Hibru 1 - Tinputz

A Soe Pe Sosoenën To Koe Maꞌ Pe Koaꞌ Peꞌ

¹ Moaan voh ne Sosoenën to vavaato koe me voh non a kën sipuura manih po teꞌ vanënën soe. Pa ma poen peo neꞌ to vavataare koe voh non ea pa taateꞌ tata me a taateꞌ vaato.

² Ivëhkëk, manih pa ma poen to oah ee, eꞌ to vavaato koe me a rora pe Sunaiꞌeah. E Sosoenën to vaneah voh e Sunaiꞌeah a ma tah kurus. Ee pon to teꞌ vaꞌpeh ne, pare soe, ko oeh me akis tavus me a ma moeh tah kurus to teꞌ hop ne nën.

³ E Koaꞌ to matan va e non manih pe Tamaneah, pareꞌ vapeaapen non o maaka peꞌ. O kikis pa soe peꞌ to vatoe me non pe Tamaneah, pare öt ne pon a ma moeh tah kurus pa soe kikis pamëh. Vasuksuk neꞌ to mët, ko eraꞌ peꞌ pupui a ra ko vahik a ma hat pea, ka voon rakah ee. Manuh pa vöön va kin, neꞌ to ihoꞌ non pa papmatö pe Tamaneah a Kikis Vi.

⁴ A tasun pe Ieesuꞌ to apuh oah e non pa tasun po ankeroꞌ. E Sosoenën to heꞌ voh poan o ëhnan to apuh oah e non pa ma ëhnëëre.

A Tasun Pe Koaꞌ To Apuh Oah E Non Pa Tasun Po Ankeroꞌ

⁵ Ivëh, ke Sosoenën hikta soe ke voh ta pah ankeroꞌ a soe neꞌ to heꞌ e Ieesuꞌ to soe non pan, “Kuru, eën e Koaꞌ peöꞌ, keöꞌ e Tamömah.” Sng 2:7 Ahik to pöh poen ne Sosoenën to soe ke ro ankeroꞌ, ivëhkëk, eꞌ to soe ke Ieesuꞌ pan, “Eöꞌ se teꞌ noꞌ e Tamömah, kën teꞌ nom e Koaꞌ peöꞌ.” 2 Sml 7:14

⁶ Ivëhkëk, o poen neꞌ se vanö hah maꞌ a pah Koaꞌ ro peꞌ manih po oeh, pareꞌ soe pan, “A ma ankeroꞌ pe Sosoenën se vasunön eah.” Sng 97:7

⁷ Ke Sosoenën to sosoe suk voh non o ankeroꞌ, pareꞌ soe pan, “Eöꞌ to nok voh raoe, kee teꞌ ne a nap kiu peöꞌ, pare teꞌ va ne manih pa tuvuh me o tëkrea.” Sng 104:4

⁸ Ivëhkëk, manih pe Koaꞌ, ne Sosoenën to soe pan, “Sosoenën, a ma tamoaan rakah nën se teꞌ nom a teꞌ Sunön, parën matop nom a ma napan pën pa taateꞌ totoopin.

⁹ Eën to iu nom a taateꞌ vih totoopin, parën rës nom a taateꞌ hat. Ivëh, ke Sosoenën e Topoan pën to kon voh oah, ko heꞌ oah o vaeö, me a tasun to teꞌ oah e non pa ö neꞌ to heꞌ vavoh a ma vakamöꞌ pën.” Sng 45:6-7

¹⁰ Ke Sosoenën sosoe suk voh non e Ieesuꞌ, pareꞌ soe pan, “Eën e Sunön, po vamomoaan eën to nok o oeh me akis pa koreomah.

¹¹ O oeh me a akis se hat vamanih po rara vamoaan, pare hik ee. Ivëhkëk, eën to teꞌ tamoaan e nom.

¹² Eën se nikun raoe vamanih po rara, parën panih raoe pon vamanih pa teꞌ to panih o rara, ivëhkëk, eën se vatoe tamoaan e nom, parën hikta se manot nom.” Sng 102:25-27

¹³ E Sosoenën to hikta soe ke voh ta ankeroꞌ a soe neꞌ to heꞌ voh e Ieesuꞌ, to soe non pan, “Ihoꞌ manih pa papmatö peöꞌ, keꞌ antoen pa ö nöꞌ se vahoꞌ a teꞌ to vakihat me a nom oah manih paan in eën.” Sng 110:1

¹⁴ O ankeroꞌ to kiu ne paan e Sosoenën, keꞌ vavanö non raoe pa vaꞌaus o teꞌ varih neꞌ se kon hah.