1 Ioane 2 - Testamenta Áre 1983 (Toaripi PNG)

Keriso, ereitaro toaraita Vita

¹ Arave haikakare atutemori e, ara mea o ero la uka miarai e kaiae levi leiti veia. A—, karu aea kaiae leitit’ oria, ereita vei Oa la loki taupaita vita ia, Iesu Keriso, are Haura Vita reha.

² Ereitave kaiae foromai la lei sasukaita Vita Keriso reha, a—, ereitave haria kasirau, a—, mearovaeka karu foromai ve kaiae ta reha.

³ Ereita Ualare sa moita o la kakeva leitit’ oria, ereita arero etakofa ore loita reha.

⁴ A—, karu aea Ualare la ore leiti o la moitōva, a—, eite are Ualare sa moita o la kakeva leiti auke oria, lōfeare karu ve o apeva, aea okofa are voa eaei sore.

⁵ A—, Ualare ve o la kakeva leitita lea karu, are voa Ualare la haikakare leita mai kekese‐kekeseka. Lōfeare ereita are voa lei roroaita lea la etakofa ore leititore.

⁶ Are Ualare voa lei vovo mei o oita lea karu, are Iesu Keriso ve mora la tai terai vei.

Murumuru aeata ovava

⁷ Haikakare paumarehari e, ara Ualare sa moita o áre la ero ukai kao, a—, e omopa kofa soa itiiti faitora ovi roroaita lea o, ero evera mei mapaiape lea o.

⁸ Etau farakeka, ara faitora ero ukaipeta mea o are áre, ipi lea o ve okofa la Keriso voa aeata e voa la eavaipea, ipi murumuru soea veverapi, aea ovava kofa la haeaipea.

⁹ Are ovava voa meita o la moita, a—, areve marehari la kaifa leita lea karu, murumuru voa pea vovea, usoso are sa evera murumuru voa peiape lōfeare.

¹⁰ Areve marehari la haikakare leita lea karu ovava voa pea vovea, aea are voa safosafoa putoita etau kasirau.

¹¹ A—, areve marehari la kaifa leita lea karu murumuru voa pea vovea, are murumuru voa oti ore auke ita teraipea, ipi areve ofae oraka la murumuru sa lei kuku leipeta eavia.

Kureaita ovoro

¹² Arave atutemori e, ara ero o la ukaipea, ipi eve iri kaiae la Keriso ve rare vei sasuka mutapi roroka.

¹³ Oa‐ita e, ara ero o la ukaipea, ipi e omopa kofa soa voa itiiti faitora meipeta lea Vita la ore. Harokoulese e, ara o ero la ukaipea, ipi e lea Kaiae Vita la sapatei roroa. Atutemori e, ara o ero la ukaipea ipi e Oa la ore.

¹⁴ Oa‐ita e, ara o ero la ukaipea ipi e omopa kofa soa voa itiiti faitora meipeta lea Vita la ore. Harokoulese e, ara o ero la ukaipea ipi e rofo ia, aea Ualare ve o eve iri voa pea aea ipi e Kaiae Vita la sapatei roroa.

¹⁵ Mearovaeka aea mearovaeka voa siseita lea etau maeamaea la haikakare levi araia. Karu aea mearovaeka la haikakare araita, a—, Oa la haikakare areve iri voa eaei sore.

¹⁶ Ipi mearovaeka ve etau foromai, maeasarōva sa haikakare leitita, aea karu sa eovi liri arita aeata karu sa maravi hiva arita lea etau etau, ere Oa voa forerai sore, a—, mearovaeka voa forera vovea.

¹⁷ Mearovaeka aea are voa karu sa liri ita toto ita arita lea etau kaleiti vei la roi; a—, Ualare sa haikaeaita mai la leita lea karu popōvi pepe peava roi.

Keriso ve Ote Vita

¹⁸ Arave atutemori e, sisa ora meha. E mapi roroka, Keriso ve Ote Vita la kotipea, a—, eite faitora Keriso ve ote karu rauapo foreri la roroa. Lea vei ereita ore sisa ora meha.

¹⁹ Ere ereitaro kiripi maria voa la roroa, a—, ere ereitave maeapavora karu kasirau; ipi ere ereitave maeapavora karu leitit’ oria, ere ereita ita farehoria pepei lare. A—, ere maria voa terōpe, aea lōfeare vei ere ereitave maeapavora karu kasirau lea la pisirikao muia la roroa reha.

²⁰ A—, Keriso sa Safu Arahoha Lareva e voa sisavōpe, aea e foromai sa ore leita karu.

²¹ Ara ero karoro ukai, ipi e sa okofa la haveva leitita lea vei kasirau, a—, ipi e okofa la ore, aea e ta ore, apeva okofa voa forerai sore.

²² Apeva vita leisa? Iesu are Keriso lea o la avoa arita lea vita. Lōfeare karu are Keriso ve Ote Vita reha. Are Oa ita Atute ita la sukavutea avoa aritore.

²³ Ipi Atute la sukavuteaita lea karu Oa la ovaita ore kao; a—, Atute la ore o arita lea karu, are Oa ta ovaita reha.

²⁴ E omopa kofa soa voa mapi ore leipe lea ovoro eve iri voa peava. E omopa kofa soa voa mapi ore leipe lea ovoro sa eve iri voa peit’ oria, e ta Atute ve iri voa aeata Oa ve iri voa pepeava roi.

²⁵ Are ereitaro miarai vei otoare ōpe etau meha, soa sarapai auke peita makuri reha.

²⁶ Ara mea o ero tai ukai ipi apeva sa ero vutea haikaeata lea karu vei.

²⁷ A—, eo, are sa areve Arahoha e voa sisavōpe: aea areve Arahoha sa eve iri voa peita soa, e karu aea sa ero satiriarai vei hai levi kaeai roi. Ipi areve Arahoha sa etau foromai vei ero satiriaraitore, aea are sa satiriaraita lea ovoro okofa, apeva kasirau. Arahoha sa satiriaraita o la kakeva lei, aea Keriso voa pepeava.

²⁸ Arave atutemori e, are voa pepeava, lea vei are foreraita lea mea ereita maea karōva lei, aeata are koti soa maeamariti ita maea totororo levi leiti vei.

²⁹ E ore Keriso are haura Vita, lea vei mea ta ore leitia, mai haura lei roroaita lea karu foromai ere Ualare ve atutemori.