Tuma 7 - Tampulma

Stivin Fun Kok O Titi Ju Tim Suwachak Ni

¹ Doone Koosa dam kɔkɔɔrsi ta nihɛɛ ti fun ŋɔ Stivin ni, “Chenani nara nama fiksi hin nan ya wutirɛɛ?”

² O fun ŋɔ ba, “Mu nyana awa mu dɔŋtima, maa nu chenani mu kaa ŋɔ ma. Ya nyana Abraham funɛ te nyɛn Mɛsɔpɔtemia pulum nɛɛ a bu la nyɛn tɔhɔn naa ba yir Haran. Doonani o fun te nyɛn chen, wuzu digi Koosa naa kpak jirima awa chaani kinkan, fun wa,

³ a ŋɔ un, ‘Gil i walɛ awa pulum nɔ ka mu biksi hin doonani i zi la.’

⁴ Abraham fun tiŋ Koosa nɔ a li Mɛsɔpɔtemia pulum doonani Kaldia tima nyɛn, a la nyɛn Haran ni. O nyana funɛ sou, Koosa fun ŋɔ un o si a wa nyɛn bar nɔ.

⁵ O funɛ wa tel bar nɔ, hali Koosa wa fun kpa tɛɛnɛ ti bar wewe a nyɛ un. Abraham wa fun kpak bisa, amaa Koosa funɛ vɔu di o wa o bi lulɛ zi wa dɔ unu wuzu digi.

⁶ Chene Koosa fun ŋɔ un, ‘I bi lulɛ zi wa nyɛn hɔɔra pulum niu bunsa kɔksa naasi. Dooni ba zi wa ya nara tima yosau ka baa muksi ba kinkan.

⁷ Bunsi ta wa peti, mu zi la di hɔɔri ta sɛriau a lɛrgi ba diŋsa a lisi i bi lulɛ ta di ba wa jɛɛmi min bar nɔ.’

⁸ Koosa wa Abraham funɛ ya nɔ bɛgim ka Koosa fun ŋɔ un di o teŋsi nara tima ba zim chenani ba ya. Abraham fun lul be a du un Aizik. O funɛ wa ya wuzu mɛnasa ba fun teŋ un. Aizik fun wa bi a lul Jakɔb. Jakɔb gbanko fun wa bi a lul nara fidalɛ ba dɔ zɔɔnɔ.

⁹ “Ba naa dɔ zɔɔnɔ ti chen fun di handɔta a du ba niinbe Josɛf ni a yogli un a nyɛ nara ni ba kpa un kaali Ijipt pulum a fun bu la yogli un doon o vɛɛn ya yoma. Koosa wa un funɛ nyɛn dooni,

¹⁰ a na chenani o namsi a lisi un. O fun nyɛ o kpak zima kinkan a ya nibin weri Ijipt tim koora naa ba yir Fɛɛrɔ daŋni o na un. O funɛ wa o wati chene, o vɔu un di o ya pulum awa Fɛɛrɔ damsa koora a sak un ni.

¹¹ Chen saha ti lɔsa fun wa chel Ijipt pulum awa Kenan pulum naa ya nawaalsi ta fun nyɛn ni. Ba naa maga funɛ nyɛn doon, wa fun koti a na diwe a di a la namsi kinkan.

¹² Wuzu digi Jakɔb fun nu di diwe nyɛn Ijipt ni a fun tum o bisa di ba la yau diwe ta a wa.

¹³ O funɛ tum ba a li Ijipt pulum ni bilɛ tima, Josɛf fun kpa o titi a la biksi ba. Fɛɛrɔ fun nu di Josɛf maanasa gbanko wau.

¹⁴ Josɛf fun yir o nyana Jakɔb awa o walɛ di ba wa pu un Ijipt ni. Nara fumnɔpɛ danyuu funɛ ya o lul.

¹⁵ Ba maga fun kaali a la nyɛn Ijipt ni. Doonee o wa o bisi ta fun siti.

¹⁶ Abraham funɛ te yau tɛɛnɛ naa nyɛn doonani ba yir Sɛkɛm a li Kenan pulum ni a bɔ malɛ a nyɛ Hamor tim ni. Gbɛntɛl bɔ funɛ nyɛn dooni. Jakɔb wa o bisi ta funɛ siti, ba fun kpa ba a sogli un ni.

¹⁷ “Saha funɛ dugli di Koosa ŋɔ Abraham ni chenani o vɔu chen mun, ya nara ba naa nyɛn Ijipt ni chen, funɛ gbaariu kinkan.

¹⁸ Doone Ijipt tima fun bu vɔu koor fali dooni. O wa Josɛf wa fun zim dɔŋa.

¹⁹ O fun mur ya nara a nyɛ ba na namsi. Hali o funɛ muksi bau di ba gil ba bichɛsa a ta kɔha ni ba siti.

²⁰ Saha tirɛ ba fun lul bichɛl pilim weri ba yir un Mosis. Ba fun dɛɛsi un o nyan dam ni pɛnsa tora.

