Tuma 9 - Tampulma

Sɔɔl Fun Nyɛ O Si Su Yesu

¹ Sɔɔl ha funɛ vɛɛna namsi Yesu nitiŋɛ tau Jɛrusalɛm ni a daŋni o kpu ba. O fun la Koosa dam kɔkɔɔrsi ta nihɛɛ ti wati,

² a ŋɔ un di o saksiu o la tɔhɔn naa ba yir Damaskus chen a la dɛu nibaal awa nihaana ba naa la tiŋ Yesu nyinbaan, bɔnɛ a kpa ba bur wa Jɛrusalɛm. O fun sumi un di o sɔbi tɔna a nyɛ Ju tim ba naa la pu dɔŋa a li ba bar lagmi dɛɛna a biksi ba nibin ne naa ya un, chen ni ba zi suŋi unu.

³ O funɛ nyɛn nyinbaan ni a wa dugli Damaskus, kundɔŋ fun nyiksi a li buudaha ni a chaani a du un ni.

⁴ O fun chel tɛɛnɛ ni a nu ta ka o ŋɔ un, “Sɔɔl, baŋnɛ ii namsi min chen ni?”

⁵ O fun ŋɔ, “Mu kunyana, anti ya hin?” Ta ti fun ŋɔ, “Min ya Yesu naa i namsi chen.

⁶ Si a la zu tɔhɔn ti. Nandigi zi ŋɔ hinu chenani i zi yau dooni.”

⁷ Ba naa wa Sɔɔl funɛ gba chen fun chiŋi a gil chɛɛma. Ba fun nu ta a vɛ na nandigi.

⁸ Sɔɔl fun si a lɛli o se a vɛ na kundɔŋ. Adaha o dɔŋtim ta nidigi fun kpak o nin a te o suwachak a la zu Damaskus tuha.

⁹ O wa funɛ na wuzu butora wuzu. O wa fun vɛɛna di diwe a la nyɔ.

¹⁰ Yesu nitiŋɛ ta digi funɛ nyɛn doon ba yir un Ananias. Ya kunyan ti fun wa ŋɔ un a chi o deesi, “Ananias.” O fun ŋɔ un, “Mu kunyana, minnɛ.”

¹¹ Ya kunyan ti fun bu ŋɔ un, “Si a la baal naa ba yir Judas chen dama a li nyinbaan naa ba yir deŋli. I la tel dooni, i pɛɛsi Sɔɔl naa li tɔhɔn naa ba yir Taasus chen wɛ. O la sumi Koosa,

¹² a na a chi deesi ka i zu o dɛ a kpa i nisa a sak un ni di o se ta bu lɛli.”

¹³ Ananias fun ŋɔ un, “Mu kunyana, nibin damata funɛ ŋɔ min baal ti wɛ awa chenani o nyɛ Koosa nara namsi kinkan a li Jɛrusalɛm ni.

¹⁴ Lalaknɔ o chiŋi Koosa dam kɔkɔɔrsi ta bar chiŋi ni a wa bar nɔ di o kpaksi ba naa maga kpa i sɔn a jɛɛmi hin.”

¹⁵ Ya kunyan ti fun bu ŋɔ un, “Mu funɛ lisi un di o tum mu tuma a kibiksi Ju tim ta, ba naa vɛ ya Ju tima awa ba koorsa mu wɛ. Adaha la tum chenani mu ŋɔ hin.

¹⁶ Mu zi biksi un chenani o zi biksi ba a na namsi kinkanu.”

¹⁷ Ananias fun si a la zu dam ti a kpa o nisa a sak Sɔɔl ni a ŋɔ un, “Mu niinbe Sɔɔl, ya kunyana Yesu naa i na nyinbaan ni chen, funɛ tum min di mu wa lɛli i se. O gbanko funɛ tum min di o nyɛ Koosa siim weri ti zu hin ni a te i suwachak.”

¹⁸ O funɛ sɛm sɛm ta peti, Sɔɔl se ta fun vaan bu lɛli. O funɛ chi nyinsa pɛrɛ tɔ a a lɛligi. O fun si a nyɛ ba chaksi un wa ni ni.

¹⁹ O fun di diwe o kpok bu bur a wa. Doone o fun nyɛn Yesu nitiŋɛ ba naa nyɛn Damaskus ni chen wati wuzu bilɛ.

Sɔɔl Fun Biksi Damaskus Tima Koosa Laaboor Weri Wɛ

²⁰ A funɛ ya tamnɛ, o fun vaan si a zu Ju tim ta bar lagmi dɛɛna aa biksi ba di Yesu ya Koosa bere.

²¹ Alaazibu fun kpak ba naa maga nu o sɛm ta kinkan. Ba fun ŋɔ dɔŋ ni, “Baal nɔ nyɛ ba naa maga nyɛn Jɛrusalɛm ni a kpa Yesu sɔn a jɛɛmi un, na namsiu kinkan. Lalaknɔwa o wa di o wa kpaksi Yesu nitiŋɛ ba naa nyɛn bar nɔ, a bur kila Koosa dam kɔkɔɔrsi ta wati. Chen mun ya yɛrɛ?”

²² Nidamata funɛ nu Sɔɔl biksi ti a gbaari. O fun biksi ba di Yesu ya naa Koosa fun vɔu di o zi wa tumu wuzu digi chen nɛnɛ, chen ni Ju tim ba naa nyɛn dooni chen, wa kidi un amɔrɛ.

