁸ A—, haikakare arai auke leita lea karu, ere Ualare ore kasirau, ipi Ualare are eite haikakare eavia.

⁹ Ualare areve haikakare ereita vei mōfeare muiōpe, are areve Atute farakeka haria la mearovaeka voa itapōpe, ereita are vei makuri leiti vei.

¹⁰ Haikakare ve eite kofa meha: ereita Ualare la haikakare leitita lōfeare kao, a—, are ereitaro haikakare lei, aea areve Atute la itapōpe ereitave iri kaiae la sasuka mutapai vei.

¹¹ Haikakare paumarehari e, Ualare ereitaro haikakare lōfeare leitita, a—, ereita ta elore elore haikakare leiti vei.

¹² Karu Ualare la ofae eavai sore, a—, ereita elore elore haikakare leitita, a—, Ualare ereitave iri voa pea vovea, aea areve haikakare ereitave iri voa lareva ita lei kekese leititore.

¹³ Ereita mōfeare ore, ereita Ualare voa pepeitore, aea are ta ereita ve haiiri voa peitore, ipi are areve Arahoha la ereitaro miōri laipea.

¹⁴ Ela ofae eavi ore lei, okofa ita o mō moi, Oa areve Atute la mearovaeka la lei makuri leita Vita leiti vei itapōpe.

¹⁵ Iesu are Ualare ve Atute o lōfeare moita karu ve iri voa Ualare sa pea, aea are ta Ualare voa pea vovea.

¹⁶ Soka Ualare sa ereitaro haikakare araita lea mai la ereita ore aeata sukaererea laepepea. Ualare are eite haikakare, aea haikakare voa leita lea mai voa meita karu Ualare voa peitore; Ualare ta are voa peitore.

¹⁷ Ualare ve haikakare ereitave iri voa lareva ita lei kekese leipeta ipi, ereita seseōvi tava miaraita sare voa haiiri rofo leiti vei; ipi usoso Keriso Ualare ita peita feare, ereita ta lōfeare mea mearovaeka voa.

¹⁸ Tore, haikakare ita leiti sore; a—, haikakare kofa sa tore foromai la sukavutea mutapa vovea. Tore leita lea karu ve haiiri voa Ualare areve haikakare lei kekese kofa leitia kao, ipi tore ve eite seseōvi tava miaraita lea hehea vei.

¹⁹ Ereita haikakare leitita ipi Ualare sa ereitaro omopa kofa haikakare leipe eavia.

²⁰ Karu aea mō aritōva, Ara Ualare la haikakare leititore, a—, eite are areve marehari la kaifa leitit’ oria, are apeva karu. Ipi are ofae eavaita lea marehari la haikakare arai auke leitit’ oria, are ofae eavai auke leitita lea Ualare la haikakare araita ore kasirau.

²¹ Keriso sa ereitaro moipe o meha, Ualare la haikakare leitita lea karu, are areve marehari ta haikakare leiti vei.