Tuma 5 - Tampulma

Ananias Awa Safaya Wɛ

¹ Yesu nitiŋɛ ta digi sɔn funɛ ya Ananias. O haan sɔn funɛ ya Safaya. O gbanko fun yogli o tɛɛnɛ,

² a kpa malɛ ta bɔnɛ a du nitumɛ ta nisa ni, a ka kpa bɔnɛ pusi. O haan ti funɛ zim chenani o yau.

³ Pita fun wa pɛɛsi un, “Ananias, i yogli i tɛɛnɛ ti chen, baŋnɛ i yisi malɛ ta bɔnɛ a pusi? Baŋnɛ i nyɛ sintana zu i bambi a daŋni o mur Koosa siim weri ti nan ni?

⁴ I funɛ dɔ tɛɛnɛ ti chen, o funɛ ya i kinnɛ di i kpa un a tum chenani i daŋni. I funɛ yogli un a la malɛ ta chen, o ha funɛ vɛɛn ya i kinnɛ. Yɛrɛ i lisi i bambi ni di i ya nan? I daŋni i mur yau awa Koosa gbanko.”

⁵ Ananias funɛ nu Pita sɛm ta, o fun vaan chel a sou. Ba naa maga funɛ nu chenani yɛɛ, hansura fun kpak ba kinkan.

⁶ Bunɔɔn ta bɔnɛ fun si a zer gar a mɛɛsi un a la sogli un.

⁷ O funɛ dugli hawasa torau, Ananias haan ti fun wa zu doonani ba maga fun lagmi chen. O wa fun zim o baal ti sou ni.

⁸ Pita fun wa pɛɛsi un, “Tɛɛnɛ ti i yogli chen, malɛ ta maga nyɛnn mu wati nann?” O fun ŋɔ, “A maga chen.”

⁹ Pita fun ŋɔ un, “Yɛrɛ i wa i baal la nɔɔni di ma zaamsi ya kunyana Koosa siim weri ti? Ba naa sogli i baal ti nyɛn dentil ni a pɔ di ba sogli i gbanko.”

¹⁰ O funɛ nu o sɛm ta, o fun vaan chel a sou. Bunɔɔni ta fun zu a na di o sowu ka ba kpa un gbaari o baal ti ni a sogli.

¹¹ Hansura fun kpak Yesu nitiŋɛ ta awa ba naa maga nu chenani yɛɛ kinkan.

Nitumɛ Fun Tum Alaazibu Tuma

¹² Nitumɛ ta fun tum tum zene awa alaazibu tuma nara tima suwachak ni. Ba yaa funɛ zu Koosa bar jɛɛmi dam ti a lagmi Solomon zaŋ ti tuhu ni.

¹³ Ba naa vɛ ya Yesu nitiŋɛ ta funɛ ɔm di ba wa ba lagmi dooni, amaa Jɛrusalɛm tim ta funɛ nyɛ ba jirimau.

¹⁴ Chen saha ti nibaala awa nihaana nidamata se funɛ su Yesu a gbaari ba ni.

¹⁵ Domi tum zene naa nitumɛ ta funɛ tum daha, nara tima fun kpa ba wichɔɔrsa a wa dau kichɔɔlɛ daha a li nyinbaanisi ni, chen ni Pita barsɔn zi val ba dahau ba na alaafɛ.

¹⁶ Nidamata ba naa nyɛn tɔsi ni a go Jɛrusalɛm, fun kpa ba wichɔɔrsa awa ba naa alizin tagna nyɛn ba nyuuni ni a wa nitumɛ ta wati ba tiibi ba maga.

Ju Tima Fun Muksi Nitumɛ Kinkan

¹⁷ Doone Koosa dam kɔkɔɔrsi ta nihɛɛ ti awa Sajusi tima ba naa funɛ nyɛn o wati, funɛ di handɔtirɛ a du nitumɛ ta ni ba tum were daha.

¹⁸ Ba fun wa kpaksi ba maga a tɔ dɛ naa ba kpaksi nibin tagna duŋduŋ a tɔ chen.

¹⁹ Dusum funɛ wa biri, Koosa malaikasi ta digi fun wa puk dɛ ti zɔɔnɔ a nyɛ ba li a la ŋɔ ba,

²⁰ “Ma la zu Koosa bar jɛɛmi dam ti a ŋɔ ba naa nyɛn dooni Koosa mi fali ti wɛ, awa chenani o daŋni o kpa un a nyɛ nara ni.”

²¹ Chɔɔsa funɛ wa pisi chɔsa, nitumɛ ta fun tiŋ malaika ti nɔ a la zu Koosa bar jɛɛmi dam ti a biksi nara tima. Koosa dam kɔkɔɔrsi ta nihɛɛ ti awa ba naa funɛ nyɛn o wati, fun yir sɛria nidiile ta awa Ju tim nihɛɛti ta maga ba lagmi o wati a tum Koosa bar jɛɛmi dam ti niilɛ di ba lisi nitumɛ ba naa ba tɔ dɛ chen, a wa.

