Tuma 6 - Tampulma

Yesu Nitiŋɛ Fun Lisi Nisuŋɛ Nara Banɔpɛ

¹ Chen saha ti Koosa yaa fun kpa nidamatau a gbaari Yesu nitiŋɛ ta ni. Wuzu kam nitumɛ ta yaa bɔni luhaana wa malɛu. Wuzu digi Yesu nitiŋɛ ba naa la sɛm Girik tim sɛm chen funɛ zulimi ba naa la sɛm Ju tim sɛm chen, domi ba luhaani ta wa funɛ la ba tutɔ malɛ maga.

² Nitumɛ nara fidalɛ ta funɛ nu chenani la ya, ba fun yir Yesu nitiŋɛ ta maga lagmi dɔŋ ni a ŋɔ ba, “Koosa wa fun lisi ya di ya nyini malɛ ta. O ka funɛ lisi yau di ya biksi nara tima o laaboor weri ti wɛ.

³ Ya dɔŋtima, ma nyɛ ya lisi nara banɔpɛ ba naa nyɛn ya ni a kpak jirima awa nɛha kinkan a nyɛ Koosa siim weri ti te ba suwachak, kinyini malɛ ta.

⁴ Ya tuma la zi ya yaa sumi Koosa a kibiksi nara o laaboor weri ti wɛ.”

⁵ Ba sɛm ta funɛ nyɛ Yesu nitiŋɛ ta tu sɔɔnau kinkan. Doone ba fun lisi baal naa sɔn ya Stivin. O si funɛ su Yesu nɛnɛ ka Koosa siim weri ti fun te o suwachak. Ba gbanko fun lisi Filip, Prɔkɔrɔs, Nikanɔr, Timɔn, Parminas awa Nikolas naa funɛ si a bur tiŋ Ju tim jɛɛmi nyinbaan. O funɛ li tɔhɔn naa ba yir Antiɔk. Ba fun kpa ba a gbaari Stivin ni.

⁶ Ba funɛ lisi ba peti a kpa ba a chiŋsi nitumɛ ta suwachak ni. Nitumɛ ta fun kpa ba nisa a saksi ba nyuuni ni a sumi Koosa a du ba ni.

⁷ Koosa laaboor weri ti fun mɔɔli kinkan. Nara kinkan awa Koosa kɔkɔɔrsi ta nidamata fun nyɛ ba se su un a li Jɛrusalɛm ni a gbaari.

Ju Tima Fun Kpak Stivin

⁸ Nara tima funɛ na chenani Koosa funɛ suŋi Stivin kinkan a la nyɛ un kpok di o tum tum zene awa alaazibu tuma a nyɛ ba.

⁹ Ju tim ta bɔnɛ funɛ wau di ba wa nyɛn Jɛrusalɛm ni a li Sairini pulum awa tɔhɔn naa ba yir Alɛzandria ni. Ba yaa yir ba bar lagmi dɛ ‘Yisi nibinsa a ta ba yɔri’ dɛ. Wuzu digi ba wa Ju tima ba naa li Silisia pulum awa Azia pulum ni fun lagmi a di Stivin amɔrɛ.

¹⁰ Koosa siim weri ti funɛ suŋi Stivin o sɛm nɛha sɛma a nyaŋi ba.

¹¹ Ba fun gil un a la dɛu nara bɔnɛ a bɔ malɛ a nyɛ ba di ba ŋɔ nara tima ni di ba funɛ nu di Stivin chɔk Koosa awa Mosis sɔnnɛ.

¹² Ba fun burgi nara tima bɔnɛ, Ju tim nihɛɛti ta awa Koosa chiksɛ nibiksɛ ta a du un ni a wa kpak un a chiŋsi Koosa dam kɔkɔɔrsi ta awa sɛria nidiile ta suwachak ni.

¹³ Ba fun kpa nusun tima di ba sɛm a du un ni. Ba fun ŋɔ, “Baal nɔ yaa chɔk Koosa bar jɛɛmi dam naa o fun lisi a nyɛ o titi ni, sɔn. O gbanko yaa chɔk Koosa chiksɛ naa o fun kpa nyɛ Mosis ni chen, sɔnu.

¹⁴ Ya funɛ nuu ka o sɛm di Yesu Nazarɛt nar zi chɔk bar nɔu a chɛrgi nyinbaan naa Mosis fun ŋɔ ya nawaalsi ta di ba tiŋ.”

¹⁵ Ba funɛ sɛm peti, Koosa dam kɔkɔɔrsi ta awa sɛria nidiile ta maga funɛ nyini Stivin se ni a na ka o se chi Koosa malaikasi ta digi se.