Tuma 8 - Tampulma

Sɔɔl Fun Muksi Yesu Nitiŋɛ Kinkan

¹ Sɔɔl funɛ daŋni o sou. Saha ti kpa la, Ju tim ta fun nyɛ Yesu nitiŋɛ ba naa nyɛn Jɛrusalɛm ni, na namsi kinkan. Ba maga fun pisi a su Judia pulum awa Samaria pulum. Nitumɛ ta duŋduŋ funɛ ka a nyɛn Jɛrusalɛm ni.

² Nara ba naa yaa jɛɛmi Koosa, bɔnɛ funɛ wi kinkan Stivin daha a kpa un a sogli.

³ Sɔɔl funɛ namsi Yesu nitiŋɛ ta kinkan. O funɛ zu ba damsa bu bɛgim bɛgima a lɛrgi nibaala awa nihaana a li a tɔ ba dɛ.

Filip Fun Biksi Samaria Tima Koosa Laaboor Weri Wɛ

⁴ Yesu nitiŋɛ ba naa funɛ pisi chen fun kaali tɔ damata a la biksi nara Koosa laaboor weri ti wɛ.

⁵ Filip fun kaali tɔhɔn naa ba yir Samaria chen a la biksi doon nara Kristo naa Koosa fun vɔu di o zi wa tumu wuzu digi chen wɛ.

⁶ Ba maga fun nu chenani o sɛm chen nɛnɛ a na tum zene naa o tum.

⁷ O funɛ ŋɔ alizin tagna ni di a li nara tima bɔnɛ ni a fun huusi kinkan a li ba ni. O gbanko fun tiibi ba naa nisa awa naŋgere sitɛɛ awa ba naa la chel chɛrsa.

⁸ Samaria tim ta maga tusa funɛ sɔɔniu kinkan chenani o ya chen daha.

⁹ Baal digi funɛ nyɛn doon ba yir un Simɔn. Bunsa mɛna tuhu ni o yaa funɛ tum tu bilim tumwa a nyɛ Samaria tim ta ni a ŋɔ di o funɛ ya nibin zenne.

¹⁰ Tɔhɔn ti maga nara, ba naa funɛ ya bichɛsa hali a wa nihɛɛta maga, funɛ nu o sɛmau nɛnɛ a ŋɔ dɔŋ ni, “Baal nɔ kpok zen nyɛ o chi Koosa.”

¹¹ Chenani o yaa funɛ tum tu bilim tuma a nyɛ ba chen ya ba alaazibu kinkan. Chendaha ba fun nu o sɛm ta nɛnɛ.

¹² Filip funɛ wa biksi ba Yesu Kristo wɛ awa chenani Koosa daŋni o dɔ nara wɛ, nibaala awa nihaana kinkan fun nyɛ ba se su Koosa laaboor weri ti. Doone ba fun nyɛ o chaksi ba wa ni ni.

¹³ Simɔn gbanko se funɛ su laaboor weri ti. Filip funɛ chaksi un wa ni ni peti, o fun la chiŋi o chakpal ni di o na tum zene awa alaazibu tum ta o tum chen. Alaazibu fun kpak un kinkan a daha.

¹⁴ Nitumɛ ba naa funɛ kpalimi Jɛrusalɛm ni chen, funɛ nu chenani Samaria tim ta nidamata se su Koosa laaboor weri ti, ba fun tum Pita awa Jɔn ba wati.

¹⁵ Ba fun la tel doon ni a sumi Koosa di o kpa o siim weri ti a du ba ni.

¹⁶ Filip fun kpa ya kunyana Yesu sɔn a chaksi ba wa ni ni, amaa ba ha wa fun la Koosa siim weri ti.

¹⁷ Pita awa Jɔn funɛ sumi Koosa peti, ba fun kpa ba nisa a saksi ba nyuuni ni Koosa siim weri ti zu ba ni.

¹⁸ Simɔn fun chiŋi a nyini chenani Pita awa Jɔn kpa ba nisa a saksi ba ni ba la Koosa siim weri ti. O fun lisi malɛ a biksi Pita awa Jɔn,

¹⁹ a ŋɔ ba, “Ma purigi ma kpok nɔ a nyɛ min, chen ni mu gbanko zi kotiu a kpa mu nisa a saksi nara ni di Koosa siim weri ti zu ba ni ka mu bɔ ma.”

²⁰ Pita fun ŋɔ un, “Kpa i malɛ kila. I wa kikoti a bɔ Koosa di o nyɛ hin kpok i kpa o siim weri ti a nyɛ nara ni.

²¹ I wa ya wa ya nibɛgim, domi i tuha wa deŋli Koosa suwachak ni.

²² Gil tum tagin naa i lisi a sumi ya kunyana Koosa di o gil un aa ta.

