1 Ioane 3 - Testamenta Áre 1983 (Toaripi PNG)

Ualare ve Atutemori

¹ Haiiri seseōvaia, Oa sa ereitaro haikakare rovaea kofa araitore, ereitaro Ualare ve atutemori rare aravai vei; aea etakofa ereita areve atutemori. Lea vei mearovaeka ereitaro ore leiti sore, ipi are Ualare ta ore auke leitita eavia.

² Haikakare leita paumarehari e, ereita faitora Ualare ve atutemori, a—, ereita aite mai leafeare roroava roi, lea etau ereita haiiri ovava leitia kao. Ereita mea la haria ore, Keriso sa pisiri lei foreraita soa, ereita areve soso feare leiti roi, ipi ereita areve soso kofa la ofae eavai roi.

³ Lea haiiri ita haikaea taita karu foromai ereve elore haiiri la lei ovava lareva ita leititore, usoso Keriso ta ovava‐eka ita meita lōfeare.

⁴ Kaiae la leita lea karu foromai ere Ualare ve safu mai la miroapaitore, ipi iri kaiae ve eite safu mai la miroapaita mai reha.

⁵ A—, e ore Keriso iri kaiae la sasuka mutapai vei forerōpe, aea are voa kaiae foromai kasirau kofa.

⁶ Soka are voa pepeita lea karu foromai ere kaiae leiti sore; a—, kaiae leita lea karu arero ofae eavai sore, aeata arero ore leiti sore.

⁷ Arave atutemori e, karu aea ero apeva sa levi vuteaia. Mai haura la leita lea karu, are haura karu reha, usoso Keriso are ta haura Vita.

⁸ A—, mai kaiae la leita lea karu, are Diabolo ve karu, ipi Diabolo omopa kofa soa itiiti faitora mai kaiae la lei vovea. Ualare ve Atute sa forerōpe eite Diabolo sa leita lea mai la saroroapai vei.

⁹ Karu ere Ualare ve atutemori lei vovo roroaita, a—, ere mai kaiae leiti sore, ipi Ualare ve leita mai ve eite ere voa, aea ipi Ualare are ereve Oa eavia ere mai kaiae leitita ore kasirau.

¹⁰ Ualare ve atutemori aea Diabolo ve atutemori itai itai voa faeaita mai mōfeare sa muiaita ore: mai haura leiti auke leita aeata areve marehari la haikakare arai auke leita lea karu are Ualare ve karu kasirau.

Elore elore haikakare leiti vei

¹¹ Ipi omopa kofa soa voa e mapōpe ovoro meha: ereita elore elore haikakare leiti vei.

¹² Ereita Kaino feare levi leiti vei; are Kaiae Vita ve karu aea areve elore marehari Abela la paeōpe. Kaino arero paeōpe ipi levea? Ipi are sa leipe lea etau kaiae, a—, areve marehari sa leipe lea etau haura eavia.

¹³ Paumarehari e, mearovaeka ve karu sa ero kaifa leita lea vei, haihava levi leitia.

¹⁴ Ereita ore, ereita opai la kiripi orapi makuri voa foreri la roroa, ipi ereita sa paumarehari la haikakare lei roroaita lea vei. Haikakare leiti auke leitita lea karu are opai ve siahu voa meme la mea.

¹⁵ Areve marehari la kaifa leita lea vita, are karu la paeaita vita reha; aea e ore, karu la paeaita lea vita peita makuri areve iri voa eaeia kasirau.

¹⁶ Ereita haikakare ve eite kofa mōfeare ore, Keriso areve makuri la ereita vei miarai vei miavōpe lea vei. Ereita ta lōfeare, ereita ereitave makuri la ereitave paumarehari vei miaraita, mai haura reha.

¹⁷ Karu aea mearovaeka ve etauroro ita meita, aea are areve marehari merava ita la ofae eovi, a—, arero maeaforoe auke leitit’ oria, Ualare ve haikakare sa areve iri voa leafeare eaeita ore ei?

¹⁸ Arave haikakare atutemori e, ereita o sa laua sa haria haikakare araita, lōfeare levi leitia, a—, leita mai ita eite kofa ita haikakare araia.

Haiiri rofo Ualare ve omopa voa

¹⁹ Ereita lōfeare mai voa ore leiti roi ereita okofa ita roroaita karu, aea ereitave haiiri ta rofo leiti roi Ualare ve omopa voa.

²⁰ Ereitave elore haiiri sa seseōvi kaiae o ereitaro elore maea arit’ oria, a—, Ualare are rovaekapo, ereitave haiiri lōfeare usoso kasirau, aeata are etau foromai ore fae.

²¹ Arave haikakare paumarehari e, ereitave haiiri sa seseōvi kaiae o ereitaro elore maea ari auke leitita, a—, ereita haiiri rofo ita Ualare ve haekao voa foreraita ore.

²² Ereita arero loki leita lea etau foromai la are ereitaro aiorai roi; ipi ereita are sa moita lea o la kekeva lei, aea arero lei hailareva leita lea etau la lei vovea.

²³ Aea ereita sa leiti vei are sa moita o meha, ereita areve Atute Iesu Keriso ve rare la sukaerereai vei, aea elore elore haikakare leiti vei, usoso Keriso sa ereitaro moipe, lea o feare.

²⁴ Ualare sa moita lea o la kakeva leitita lea karu, are Ualare voa pea vovea, aea Ualare ta are voa pea vovea. Are ereitaro miōri peita lea Arahoha sa lei, ereita mōfeare ore ia, Ualare ereitave iri voa pea vovea.