²¹ Ijipt tim ta fun muksi ba di ba kpa o gbanko a la ta kɔha ti ni. Doone Fɛɛrɔ nihabichɛla fun na un a la un a dɛɛsi a chi o ya o be.

²² O funɛ wa bi, Ijipt tim ta fun biksi un a li ba zima ni o burgi nibin zen a li o sɛma awa o tuma daha.

²³ “Mosis funɛ wa tel bun fumnaasi, o fun lisi di o la na o dɔŋtim Ju tima.

²⁴ O funɛ la na ba chen, o fun na Ijipt tim digi ka o tuk Ju tim digi. O fun la gɔɔgi Ijipt tim baal a mo un a kpu.

²⁵ O fun baa di Ju tim ta zi zimu di Koosa zi nyɛ o yisi bau a li yosi ni. Amaa ba wa fun zim chen.

²⁶ Chɔɔsa funɛ wa pisi Mosis fun na ka Ju tim nara balɛ yo dɔŋa. O fun la gɔɔgi ba dɔŋ ni a ŋɔ ba di ba ya nɔ bɛgim. O fun ŋɔ ba, ‘Ma nu mu wati. Yɛrɛ ma ya niinbisa a la yo dɔŋa?’

²⁷ Naa funɛ te mo o dɔŋtiin ti chen bum yo a zak Mosis a ta a ŋɔ un, ‘I wa dɔ ya a kpak nyinbaan di i di ya sɛria.

²⁸ I daŋni i kpu minu a chi chenani i dɛ kpu Ijipt tim baal ti dɛrati chen?’

²⁹ Mosis funɛ nu o sɛm ta, o fun si chɔ li Ijipt ni a la nyɛn pulum naa ba yir Midian. Dooni o wa o haan fun lul bisa lɛ.

³⁰ “Bun fumnaasi gantɛl ni, wuzu digi Mosis funɛ gba nyabaan ni a wa dugli bi naa ba yir Sainai. O funɛ nyini a na ka din di bugil pum ka Koosa malaikasi ta digi fun nyɛn un ni.

³¹ Alaazibu fun kpak un kinkan o la suwachak di o dugli un. Doone o fun nu ka ya kunyana Koosa ŋɔ un,

³² ‘Min ya Koosa naa i nawaalsa Abraham, Aizik awa Jakɔb funɛ jɛɛmi chen.’ Hansura fun kpak Mosis o bara jigiri o vɛ kpak bambi di o nyini.

³³ Koosa fun bukoo ŋɔ un, ‘Ur i natausa. Doonani i chiŋi chen chi natausa duuliu.

³⁴ Mu funɛ na chenani mu nara na namsi Ijipt ni kinkan. Mu funɛ nuu ka ba fɔuli. Chendaha mu tu wa di mu wa yisi ba a li ba fɔuli ti ni. Kuwa mu kpa hin a la Ijipt.’ Koosa fun sɛm peti a kaali.

³⁵ “Ju tim nara balɛ ta Mosis fun gɔɔgi chen fun te ŋɔ un di o wa dɔ ba a kpak nyinbaan ti di o di ba sɛria. Koosa fun tum un di o bu bur kila Ju tima ba naa funɛ vɛ un, wati a nyɛ o malaika naa o na a li bugil pum din ti ni chen suŋi un o ya ba nyuhu tiina awa naa la zi yisi ba.

³⁶ Koosa fun suŋi un di o tum tum zene awa alaazibu tuma a li Ijipt ni a kpa ba li a ji ni naa ba yir ni sɛm chen. Saha ti hali a la tel bun fumnaasi o funɛ tum tum, zene tawa a nyɛ nara tima ni a li nyabaan ti ni.

³⁷ Mosis nɔ fun ŋɔ Ju tim ta ni, ‘Koosa zi lisi witinsi ta digiu a li ma ni a tum un ma wati a chi chenani o fun tum min ma wati nan.’

³⁸ Mosis ya naa wa ya nawaalsa Ju tim ta funɛ lagmi a li nyabaan ti ni. Koosa malaika ti fun ŋɔ un dooni a li bi Sainai a kpa Koosa chiksɛ naa biksi ba chenani ba zi nyɛn, a nyɛ un. Nannɛ ba fun kpa nyɛ ya di ya tiŋ.

³⁹ “Ya nawaalsi ta fun vɛ di ba wa zi tiŋ Mosis nɔ a la daŋni ba bur la Ijipt pulum.

⁴⁰ Chendaha ba fun ŋɔ baal naa ba yir Ɛrɔn ni, ‘Ya wa zim chenani ya Mosis naa kpa ya li Ijipt ni. Kɔɔri vursa a nyɛ ya a te ya suwachak.’

⁴¹ Chen saha ti Ɛrɔn fun kɔɔri vuk o chi nupɔl ka ba fun kɔɔri kɔɔra a du un ni. Ba tusa fun sɔɔni kinkan a li chenani Ɛrɔn ya nyɛ ba chen ni.