²² Ba funɛ la tel di ba lisi ba, ba wa fun na ba. Ba fun bur kaali ba naa tum ba chen wati a la ŋɔ ba,

²³ “Ya funɛ la tel dooni, zɔɔnɔ ti faru a pir ka lanjimasa chiŋi dooni a il. Ya fun la puk zɔɔnɔ ti a vɛ na nandigi.”

²⁴ Koosa dam kɔkɔɔrsi ta nihɛɛ ti awa Koosa bar jɛɛmi dam ti niilɛ ta nihɛɛ fun nu chenani ba sɛm a la lisi chenani ya ba.

²⁵ Ba funɛ sɛm dɔŋ ni chene, baal digi fun wa zu a ŋɔ ba, “Maa nu mu wati. Nitumɛ ta ma tɔ dɛ chen chiŋɛ Koosa bar jɛɛmi dam ti ni a biksi nara.”

²⁶ Koosa bar jɛɛmi dam niilɛ ta awa ba nihɛɛ ti fun kaali dooni lalaga a la kpa ba bur wa. Ba fun la kpa ba awa jirima ni a wa, domi hansura fun kpak ba di nara tima zi yaksi ba wa buŋkuli niu.

²⁷ Ba fun kpa ba wa nihɛɛta ba naa funɛ lagmi dooni suwachak. Koosa dam kɔkɔɔrsi ta nihɛɛ ti fun pɛɛsi ba,

²⁸ “Ya wa fun tɛ ma nin di ma ta kpa Yesu sɔn a biksi nara timaa? Ma nyini na chenani ma ya. Ma mɔɔli o biksi tiu a li Jɛrusalɛm maga ni a la daŋni ya dɔ o sou.”

²⁹ Pita fun chiŋi nitumɛ ta bar chiŋi ni a sɛm a nyɛ ba, “O lawa ya tiŋ Koosa nɔu a kaali nibinsa nɔ.

³⁰ Ma waa funɛ kpaasi Yesu a mari daakakli ti ni o sou. Koosa, naa ya nawaalsi ta funɛ jɛɛmi, lɛli un a li o sou ni,

³¹ a kpa un a zini kaali o tɔhɔn ti ni a nyɛ o kani Koosa nihɛɛti bar kani ni. Dooni o fun nyɛ o ya koora, chen ni Ju tim ta zi na nyinbaanu a gil ba tum tagna a bur tiŋ Koosa. Ba ya chen, Yesu zi yisi bau a li a ni ka Koosa zi gil a a ta.

³² Kin nama wɛwa ya biksi nara tima. Koosa kpa o siim weri tirɛ a nyɛ ba naa tiŋ o nɔ. O gbanko la biksi ba chen.”

³³ Nihɛɛta ba naa funɛ lagmi chen, funɛ nu Pita sɛma, ba paan fun si ba ni ba daŋni ba kpu ba.

³⁴ Ba nidigi sɔn funɛ ya Gameliel. O funɛ ya Farisi tim ta digirɛ a ya Koosa chiksɛ nibiksɛ ta digi. Nara tima maga funɛ nyɛ un jirimau kinkan. O fun si chiŋi ba bambaan ni a ŋɔ ba lisi nitumɛ ta a li sal tama.

³⁵ O fun ŋɔ ba, “Mu dɔŋtima, ma doso chenani ma kaa ya nara nama.

³⁶ O wa fun vusi ka baal naa ba yir Tudas chen a ŋɔ di waa ya nara tima nyuhu tiina ka nara fun dugli kɔksa naasi a tiŋ un.

³⁷ O gantɛl nɛɛ ba fun wa gur nara maga. Chen saha ti nidamata fun li tiŋ baal naa funɛ li Galili pulum chen. O sɔn funɛ ya Judas. Lanjimasi ta fun kpu o gbanko ka o gantɛl tiŋsi ta pisi dɔŋ ni.

³⁸ Nara nama nin nyɛn nan, ma ta ya wu digi a du ba ni. Nibine ya ba nyuhu tiina a li chenani ba lisi a la tum, ba yaali ti zi ya yɔriu.

³⁹ Koosa ka ya ba nyuhu tiina, ma wa zi koti a nyaŋi chenani ba ya. Ma wara daŋni di ya wa un yo dɔŋa.”

⁴⁰ Gameliel funɛ sɛm peti, ba maga fun la nɔɔni a nyɛ un. Ba fun ŋɔ ba ba kpa nitumɛ ta a zu a nyɛ Koosa bar jɛɛmi dam ti niilɛ ta tuksi ba wa vurmsi ni. Doone ba fun bukoo tɛ ba nin di ba ta bu kpa Yesu sɔn a sɛm nara ni a nyɛ ba kaali.

⁴¹ Ba funɛ li, nitumɛ ta tusa fun sɔɔni kinkan di Koosa funɛ lisi ba di ba tuksi ba Yesu daha.

⁴² Wuzu kam ba yaa funɛ zu Koosa bar jɛɛmi dam tiu awa nara damsa di ba biksi nara di Yesu ya naa Koosa fun vɔu di o zi wa tumu wuzu digi chen.