²³ N zimu di i tu haasa nyɛ i di handɔta kinkan a du ya ni. I tum tagna tɔ hin a du a dɛ ni.”

²⁴ Simɔn fun ŋɔ Pita awa Jɔn ni, “Ma sumi ma kunyana Koosa a nyɛ min, chen ni o wa zi nyɛ mu namsi a li chenani mu tum ni.”

²⁵ Ba wa Simɔn funɛ sɛm peti, ba fun biksi nara tima Koosa laaboor weri ti wɛ awa chenani ba zim Yesu wɛ a bur kaali Jɛrusalɛm. Ba funɛ nyɛn nyinbaan ni a la chene, ba funɛ biksi Koosa laaboor weri ti a nyɛ tɔsi naa nyɛn Samaria pulum tim bɔnɛ ni.

Filip Fun Pu Itiopia Tim Nihɛɛ

²⁶ Wuzu digi Koosa malaikasi ta digi fun wa ŋɔ Filip ni, “Si a la doonani nha yɛli nindil nyinbaan naa chɔɛɛ Jɛrusalɛm awa tɔhɔn naa ba yir Gaza bambaan ni chen.” Nyinbaan ti chɔ la li nyabaannɛ.

²⁷ Filip fun tum chenani malaika ti nɔ un. Nibin zen digi funɛ val nyinbaan ti ni a ya namugil a wuzu ti. O funɛ ya nihɛɛrɛ a li pulum naa ba yir Itiopia ka nihaan digi fun nyɛn doon a ya ba koora. Ba funɛ yir un Kandese. O fun kpa o malɛ a du nihɛɛ ti nin ni. O funɛ la Jɛrusalɛmnɛ a la jɛɛmi Koosa,

²⁸ a bur a wa o pulum. O funɛ nyɛn loori munzuha nɛɛ ka zaaga lɛrgi un. O funɛ nyɛn nyinbaan ti ni a la chene, o funɛ karimi Koosa witiina Azaaya tɔn naa o fun sɔbi a li Koosa sɛm tɔn ti ni bar digi.

²⁹ Koosa siim weri ti fun ŋɔ Filip ni, “Kila a la tiŋ o gantɛl.”

³⁰ Filip fun chɔ la tiŋ un a nu ka o karimi a li Azaaya tɔn ti ni. O fun ŋɔ un, “I zim chenani i karimi chen munuu?”

³¹ Baal ti fun ŋɔ un, “Nandigi vɛ ŋɔ min, mu wa kizim o mun.” Doone o fun yir Filip o wa zu a gbaari un ni.

³² Nannɛ o funɛ karimi, “O funɛ chi piisire ba kpa un a kɔrigi. O gbanko funɛ chi piisi be naa ba ka funi o pusa ka o vɛ chɛɛmirɛ. O yaa fun mooriu.

³³ Nara fun nyini un a chi bichɛla. Nandigi wa fun to a chiŋi o gantɛl ni di ba kok un ka ba kpu un. Doone o miisa fun peti a li tɛɛnɛ nɔ maga ni ka o vɛ kpak bisa ba zi chiŋi o bar chiŋi ni.”

³⁴ Baal ti fun ŋɔ Filip ni, “Mu sumi hinu di i ŋɔ min naa wɛ Azaaya fun sɔbi chen. O funɛ sɔbi o titi wɛwa koo nandigii?”

³⁵ Filip fun te ŋɔ un chenani o karimi chen mun a zi biksi un Koosa laaboor weri ti awa Yesu wɛ.

³⁶ Ba funɛ nyɛn nyinbaan ti ni a la chene a la dugli pul. Baal ti fun ŋɔ Filip ni, “Ya duglɛ ni bar nyɛniu. Mu daŋni i chaksi min wa ni ni, nandigi wa to a la zi ŋɔ hin di i gil.” ((

³⁷ Filip fun ŋɔ, “I si su Yesu wa i bambi maga ni, mu zi chaksi hin wa ni ni.” Namugil ti fun jɛrgi a ŋɔ un, “Mu si su di Yesu Kristo ya Koosa bere.”))

³⁸ Ba fun la tel dooni, o nyɛ zaaga ti chiŋi. O wa Filip fun li loori munzuha ti ni a la tu ni ti ni. Filip fun chaksi un dooni.

³⁹ Ba funɛ wa li ni ti ni, ya kunyana Koosa siim weri ti fun vaan zer Filip a kaali, chen ni baal ti wa zi bu na un. Baal ti fun bu zu o loori munzuha ti a la wa tu sɔɔn kinkan ni.

⁴⁰ Koosa siim weri ti fun nyɛ Filip kaali tɔhɔn naa ba yir Asdɔd. O funɛ biksi nara Koosa laaboor weri ti wɛ a li tɔsa maga ni hali a la tel tɔhɔn naa ba yir Siizaria.