²³ Wuzu bilɛ gantɛl ni, Ju tim ta fun lagmi dɔŋ ni di ba zim chenani ba zi kpu un.

²⁴ Nha wa dusum maga ba yaa funɛ pɔu a li tɔhɔn ti bulzɔɔnɔ ni di ba kpak un kpu. Amaa Sɔɔl funɛ nu chenani ba daŋni ba ya unu.

²⁵ Wuzu digi dusum Yesu nitiŋɛ ta fun kpa un a zini chechepure naa ba sa go tɔhɔn ti chen nyu daha a du chenchise ni a vɔti un wa ŋmɛnsi ni. Doone ba fun kpak ŋmɛnsi ta ka chenchise ti tu wa tɛɛnɛ.

Sɔɔl Fun Kaali Jɛrusalɛm

²⁶ O fun wa tel tɛɛnɛ, Sɔɔl li un ni a kaali Jɛrusalɛm a daŋni o lagmi Yesu nitiŋɛ ta ni dooni. Ba se wa fun su di o ya Yesu nitiŋɛ ta digirɛ. Chendaha ba funɛ ɔm un.

²⁷ Doone Barnabas fun wa suŋi un a kpa un kaali nitumɛ ta wati. O fun ŋɔ ba chenani Sɔɔl fun chem ya kunyana Yesu nyinbaan ni ba sɛm sɛma. O gbanko fun ŋɔ ba chenani Sɔɔl fun kpak bambi a biksi Damaskus tima Yesu wɛ.

²⁸ Ba fun nyɛ o nyɛn ba wati ka ba wa un gba Jɛrusalɛm a biksi nara ya kunyan ti wɛ.

²⁹ O wa Ju tima ba naa funɛ sɛm Girik tim sɛma, funɛ di dɔŋa wa amɔrɛ. Ba fun di amɔrɛ ti hali a wa ku a la nyini di ba na nyinbaan a kpu un.

³⁰ O dɔŋtim ta funɛ nu chenani ba daŋni ba kpu un, ba fun tum Sɔɔl Siizaria ni o zu arŋa a kaali Taasus.

³¹ Saha ti kpa la, Yesu nitiŋɛ ba naa funɛ nyɛn Judia pulum, Galili pulum awa Samaria pulum ni, wa fun bu namsi. Koosa siim weri ti fun nyɛ ba se su a gbaari a la nyɛ ya kunyan ti wa jirima saha maga. Nidamata fun nyɛ ba se su un a gbaari ba ni.

Pita Fun La Nyɛn Lida Awa Jɔpa Ni

³² Saha tirɛ Pita fun gba a la tɔ damata a la tel tɔhɔn naa ba yir Lida ka Koosa nara bɔnɛ nyɛn doon.

³³ Baal digi funɛ nyɛn doon ba yir un Ɛnɛus. O nisa awa o naŋgere fun sou. O fun chɔ o kichɔɔli ni bun mɛnasa.

³⁴ Pita fun wa ŋɔ un, “Ɛnɛus, Yesu Kristo nyɛ i na alaafɛ. Si a guti i kichɔɔli.” Ɛnɛus fun vaan na alaafɛ a si a guti un.

³⁵ Lida tim ta awa ba naa maga nyɛn tɛɛnɛ naa mak dɔŋ ni fun nu chenani yɛɛ, a nyɛ ba se su ya kunyan ti.

³⁶ Yesu nitiŋɛ ta nidigi funɛ ya nihaannɛ ba yir un Tabita. Girik tima sɛm ni ba ka yir un Dɔɔkas. O mun funɛ ya ‘cherga’. O fun nyɛn tɔhɔn naa ba yir Jɔpa. O yaa funɛ tum tum werewa a la suŋi fara tima.

³⁷ Chen saha ti wichɔɔrta fun wa kpak un o sou. O walɛ fun sɔ un ni a kpa un dau dɛ naa ba sa a zɔŋ o dɔŋtiina nyuhu ni.

³⁸ Jɔpa awa Lida wa fun bol wa dɔŋ ni. Yesu nitiŋɛ ba naa nyɛn Jɔpa ni, funɛ nu di Pita nyɛn Lida ni, ba fun tum nara balɛ o wati ba la ŋɔ un di o ta vusi a kuwa.

³⁹ Pita fun vaan si a tiŋ ba. Pita wa ba funɛ wa tel Jɔpa, ba fun kpa un zini dɛ naa Dɔɔkas nyɛn chen. Nidamata fun lagmi dooni a wi. Luhaana gbanko fun wa gbaari ba ni a pa takta wisa awa takta zene naa o fun nyɛn o miisa ni a sɔ a biksi Pita.

⁴⁰ Pita fun nyɛ ba kpa a maga a li a gbiri a sumi Koosa. Doone o fun burgi o titi a chem Dɔɔkas a ŋɔ un, “Tabita, si kani.” O fun lɛli o se a na Pita a vaan si kani.

⁴¹ Pita fun kpak o nin a suŋi un o si chiŋi. Doone o fun yir nara tima awa luhaana ba naa funɛ ya Koosa nara, ba zu wa. O fun kpa Dɔɔkas a nyɛ ba.

⁴² Laaboor naa funɛ ya chen, fun mɔɔli Jɔpa tɔhɔn ti maga. Nidamata se fun su ya kunyan ti chen daha.

⁴³ Baal digi funɛ nyɛn Jɔpa ni ba yir un Simɔn. O tuma yaa fun ya sela tɔna tuma. Pita fun nyɛn o dam ni a vusi.