⁴² Koosa funɛ na chenani ba ya, o fun burgi o gantɛl a ta ba di ba jɛɛmi wula a li buudaha ni. Koosa witinsi ta digi fun sɔbi a li Koosa sɛm tɔn ti ni a ŋɔ, ‘Ma Ju tima, ma funɛ nyɛn nyabaan ni bun fumnaasi, ma wa fun kpa sela a kɔɔri kɔɔra a nyɛ min.

⁴³ Ma funɛ kɔɔri vuku a yir un Mɔlɔk a kpa gar a tɔ un nha daha. Ma gbanko funɛ kɔɔri vuku a chi wul a yir un Refan. Domi ma funɛ kɔɔri vuk na a jɛɛmi a daha, mu zi nyɛ nara wa kpaksi mau a kpa ma kila a li pulum naa galɛ tɔhɔn naa ba yir Babilɔn ni.’

⁴⁴ “Ya nawaalsa funɛ gba a li nyabaan ni, ba yaa kpa ba lɛuu naa biksi ba di Koosa nyɛn ba watiu, a val. Mosis fun kɔɔri un a chi chenani Koosa fun ŋɔ un chen.

⁴⁵ Bun bɔnɛ tuhu ni Koosa fun duŋni ba dɔma a li pulum nɔ ni ka ba wa ba nyuhu tiina naa ba yir Jɔsua wa dɔ bar nɔ. Ba wa lɛu ti fun lagmi nyɛn bar nɔ, hali saha naa ba fun wa vɔu ya nawaal Devid koora.

⁴⁶ Chenani Devid fun tum sɔɔni Koosa tuha kinkan. O funɛ daŋni o sa bar jɛɛmi dama a nyɛ Koosa naa ya nawaal Jakɔb funɛ jɛɛmi chen o nyɛn.

⁴⁷ Amaa Koosa wa fun nyɛ un nyinbaan di o ya chen a nyɛ o be koor Sɔlɔmɔn sa un.

⁴⁸ “Amaa Solomon naa zenee kinkan a kaali a maga, o wa nyɛn damsi naa nibinsi sa ni. O witinsi ta digi fun sɔbi a li o sɛm tɔn ti ni di o ŋɔ,

⁴⁹ ‘Mu nyɛn mu tɔhɔn nɛɛ a dɔ kina maga, ka tɛɛnɛ nɔ maga chi mu naŋgere bar zɔŋi. Ma wa kikoti a sa dama o wer a mak mu bar kani hiisi,

⁵⁰ Domi min funɛ naami kina maga.’ ”

⁵¹ Stivin fun bukoo ŋɔ ba naa lagmi dɔŋ ni chen ni, “Ma kpak bambi kpokwa a chi ba naa vɛ zim Koosa. Ma gbanko kpak bambi sitɛwa a chi ma nawaalsi ta a vɛ tiŋ Koosa siim weri ti nɔ a chi ba.

⁵² Hali Koosa witinsi ta digi wa fun ka ma nawaalsi ta vɛ namsi un. Koosa funɛ tum ba di ba wa ŋɔ ma nawaalsi ta ni di o zi wa tum o tumtumna naa tiŋ o tutɔu wuzu digi. Ma nawaalsi ta funɛ kpu ba chen a chi chenani ma vɛ a kpu o tumtum ti chen.

⁵³ Koosa funɛ nyɛ o malaika ti kpa o chiksɛ ta a nyɛ ma nawaalsi ta ni a ka pu ma, amaa ma ha wa tiŋ a.”

Ju Tima Funɛ Yaksi Stivin Wa Buŋkula Ni

⁵⁴ Stivin funɛ sɛm peti chen, o sɛm ta fun zu ba naa nu chen, bambe ni. Ba paan fun si kinkan a du un ni,

⁵⁵ amaa Koosa siim weri ti fun si Stivin bambi ni a nyɛ o nyini a na Koosa jirima awa o chaani kinkan a li o tɔhɔn ti ni. O funɛ vɛɛn nyɛ o na Yesu ka o chiŋi Koosa nihɛɛti bar kani ni dooni.

⁵⁶ Stivin fun ŋɔ ba, “Ma nu mu wati nɛnɛ. Ba puk Koosa tɔha bulzɔɔnɔu ka mu na Yesu naa ya nibine be ka o chiŋi Koosa nihɛɛti ti bar kani ni.”

⁵⁷ Ba maga fun tɔ ba diŋsa a la chɛɛmi, chen ni ba wa zi bu nu o sɛm ta a si a la nyirgi un.

⁵⁸ Ba fun lɛrgi un li tɔhɔn ti ni a ur ba takta zene a nyɛ bunɔɔn naa ba yir Sɔɔl nyini a. Doone ba fun pini buŋkula a yaksi Stivin.

⁵⁹ Ba funɛ yaksi un chene, Stivin fun sumi ya kunyan ti a ŋɔ, “Mu kunyana Yesu, la mu siima.”

⁶⁰ O fun gbiri a sɛm ta zaŋ ni, “Mu kunyana, gil ba tum tagna naa ba tum a du min ni nan a nyɛ ba.” O funɛ sɛm chene a sou.